കല്‍പ്പറ്റ : സിപിഎം തൊഴിലാളി വര്‍ഗ്ഗ പാര്‍ട്ടിയില്‍നിന്നും മാറി കൊലയാളിവര്‍ഗ്ഗ പാര്‍ട്ടിയായെന്ന് ബിജെപി സംസ്ഥാന സെക്രട്ടറി വി.കെ.സജീവന്‍. മഹിളമോര്‍ച്ച സംഘടിപ്പിച്ച മാര്‍ക്‌സിസ്റ്റ് അക്രമ വിരുദ്ധ കൂട്ടായ്മ ഉദ്ഘാടനം ചെയ്യുകയായിരുന്നു അദേഹം. സിപിഎം നേതാക്കളുടെ ഒത്താശയോടെയാണ് കണ്ണൂരില്‍ കൊലപാതകങ്ങള്‍ നടക്കുന്നത്. കേരളത്തില്‍ ഭരണം നടത്തുന്നതിന് പകരം വ്യത്യസ്ത രീതിയില്‍ കൊലപാതകം നടത്തുന്നതിനാണ് സിപിഎം പഠനം നടത്തുന്നത്. അക്രമത്തിലൂടെ ബിജെപിയെ ഇല്ലായ്മ ചെയ്യാം എന്നത് മലര്‍പ്പൊടിക്കാരന്റെ സ്വപ്‌നം മാത്രമാണ്. മുഖ്യമന്ത്രിയുടെ മണ്ഡലത്തിലാണ് സന്തോഷ് വധിക്കപ്പെട്ടത്. പിണറായി വിജയന്റെ മണ്ഡലത്തില്‍ കഴിഞ്ഞ പഞ്ചായത്ത് തിരഞ്ഞെടുപ്പില്‍ മത്സരിച്ചതിന്റെ അസഹിഷ്ണുതയാണ് 52 വയസ്സുകാരനായ സന്തോഷ് വധിക്കപ്പെട്ടതിന്റെ മുഖ്യ കാരണം. അതോടെ പാവപ്പെട്ട കുടുംബം അനാഥമായി.
ഏഴ് മാസത്തെ പിണറായി സര്‍ക്കാരിന്റെ ഭരണത്തില്‍ കേരളം അരാജകത്വത്തിലായി രിക്കുകയാണ്. ദളിതരും സ്ത്രീകളും തുടങ്ങി എല്ലാ തരത്തിലുള്ളവരും ഇടതുഭരണത്തില്‍ ആക്രമിക്കപ്പെട്ടു. എന്നാല്‍ ഇതിലൊന്നും ഒരു മനുഷ്യാവകാശ പ്രവര്‍ത്തകരും ഇടപെടാത്തത് സിപിഎമ്മിനെ പേടിച്ചുകഴിയേണ്ട അവസ്ഥ സംജാതമായതുകൊണ്ടാണ്. കഞ്ചിക്കോട് വിമല എന്ന വീട്ടമ്മയെ ചുട്ടുകൊന്നത് കേരളത്തില്‍ ചര്‍ച്ച ചെയ്യാന്‍ സാംസ്‌ക്കാരിക നായകരാരും തയ്യാറായില്ല, പാലക്കാട് വിക്‌ടോറിയ കോളേജില്‍ എസ്എഫ്‌ഐക്കാര്‍ പ്രിന്‍സിപ്പാളിന്റെ ശവകുടീരം തീര്‍ത്ത് റീത്ത് വെച്ചതിനെ ആവിഷ്‌ക്കാര സ്വാതന്ത്ര്യമെന്നുപറഞ്ഞ് അനുമോദിക്കുകയാണ് ഇടതുപക്ഷ നേതാക്കള്‍ ചെയ്തതെന്നും അദ്ദേഹം കൂട്ടിച്ചേര്‍ത്തു.
മഹിളമോര്‍ച്ച ജില്ല പ്രസിഡണ്ട് ആശ ഷാജി അധ്യക്ഷത വഹിച്ചു. ബിജെപി ജില്ല പ്രസിഡണ്ട് സജി ശങ്കര്‍, സി.പി.സംഗീത, പി.ജി ആനന്ദ്കുമാര്‍, കെ.മോഹന്‍ദാസ്, ജയ രവീന്ദ്രന്‍, സന്ധ്യ മോഹന്‍ദാസ്, ശ്രീലത ബാബു, അനിത, ശാന്തകുമാരി, രാധ സുരേഷ്, ലക്ഷമിക്കുട്ടി, തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: