കുമ്പള: അധികാരത്തിന്റെ അഹങ്കാരത്തില്‍ സിപിഎം നാടിന്റെ സമാധാനന്തരിഷം തകര്‍ക്കുകയാണെന്ന് യുവമോര്‍ച്ച ജില്ലാ പ്രസിഡന്റ് പി.ആര്‍. സുനില്‍ പറഞ്ഞു. കുമ്പളയില്‍ ഭാസകര കുമ്പളയുടെ സഹോദരനെ ആക്രമിച്ചുവെന്നത് കെട്ടുകഥയാണ്. മുജംഗാവ് – മുളിയാര്‍ റോഡ് തകര്‍ന്ന വര്‍ഷങ്ങളായി. ഇതുവരെ നന്നാക്കുന്നതിനു വേണ്ടി സര്‍ക്കാര്‍ തയ്യാറായിട്ടില്ല. ജനസഞ്ചാരം ദുസഹമായതിനാല്‍ പഞ്ചായത്ത് മെമ്പര്‍ ഹരീഷ് ഗട്ടിയുടെ നേതൃത്വത്തില്‍ പ്രവര്‍ത്തകരെ ചേര്‍ത്ത് ശ്രമദാനത്തിലൂടെ റോഡ് നന്നാക്കുമ്പോള്‍ അതുവഴി വന്ന മാധവയോട് റോഡ് നന്നാക്കുന്നത് കാരണം മറ്റൊരു വഴിയിലൂടെ പോകാന്‍ ആവശ്യപെട്ടപ്പോള്‍ മദ്യപിച്ച് ലക്കുകെട്ട മാധവ പ്രവര്‍ത്തകരെ തെറി വിളിക്കുകയും അവിടെ നിന്നിരുന്ന ഊമയായ ശ്രിനിവാസനെ അക്രമിക്കുകയും ചെയ്യുകയാണുണ്ടായത്. ഇത് ചോദ്യം ചെയ്ത ശ്രീനിവാസന്റെ പിതാവ് സിപിഎം പ്രവര്‍ത്തകനായ ജയ ഗട്ടിയുമായി മാധവ അക്രമത്തിലേര്‍പ്പെടുകയമാണ് ചെയ്തത്. സ്ഥലത്തുണ്ടായിരുന്ന മെമ്പര്‍ ഇടപെട്ട് പ്രശ്‌നം പറഞ്ഞ് തീര്‍ക്കുകയാണ് ചെയ്തത്. ഇതാണ് യഥാര്‍ത്ഥത്തില്‍ അവിടെ സംഭവിച്ചത്.
എന്നാല്‍ സിപിഎം നേതൃത്വം ഇതിനെ രാഷ്‌ട്രീയവല്‍ക്കരിച്ച് സമാധാനാന്തരീക്ഷം നിലനില്‍ക്കുന്ന കുമ്പള പ്രദേശത്ത് സംഘര്‍ഷത്തിനുള്ള ശ്രമമാണ് നടത്തുന്നത്. ജനങ്ങള്‍ ഇത് തിരിച്ചറിയും. സിപിഎമ്മിന്റെ അക്രമണ രാഷ്‌ട്രീയത്തെ ഒറ്റപ്പെടുത്താന്‍ ജനങ്ങള്‍ തയ്യാറാകണമെന്ന് പി.ആര്‍.സുനില്‍ പറഞ്ഞു.
പ്രതികരിക്കാൻ ഇവിടെ എഴുതുക: