കട്ര (ജമ്മുകശ്മീര്): സത്യം, ധര്മ്മം, നീതി, ദയ തുടങ്ങിയ ശാശ്വത ജീവിതമൂല്യങ്ങള് വിദ്യാര്ത്ഥികള്ക്ക് പകര്ന്നു നല്കുന്ന പാഠ്യപദ്ധതി രാജ്യത്ത് അടിയന്തരമായി നടപ്പാക്കണമെന്ന് അ ഖില ഭാരതീയ രാഷ്ട്രീയ ശൈക്ഷിക് മഹാസംഘ് (എബിആര്എസ്എം) നാഷണല് എക്സിക്യൂട്ടീവ് കമ്മറ്റി അംഗീകരിച്ച പ്രമേയം കേന്ദ്രസര്ക്കാരിനോടാവശ്യപ്പെട്ടു.
പരമ്പരാഗത മൂല്യസങ്കല്പങ്ങളില് നിന്ന് പുതുതലമുറ അപകടകരമായ വിധത്തില് അകന്നിരിക്കുന്നു. അതിന്റെ ദുരന്തഫലങ്ങള് പല രൂപത്തില് നിത്യേന നാം അനുഭവിച്ചുകൊണ്ടിരിക്കുകയാണെന്ന് പ്രമേയം ചൂണ്ടിക്കാട്ടുന്നു.
വേദങ്ങളും ഇതിഹാസങ്ങളും പുരാണങ്ങളും ഉള്പ്പെടെ ഭാരതീയ പൗരാണിക ഗ്രന്ഥങ്ങളെല്ലാം തന്നെ ശാശ്വതജീവിതമൂല്യങ്ങളുടെ അളവറ്റ കലവറകളാണ്. എന്നാല് പാഠ്യപദ്ധതിയില് ഇവയ്ക്ക് ഇടം നല്കാത്തതിനാല് വിദ്യാര്ത്ഥികള്ക്ക് അന്യമാണെന്നും പ്രമേയം കുറ്റപ്പെടുത്തുന്നു.
ജമ്മുകാശ്മീരിലെ കട്ര ആത്മീയ വികാസകേന്ദ്രത്തില് നടന്ന യോഗം അഖിലേന്ത്യാ സംഘടനാസെക്രട്ടറി ഡോ.മഹേന്ദ്രകപൂര് ഉദ്ഘാടനം ചെയ്തു. അഖിലേന്ത്യാ പ്രസിഡന്റ് ഡോ.വിമല്പ്രസാദ് അഗര്വാള് അദ്ധ്യക്ഷനായിരുന്നു. രണ്ടു ദിവസം നീണ്ടുനിന്ന യോഗത്തില് അഖിലേന്ത്യാ ജനറല്സെക്രട്ടറി ഡോ.ജഗദീഷ് പ്രസാദ്, സഹസംഘടനാ സെക്രട്ടറി കെ.ബാലകൃഷ്ണഭട്ട് എന്നിവര് വിവിധ ചര്ച്ചകള്ക്ക് നേതൃത്വം നല്കി.
28 സംസ്ഥാനങ്ങളില് നിന്നുള്ള 94 പ്രതിനിധികള് യോഗത്തില് പങ്കെടുത്തു. എബിആര്എസ്എം ദക്ഷിണ ക്ഷേത്രീയ സംഘടനാ കാര്യദര്ശി പി.ചന്ദ്രശേഖരന്, ദേശീയ അദ്ധ്യാപകപരിഷത്ത് സംസ്ഥാനവൈസ്പ്രസിഡന്റ് പി.എസ്.ഗോപകുമാര്, സെക്രട്ടറി എ.ബാലകൃഷ്ണന്, എറണാകുളം ജില്ലാസെക്രട്ടറി എം.ശങ്കര് എന്നിവരാണ് കേരളത്തെ പ്രതിനിധീകരിച്ച് യോഗത്തില് പങ്കെടുത്തത്.
പ്രതികരിക്കാൻ ഇവിടെ എഴുതുക: