വെളളമുണ്ട:വയനാട് ജില്ലയിലെ വെളളമുണ്ട മൊതക്കര നാലുസെന്റ് കോളനിയിലെ പട്ടികവര്‍ഗ്ഗ വിദ്യാര്‍ഥികള്‍ക്ക് യൂണിഫോമും പഠനോപകരണങ്ങളും സമയബന്ധിതമായി വിതരണം ചെയ്യുന്നതിന് നടപടി സ്വീകരിക്കണമെന്ന് സംസ്ഥാന ബാലാവകാശസംരക്ഷണ കമ്മീഷന്‍ വെളളമുണ്ട ഗ്രാമപഞ്ചായത്ത് സെക്രട്ടറിക്ക് നിര്‍ദ്ദേശം നല്‍കി. കോളനിയിലെ കുട്ടികള്‍ സ്‌കൂളില്‍ പോകുന്നത് മുഷിഞ്ഞ വസ്ത്രങ്ങളും കീറിയ ബാഗുമായാണെന്ന പത്രവാര്‍ത്തകളെത്തുടര്‍ന്ന് കമ്മീഷന്‍ സ്വമേധയാ സ്വീകരിച്ച നടപടിയിലാണ് നിര്‍ദ്ദേശം.
യൂണിഫോമും പഠനോപകരണങ്ങളും വാങ്ങുന്നതിന് ക്വട്ടേഷന്‍ ക്ഷണിക്കുന്നതുമായ ബന്ധപ്പെട്ടുണ്ടായ സാങ്കേതികപ്രശ്‌നങ്ങള്‍ മൂലമാണ് അവ വിതരണം ചെയ്യാന്‍ കഴിയാതെ വന്നതെന്ന് മാനന്തവാടി പട്ടികവര്‍ഗ്ഗ വികസന ഓഫീസര്‍ കമ്മീഷനെ ബോധിപ്പിച്ചിരുന്നു. അവ വിതരണം ചെയ്യുന്നതിനുളള പദ്ധതിരൂപീകരണ നടപടികള്‍ അന്തിമഘട്ടത്തിലാണെന്ന് വെളളമുണ്ട ഗ്രാമപഞ്ചായത്ത് സെക്രട്ടറിയും അറിയിച്ചിരുന്നു. എന്നാല്‍, അധ്യയനവര്‍ഷത്തിന്റെ ആരംഭത്തില്‍തന്നെ യൂണിഫോമും പഠനോപകരണങ്ങളും ലഭ്യമാക്കാതിരുന്നത് ബാലാവകാശലംഘനമാണെന്ന് വിലയിരുത്തിയാണ് കമ്മീഷന്‍ അധ്യക്ഷ ശോഭാ കോശി, അംഗം ഗ്ലോറി ജോര്‍ജ്ജ് എന്നിവരടങ്ങിയ ഡിവിഷന്‍ ബെഞ്ചിന്റെ ഉത്തരവ്.
പ്രതികരിക്കാൻ ഇവിടെ എഴുതുക: