കാസര്‍കോട്: ജില്ലയിലെ അണ്‍ എയ്ഡഡ് മേഖലയിലെ അധ്യാപകരുടെ പ്രശ്‌നങ്ങള്‍ സര്‍ക്കാറിന്റെ ശ്രദ്ധയില്‍പ്പെടുത്തി അവര്‍ക്ക് അനുകൂലമായ തീരുമാനമുണ്ടാകുന്നതിന് നടപടിയെടുക്കുമെന്ന് സംസ്ഥാന വനിതാ കമ്മീഷന്‍ ചെയര്‍പേഴ്‌സണ്‍ കെ.സി.റോസക്കുട്ടി പറഞ്ഞു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന വനിതാ കമ്മീഷന്‍ മെഗാ അദാലത്തിനുശേഷം സംസാരിക്കുകയായിരുന്നു അവര്‍. അണ്‍ എയ്ഡഡ് മേഖലയില്‍ സംസ്ഥാന വിദ്യാഭ്യാസ പാഠ്യപദ്ധതി പിന്തുടരുന്ന വിദ്യാലയങ്ങളിലെ അധ്യാപികമാരില്‍ നിന്നും അദാലത്തില്‍ അഞ്ച് പരാതി ലഭിച്ചതായി അവര്‍ പറഞ്ഞു. ഈ അധ്യാപകര്‍ക്ക് സര്‍ക്കാര്‍ നിശ്ചയിച്ച അടിസ്ഥാന ശമ്പളം പോലും നല്‍കാതെ ചൂഷണം ചെയ്യുന്ന സ്ഥിതിവിശേഷമാണ് ജില്ലയിലുളളത്. അധ്യാപകരെ അകാരണമായി ജോലിയില്‍ നിന്ന് പിരിച്ചുവിടുകയും അര്‍ഹമായ ആനുകൂല്യങ്ങളും എക്‌സ്പീരിയന്‍സ് സര്‍ട്ടിഫിക്കറ്റും നല്‍കാതെ അവരെ വഞ്ചിക്കുന്നതായും പരാതിയുണ്ട്. കുടുംബപ്രശ്‌നങ്ങളുടെ പേരില്‍ ഭാര്യയെയും മകളെയും സംരക്ഷിക്കാതിരുന്ന ഹോസ്ദൂര്‍ഗ്ഗ് സ്വദേശി ഭാര്യക്ക് 3000 രൂപയും മകള്‍ക്ക് രണ്ടായിരം രൂപയും ചെലവിന് നല്‍കാന്‍ അദാലത്തില്‍ ധാരണയായി. അദാലത്തില്‍ വനിതാ കമ്മീഷന്‍ അംഗം അഡ്വ.നൂര്‍ബിന റഷീദും സംബന്ധിച്ചു.
86 കേസുകളാണ് കമ്മീഷന്റെ പരിഗണനയ്‌ക്ക് വന്നത്. ഇതില്‍ 41 കേസുകളില്‍ തീര്‍പ്പ് കല്‍പ്പിച്ചു. നാല് കേസുകളില്‍ റവന്യൂ ഡിവിഷണല്‍ ഓഫീസറുടെയും 19 കേസുകളില്‍ പോലീസിന്റെയും റിപ്പോര്‍ട്ട് തേടി. 22 കേസുകള്‍ അടുത്ത സിറ്റിംഗിലേക്ക് മാറ്റി വെച്ചു. സ്വത്ത് തര്‍ക്കം, ഗാര്‍ഹിക പീഡനം, കുടുംബകലഹം, വൃദ്ധരായ മാതാപിതാക്കളുടെ സംരക്ഷണം ഏറ്റെടുക്കാതിരിക്കല്‍ എന്നീ ഇനത്തിലുളള പരാതികളാണ് കമ്മീഷന്റെ മുമ്പാകെ വന്നത്. എക്‌സ്‌പേര്‍ട്ട് പാനല്‍ അംഗം അഡ്വ.അനില്‍റാണി, വനിതാ പ്രൊട്ടക്ഷന്‍ ഓഫീസര്‍ പി.സുലജ, വനിതാസെല്‍ എസ്.ഐ ഉഷാകുമാരി, സിവില്‍ പോലീസ് ഓഫീസര്‍ കെ.വി.ഷീജ എന്നിവര്‍ അദാലത്തില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: