കണ്ണൂര്‍: പള്ളിക്കുന്നിലെ ടി.പി അരവിന്ദാക്ഷന്റെ വീട്ടുമുറ്റത്ത് നിര്‍ത്തിയിട്ട അയല്‍വാസിയുടെ കാറും വീടിന്റെ ജനല്‍ച്ചില്ലുകളും തകര്‍ത്ത സംഭവത്തില്‍ സമഗ്രാന്വേഷണം നടത്തി യഥാര്‍ത്ഥ പ്രതികളെ പിടികൂടണമെന്ന് ഹിന്ദു ഐക്യവേദി ആവശ്യപ്പെട്ടു.
കാറും വീടും അക്രമിച്ചതിന് പിന്നില്‍ സംഘപരിവാര്‍ പ്രസ്ഥാനങ്ങളാണെന്ന് വ്യാജ പ്രചരണം നടത്തി യഥാര്‍ത്ഥ പ്രതികളെ രക്ഷപ്പെടുത്താനുള്ള ശ്രമമാണ് പോലീസും ചില കോണ്‍ഗ്രസ്സ് നേതാക്കളും നടത്തുന്നത്. സംഭവത്തിന് പിന്നില്‍ കെയസുധാകരനും കൂട്ടാളികളുമാണെന്ന് ഹിന്ദു ഐക്യവേദി ആരോപിച്ചു. കുറച്ചുകാലമായി പള്ളിക്കുന്ന് മൂകാംബിക ക്ഷേത്രവും പള്ളിക്കുന്ന് പഞ്ചായത്ത്, സഹകരണ ബാങ്ക്, പയ്യാമ്പലം ഹിന്ദു ശ്മശാനം എന്നിവക്കെതിരെ പ്രവര്‍ത്തിക്കുന്നത് സുധാകരന്റെ നേതൃത്വത്തിലുള്ള സംഘമാണ്.
കണ്ണൂര്‍ എസ്‌ഐ സനല്‍ കുമാര്‍ കോണ്‍ഗ്രസ്സിന് അടിമപ്പണിയെടുക്കുകയാണ്. കാര്‍ തകര്‍ത്ത സംഭവം സംഘപരിവാര്‍ സംഘടനകളുടെ തലയില്‍ വെക്കാനുള്ള ശ്രമമാണ് എസ്‌ഐ നടത്തുന്നത്. കേസ് അന്വേഷണത്തിന്റെ ഭാഗമായി രാത്രി കാലങ്ങളില്‍പോലും ഈ മേഖലയിലെ പല വീടുകളിലും കയറി ഭീകരാന്തരീക്ഷം സൃഷ്ടിക്കുകയാണ് എസ്.ഐ സനല്‍ കുമാര്‍. സംഭവത്തില്‍ നിരപരാധികളായവരെ പ്രതികളാക്കി ചേര്‍ത്ത് യഥാര്‍ത്ഥ പ്രതികളെ രക്ഷിക്കാനുള്ള എസ്‌ഐയുടെ നീക്കം വ്യാപക പ്രതിഷേധത്തിന് കാരണമായിട്ടുണ്ട്.
സംഭവത്തില്‍ പോലീസ് കംപ്ലെയ്ന്റ് അതോറിറ്റിയില്‍ ചിലര്‍ പരാതി നല്‍കിയിട്ടുണ്ട്. സംഭവത്തിലെ യഥാര്‍ത്ഥ പ്രതികളെ കണ്ടെത്താന്‍ അരവാന്ദാക്ഷനെയും കൂട്ടാളികളെയും ശാസ്ത്രീയമായ വിധത്തില്‍ ചോദ്യം ചെയ്യാനും നുണ പരിശോധനക്ക് വിധേയരാക്കാനും നടപടി സ്വീകരിക്കണമെന്നും ഹിന്ദു ഐക്യവേദി ആവശ്യപ്പെട്ടു. പോലീസിനെതിരെ ശക്തമായ പ്രക്ഷോഭം നടത്താനും യോഗം തീരുമാനിച്ചു. സംഭവത്തില്‍ പ്രതിഷേധിച്ച് ഇന്നലെ ഹിന്ദു ഐക്യവേദിയുടെ നേതൃത്വത്തില്‍ പള്ളിക്കുന്നില്‍ പ്രതിഷേധ പ്രകടനം നടത്തി.
പ്രതികരിക്കാൻ ഇവിടെ എഴുതുക: