മുണ്ടക്കയം: പാറത്തോട്ടില്‍ ബിജെപി പഞ്ചായത്ത് ജനറല്‍ സെക്രട്ടറി ഷാലു.പി.സുധന് നേരെ സിപിഐഎം ഗുണ്ടകളുടെ അക്രമണം. നാല്‍പതോളം വരുന്ന അക്രമിസംഘം ഷാലുവിന്റെ വീടിന് നേര്‍ക്കും അക്രമം അഴിച്ചുവിട്ടു. കഴിഞ്ഞ ദിവസം രാത്രി മാരകായുധങ്ങളുമായി എത്തിയ സിപിഐഎം ഗുണ്ടാസംഘമാണ് അക്രമണം നടത്തിയത്. സുബിന്‍, നൗഷാദ്, ജെറിഷ്, അഫ്‌സല്‍, ഗസല്‍, സോനു തുടങ്ങിയവരുടെ നേതൃത്വത്തില്‍ എത്തിയ സംഘമാണ് അക്രമണത്തിന് നേതൃത്വം നല്‍കിയത്. ഈ മേഖലയില്‍ സംഘപ്രസ്ഥാനങ്ങളുടെ വളര്‍ച്ചയില്‍ വിറളിപൂണ്ട മാര്‍ക്‌സിസ്റ്റ് പ്രസ്ഥാനങ്ങള്‍ ഇവിടെ നിരന്തരം അക്രമം നടത്തി വരുകയാണ്. സംഭവത്തില്‍ പ്രതിഷേധിച്ച് സംഘപരിവാര്‍ സംഘടനകള്‍ പാറത്തോട്ടില്‍ പ്രതിഷേധ പ്രകടനം നടത്തി.
പള്ളിപ്പടിയില്‍ നിന്നാരംഭിച്ച പ്രകടനം പാറത്തോട് ടൗണിന് സമീപം പോലീസ് തടയാന്‍ ശ്രമിച്ചത് പ്രതിഷേധത്തിന് ഇടയാക്കി. പാറത്തോട് ടൗണില്‍ എത്തിയ പ്രവര്‍ത്തകരെ പോലീസ് വീണ്ടും തടഞ്ഞെങ്കിലും റോഡില്‍ കുത്തിയിരുന്ന് പ്രവര്‍ത്തകര്‍ പ്രതിഷേധിച്ചു. ഇതിനിടയില്‍ സിപിഐഎമ്മിനെതിരെയുള്ള പ്രതിഷേധ പ്രകടനത്തിന് നേരെ പ്രതിഷേധവുമായി എസ്ഡിപിഐ പ്രവര്‍ത്തകര്‍ രംഗത്ത് എത്തിയത് സിപിഐഎമ്മും തീവ്രവാദ സംഘടനയുമായുള്ള ഈ പ്രദേശത്തെ കൂട്ടുകെട്ടാണ് വ്യക്തമാക്കിയത്. രാത്രി എസ്ഡിപിഐയിലും പകല്‍ ഡിവൈഎഫ്‌ഐയിലും പ്രവര്‍ത്തിക്കുന്ന ഒരു കൂട്ടമാളുകള്‍ എതിര്‍ത്തെങ്കിലും ടൗണില്‍ സംഘപരിവാര്‍ പ്രതിഷേധ യോഗം നടത്തി. ബിജെപി മണ്ഡലം പ്രസിഡന്റ് വി.സി. അജികുമാര്‍, ആര്‍എസ്എസ് ജില്ലാ ശാരീരിക് ശ്ക്ഷണ്‍ പ്രമുഖ് രാജേഷ് തമ്പലക്കാട്, സി.എസ്. രഞ്ജിത്ത് തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: