ആലപ്പുഴ: കിസ് ഓഫ് ലവിന്റെ ആഭിമുഖ്യത്തില്‍ ആലപ്പുഴ നഗരത്തില്‍ നടന്ന ചുംബന സമരത്തില്‍ മാവോയിസ്റ്റ് അനുഭാവികളും പങ്കെടുത്തതായി പോലീസിന് സൂചന ലഭിച്ചു. ഇതേക്കുറിച്ച് ഊര്‍ജിതമായ അന്വേഷണം തുടങ്ങി. സമരത്തില്‍ മാവോയിസ്റ്റ് അനുകൂലികള്‍ പങ്കെടുക്കാന്‍ സാദ്ധ്യതയുണ്ടെന്ന് ജന്മഭൂമി റിപ്പോര്‍ട്ട് ചെയ്തിരുന്നു. നിരോധിത സംഘടനാ പ്രവര്‍ത്തകര്‍ പങ്കെടുക്കാനിടയുണ്ടെന്ന് പോലീസിന്റെ രഹസ്യാന്വേഷണ വിഭാഗവും സൂചന നല്‍കിയിരുന്നു. ഇതേത്തുടര്‍ന്നാണു പോലീസ് കര്‍ശന സുരക്ഷ ഏര്‍പ്പെടുത്തിയത്. സമരത്തില്‍ നുഴഞ്ഞുകയറി പ്രശ്‌നങ്ങള്‍ സൃഷ്ടിക്കാന്‍ ഇക്കൂട്ടര്‍ ശ്രമിക്കുമെന്നായിരുന്നു പോലീസിനു വിവരം ലഭിച്ചത്.
ചുംബസമരത്തില്‍ പങ്കെടുത്ത അന്യജില്ലകളില്‍പ്പെട്ട ഏതാനും യുവതിയുവാക്കളാണു മാവോയിസ്റ്റു അനുകൂലികളെന്നു പോലീസ് സംശയിക്കുന്നത്. സമരത്തില്‍ പങ്കെടുത്തവരുടെ വീഡിയോ ദൃശ്യങ്ങള്‍ പോലീസ് പരിശോധിച്ചു വരികയാണ്. സംഘാടകരെയും ഇതില്‍ പങ്കെടുത്ത മറ്റു ചിലരെയും പോലീസ് അടുത്ത ദിവസങ്ങളില്‍ ചോദ്യം ചെയ്യുമെന്നാണു അറിയുന്നത്.
ആലപ്പുഴയില്‍ ശാസ്ത്രസാഹിത്യ പരിഷത്തിന്റെ ചില ജില്ലാ നേതാക്കളാണു ചുംബനസമരത്തിനു നേതൃത്വം നല്‍കിയത്. തോമസ്‌ഐസക് എംഎല്‍എയുമായി വളരെ അടുത്ത ബന്ധമുള്ള ചിലരും സമരത്തില്‍ പങ്കെടുത്തിരുന്നു. എംഎല്‍എ ഓഫീസിനു സമീപമാണു ആദ്യം ചുംബനസമരം അരങ്ങേറിയത്.
പ്രതികരിക്കാൻ ഇവിടെ എഴുതുക: