കാസര്‍കോട്: കാസര്‍കോട് പുതിയ ബസ്സ്റ്റാന്‍ഡിന് സമീപം ഒരു മാലിന്യ നിക്ഷേപ കേന്ദ്രമായി മാറിയിരിക്കുന്നു. ഇത് പൊതുജനാരോഗ്യത്തിന് ഭീഷണിയുയര്‍ത്തുകയാണ്. പുതിയ ബസ്സ്റ്റാന്‍ഡിന് തെക്കു ഭാഗത്ത് കാസര്‍കോട് പ്രസ് ക്ലബ്ബ് കെട്ടിടത്തിലേക്ക് പോകുന്ന റോഡിന് സമീപത്തെ കുറ്റിക്കാട്ടിലാണ് വന്‍തോതില്‍ മാലിന്യങ്ങള്‍ തള്ളിയിരിക്കുന്നത്. ഭക്ഷണാവശിഷ്ടങ്ങളും ഉപയോഗശൂന്യമായ പഴം പച്ചക്കറികളും മറ്റു മാലിന്യങ്ങളും ചാക്കുകളിലും മറ്റും കെട്ടിപ്പൊതിഞ്ഞു കൊണ്ടു വന്നാണ് ഇവിടെ തള്ളുന്നത്. ഇക്കാരണത്താല്‍ ഇവിടെ കൊതുകുശല്യവും രൂക്ഷമാണ്.
സന്ധ്യ മയങ്ങിയാല്‍ ഈ ഭാഗം സാമൂഹ്യ വിരുദ്ധരുടെ താവളം കൂടിയാണ്. മദ്യപിച്ച ശേഷം ബിയര്‍ കുപ്പികളും മറ്റും ഇവിടെ അലക്ഷ്യമായി വലിച്ചെറിയുന്നു. മാലിന്യങ്ങള്‍ ഭക്ഷിക്കാനായി കൂട്ടത്തോടെ ഇവിടെ തെരുവ് നായ്‌ക്കളെത്തുന്നത് പതിവു കാഴ്ചയാണ്. അടുത്ത കാലം വരെ ഒട്ടിയ വയറുമായി നഗരത്തില്‍ അലഞ്ഞു തിരിഞ്ഞിരുന്ന ചാവാലിപ്പട്ടികള്‍ വരെ ഇപ്പോള്‍ തടിച്ചു കൊഴുത്ത് അക്രമാസക്തരായി മാറിയതിന്റെ കാരണം ഈ മാലിന്യ കേന്ദ്രമാണെന്ന് പരിസരവാസികള്‍ പറഞ്ഞു. നേരെ നിന്ന് ഒന്നു മോങ്ങാന്‍ പോലും ശേഷിയില്ലാതിരുന്ന ഇത്തരം നായ്ക്കള് ചുവന്ന നാവ് നീട്ടി അതിശക്തമായി കുരയ്‌ക്കുമ്പോള്‍ വഴിയാത്രക്കാര്‍ ഭയചകിതരാകുന്നു. സ്ത്രീകളും കുട്ടികളും ഈ ഭാഗത്തേക്ക് വരാന്‍ പോലും മടിക്കുകയാണ്. നായ്ക്കള് അക്രമാസക്തമാകുന്നുണ്ട്. ഇത് വഴി പോകുന്ന കാല്‍ നടയാത്രക്കാര്‍ക്ക് നേരെ നായ്‌ക്കൂട്ടം കുരച്ച് ചാടുന്നത് നിത്യ സംഭവമാണ്.
രാത്രി കാലങ്ങളില്‍ ചുരുങ്ങിയത് അമ്പതോളം നായ്‌ക്കളെങ്കിലും മാലിന്യ കേന്ദ്ര പരിസരങ്ങളില്‍ ചുറ്റിക്കറങ്ങുന്നുണ്ടാകും. ഇതിന് പുറമെ വന്‍ പകര്‍ച്ച വ്യാധി ഭീഷണിയാണ് ഇത് ഉയര്‍ത്തുന്നത്. സമീപത്തുള്ള കച്ചവട സ്ഥാപനങ്ങളില്‍ നിന്നും ഓഫീസുകളില്‍ നിന്നും ഇവിടേക്ക് മാലിന്യങ്ങള്‍ കൊണ്ട് തള്ളുന്നുണ്ട്.
കാസര്‍കോട് നഗരസഭാ പരിധിയില്‍ മാലിന്യങ്ങള്‍ നിര്‍മ്മാര്‍ജ്ജനം ചെയ്യാന്‍ കൃത്യമായ സംവിധാനങ്ങള്‍ ഇല്ലാത്തതിനാല്‍ ജനവാസമില്ലാതെ ഒഴിഞ്ഞ് കിടക്കുന്ന കുറ്റിക്കാടുകള്‍ നിറഞ്ഞ ഇത്തരം സ്ഥലങ്ങളെ മാലിന്യ നിക്ഷേപ കേന്ദ്രങ്ങളാക്കി മാറ്റുകയാണ് പൊതുജനം.
പ്രതികരിക്കാൻ ഇവിടെ എഴുതുക: