പാലാ: നഗരത്തിലെ വ്യാപാരസ്ഥാപനങ്ങളില്‍ പുത്തനുണര്‍വ്വേകി ഉപഭോക്താക്കളെ സമ്മാനപ്പെരുമഴകൊണ്ട് നിറയ്‌ക്കുന്ന പാലാ ഷോപ്പിംഗ് ഫെസ്റ്റിന് ആവേശോജ്ജ്വലമായ സ്വീകരണം. കേരള വ്യാപാരി വ്യവസായി ഏകോപനസമിതി യൂത്ത്‌വിംഗ് യൂണിറ്റിന്റെ നേതൃത്വത്തില്‍ ആവിഷ്‌കരിച്ച ഷോപ്പിംഗ് ഫെസ്റ്റില്‍ നഗരത്തിലെ വ്യാപാരസ്ഥാപനങ്ങളില്‍നിന്ന് സാധനങ്ങള്‍ വാങ്ങുന്ന ഓരോരുത്തര്‍ക്കും വമ്പന്‍ സമ്മാനങ്ങളുള്ള കൂപ്പണുകളാണ് സൗജന്യമായി ലഭിക്കുന്നത്.
കാര്‍, ബൈക്ക്, എല്‍.ഇ.ഡി, ടി.വി, ഫ്രിഡ്ജ് തുടങ്ങി ഡിന്നര്‍സെറ്റ് വരെ ഒട്ടേറെ സമ്മാനങ്ങള്‍ കരസ്ഥമാക്കുവാന്‍ അവസരം ലഭിക്കുന്ന മൂന്നുമാസം നീണ്ടുനില്ക്കുന്ന ഷോപ്പിംഗ്‌ഫെസ്റ്റിന്റെ ആദ്യഘട്ട നറുക്കെടുപ്പില്‍ രണ്ട് ഇയോണ്‍ കാറുകളും രണ്ട് ബൈക്കുകളും സമ്മാനമായി നല്‍കിക്കഴിഞ്ഞു. ഇനി രണ്ട് ഘട്ടങ്ങളിലായി രണ്ട് വീതം കാറുകളും ബൈക്കുകളും മറ്റ് സമ്മാനങ്ങളും നറുക്കെടുപ്പിലൂടെ ഭാഗ്യശാലികള്‍ക്ക് വിതരണം ചെയ്യും. ജൂണ്‍ 20 വരെ നടക്കുന്ന ഷോപ്പിംഗ് മാമാങ്കത്തിന് കടകളില്‍ ആവേശകരമായ പ്രതികരണമാണ് ലഭിച്ചുകൊണ്ടിരിക്കുന്നതെന്ന് വ്യാപാരികള്‍ പറഞ്ഞു. മൂന്നുലക്ഷത്തോളം സമ്മാനക്കൂപ്പണുകള്‍ ഇതുവരെ വിതരണം ചെയ്തതായി ഭാരവാഹികള്‍ പറഞ്ഞു. റബ്ബര്‍ വിലയിടിവിനെത്തുടര്‍ന്ന് മാന്ദ്യത്തിലായിരുന്ന വ്യാപാരമേഖലയ്‌ക്ക് ഏറെ ഊര്‍ജ്ജം പകരുന്ന സമ്മാന പദ്ധതിയില്‍ ഉപയോക്താക്കളുടെ പങ്കാളിത്തം ഏറിവരുകയാണ്.
പ്രതികരിക്കാൻ ഇവിടെ എഴുതുക: