തിരുവനന്തപുരം: സ്കൂള്‍ പ്രവേശനോത്സവത്തിന്റെ സംസ്ഥാനതല ഉദ്ഘാടനം ജൂണ്‍ രണ്ടിന്‌ രാവിലെ 10ന്‌ മലപ്പുറം ജില്ലയിലെ തിരൂരങ്ങാടി തൃക്കുളം ഗവ. ഹൈസ്കൂളില്‍ വ്യവസായ ഐ.ടി. വകുപ്പ്‌ മന്ത്രി പി. കെ. കുഞ്ഞാലിക്കുട്ടി നിര്‍വഹിക്കും. വിദ്യാഭ്യാസ വകുപ്പ്‌ മന്ത്രി പി.കെ.അബ്ദുറബ്ബ്‌ അധ്യക്ഷനായിരിക്കും.
ജില്ലാതലത്തിലുള്ള പ്രവേശനോത്സവ പരിപാടികള്‍ക്ക്‌ പുറമേ, എല്ലാ സ്കൂളുകളിലും പ്രവേശനോത്സവം വിപുലമായ രീതിയില്‍ സംഘടിപ്പിക്കണമെന്ന്‌ വിദ്യാഭ്യാസ വകുപ്പ്‌ ബന്ധപ്പെട്ടവര്‍ക്ക്‌ നിര്‍ദ്ദേശം നല്‍കിയിട്ടുണ്ട്‌.
അധ്യാപക രക്ഷാകര്‍തൃസമിതി, സ്കൂള്‍ മാനേജ്മെന്റ്‌ കമ്മിറ്റി, സര്‍വശിക്ഷാ അഭിയാന്‍, രാഷ്‌ട്രീയ മാധ്യമിക്‌ ശിക്ഷാ അഭിയാന്‍ മാതൃസംഗമം തുടങ്ങിയവയുടെ നേതൃത്വത്തില്‍ നടത്തുന്ന പരിപാടിയില്‍ തദ്ദേശ സ്വയംഭരണ സ്ഥാപനങ്ങളുടെ പ്രതിനിധികളെ പങ്കെടുപ്പിക്കും. സ്കൂള്‍ മാനേജ്മെന്റ്‌ കമ്മിറ്റികള്‍ക്കുള്ള കൈപ്പുസ്തകമായ ‘പരിരക്ഷയുടെ പാഠങ്ങളുടെ’ പരിഷ്ക്കരിച്ച പതിപ്പ്‌ ആയിരം കേന്ദ്രങ്ങളില്‍ പ്രകാശനം ചെയ്യും. വിദ്യാഭ്യാസ മന്ത്രിയുടെ പ്രവേശനോത്സവ സന്ദേശം എല്ലാ സ്കൂളുകളിലും വായിക്കും. അക്ഷരത്തൂവാലകള്‍, മധുര പലഹാരങ്ങള്‍ എന്നിവ വിതരണം ചെയ്യാനും നിര്‍ദ്ദേശമുണ്ട്‌. അന്നേദിവസം രക്ഷകര്‍ത്താക്കളും സ്കൂളുകളിലെത്തണം. സംസ്ഥാനതല സംഘാടക സമിതി രൂപീകരണം ഈ മാസം 21 ന്‌ രണ്ട്‌ മണിക്ക്‌ തിരൂരങ്ങാടി തൃക്കുളം ഹൈസ്ക്കൂളില്‍ നടത്തും. ജില്ലയിലെ എംഎല്‍എ മാര്‍, തദ്ദേശസ്വയംഭരണ സ്ഥാപന പ്രതിനിധികള്‍, പൊതു വിദ്യാഭ്യാസ വകുപ്പ്‌ ഡയറക്ടര്‍, വിദ്യാഭ്യാസ സെക്രട്ടറി എന്നിവര്‍ പങ്കെടുക്കും. മലപ്പുറം ജില്ലാ പഞ്ചായത്ത്‌ പ്രസിഡന്റ്‌ സുഹ്‌റാ മമ്പാട്‌ അധ്യക്ഷയായിരിക്കും.
പ്രതികരിക്കാൻ ഇവിടെ എഴുതുക: