കബളിപ്പിച്ചത് പണം തട്ടുന്നയാള്‍ പോലീസിന്റെ പിടിയില്‍

നിലമ്പൂര്‍: വൃദ്ധ സ്ത്രീകളെ പറ്റിച്ച് പണവും ആഭരണവുമായി മുങ്ങുന്ന തട്ടിപ്പുനടത്തുന്നയാള്‍ പോലീസിന്റെ പിടിയിലായി. സുല്‍ത്താന്‍ ബത്തേരി വാകേരി കല്ലൂര്‍കുന്ന് സ്വദേശി പന്തലായനിക്കല്‍ ശിവദാസന്‍ എന്ന മുക്കം ശിവദാസന്‍(42)ആണ് പിടിയിലായത്. ഈ മാസം അഞ്ച്‌ന് നിലമ്പൂര്‍ ജില്ലാ ആശുപത്രിയില്‍ ചികിത്സക്കെത്തിയ വണ്ടൂര്‍ തൃക്കേക്കുത്ത് സ്വദേശി കുന്നുംപറമ്പത്ത് കാര്‍ത്ത്യായനി എന്ന വൃദ്ധയുടെ മാല മോഷ്ടിച്ച കേസിലാണ് അറസറ്റ് ചെയ്തത്. അടുത്ത പരിചയം നടിച്ച് രോഗവിവരങ്ങള്‍ ചോദിച്ച് മനസിലാക്കിയ ശേഷം പ്രായമായവര്‍ക്ക് സര്‍ക്കാര്‍ ചികിത്സാ സഹായമായി 1.35 ലക്ഷം രൂപ ബാങ്ക് വഴി നല്‍കുന്നുണ്ടെന്നും ഇത് ഇവര്‍ക്കും പാസായിട്ടുണ്ടെന്നും ഇതിനുള്ള ഫോമുകളും മറ്റും വാങ്ങുന്ന ചിലവിലേക്കായി 6000 രൂപ ബാങ്കില്‍ അടക്കണമെന്നും പറഞ്ഞു വിശ്വസിപ്പിച്ചാണ് കഴുത്തിലുണ്ടായിരുന്ന ഒരു പവന്റെ മാല കൈക്കലാക്കി കടന്നത്. തന്റെ കൈയ്യിലെ മോതിരവും വൃദ്ധയുടെ മാലയും പണയം വച്ച് 6000 രൂപ ബാങ്കിലടക്കാമെന്നും ചികിത്സാ സഹായം ലഭിക്കുമ്പോള്‍ തിരിച്ചെടുക്കമെന്നും ബോധ്യപ്പെടുത്തിയാണ് കാര്‍ത്ത്യായനിയെ കബളിപ്പിച്ചത്. കാര്‍ത്ത്യയനിയുടെ മക്കളുടെ പേരുകള്‍ ചോദിക്കുകയും അവരെ തനിക്കറിയാമെന്ന് പറഞ്ഞ് വിശ്വസിപ്പിക്കുകയും ചെയ്തതോടെയാണ് ഇവര്‍ മാല ഊരി നല്‍കിയത്. കബളിക്കപ്പെട്ടെന്നു ബോധ്യപ്പെട്ടതോടെയാണ് ഇവര്‍ നിലമ്പൂര്‍ പോലീസ് സ്‌റ്റേഷനില്‍ പരാതി നല്‍കിയത്. മുക്കം നെല്ലിക്കാപറമ്പില്‍ വച്ചാണ് നിലമ്പൂര്‍ എസ്‌ഐ മനോജ് പറയറ്റയും സംഘവും ഇയാളെ അറസ്റ്റ് ചെയ്തത്്. 2014ല്‍ വടകര സര്‍ക്കാര്‍ ആശുപത്രി പരിസരത്തു നിന്നും സമാനമായ കുറ്റകൃത്യത്തിന് ഇയാളെ പോലീസ് പിടികൂടിയിരുന്നു. കൊയിലാണ്ടി, താമരശ്ശേരി, വടകര, പേരാമ്പ്ര തുടങ്ങി എട്ടോളം സ്ഥലങ്ങളില്‍ നടന്ന തട്ടിപ്പുകളില്‍ ഇയാള്‍ പ്രതിയായിരുന്നു. ഡിവൈഎസ്പി മോഹന ചന്ദ്രന്റെ നിര്‍ദ്ദേശ പ്രകാരം നിലമ്പൂര്‍ സിഐ കെ.എം.ദേവസ്യ, എസ്‌ഐ മനോജ് പറയറ്റ എന്നിവരുടെ നേതൃത്വത്തിലുള്ള സംഘമാണ് കേസ് അന്വേഷണം നടത്തുന്നത്. പ്രതിയെ നിലമ്പൂര്‍ കോടതിയില്‍ ഹാജരാക്കി റിമാന്റ് ചെയ്തു.