ഏറ്റുമാനൂര്: ശിവദ്വിജ സേവാസമിതി കാരായ്മ അവകാശി യോഗം ഏറ്റുമാനൂര് പാടകശേരി ഇല്ലത്ത് നടന്നു. തലമുറകള് കൈമാറി തന്ന, പാരമ്പര്യമായി പകര്ന്നു കിട്ടിയ കുടുംബാവകാശമായ ക്ഷേത്ര പ്രവര്ത്തികള് നിര്വ്വഹിക്കുന്ന അംഗങ്ങള്ക്ക് വെല്ലുവിളികള് നേരിടേണ്ടിവരുന്ന സാഹചര്യം ഗൗരവമേറിയതാണെന്ന് വിലയിരുത്തി. കാരായ്മ അവകാശികളുടെ മേല് അധിക ജോലികള് അടിച്ചേല്പ്പിക്കുന്നതിലും, അവകാശങ്ങള് കവര്ന്നെടുക്കുന്നതിലും യോഗം ആശങ്ക രേഖപ്പെടുത്തി. വിവിധ ദേവസ്വംബോര്ഡുകളും ഭരണകര്ത്താക്കളും തുടരുന്ന നിഷേധാത്മക നിലപാടു കള്ക്കെതിരെ പ്രതികരിക്കുവാനും പ്രതിഷേധിക്കുവാനും യോഗം തീരുമാനിച്ചു. നീതി നിഷേധത്തിനെതിരെ ഇതര അമ്പലവാസി സമുദായങ്ങളുടെ സഹായത്തോടെ കൂട്ടായ്മ വിപുലീകരിക്കും. ആചാരാനുഷ്ഠാനങ്ങള് സംരക്ഷിക്കപ്പെടണമെന്നും അവ വരുംതലമുറയ്ക്ക് പകര്ന്ന് കൊടുക്കണമെന്നും യോഗം അഭിപ്രായപ്പെട്ടു. സമിതി സംസ്ഥാന പ്രസിഡന്റ് നാരായണന്മൂസ്സ്, ജനറല് സെക്രട്ടറി സുരേഷ്കുമാര്, കണ്വീനര് സതീഷ്മൂസ്സത്, ഹരികുമാര്, മഹേഷ്കുമാര് തുടങ്ങിയവര് പ്രസംഗിച്ചു.
പ്രതികരിക്കാൻ ഇവിടെ എഴുതുക: