കൊച്ചി: യുഎഇ ആസ്ഥാനമായി പ്രവര്‍ത്തിക്കുന്ന ഏതാനും പ്രൊഫഷണലുകള്‍ പ്രൊമോട്ടു ചെയ്യുന്ന മാഗ്നാമൈന്‍ഡ് വെഞ്ച്വേഴ്‌സ് കേരളത്തിലെ ആദ്യത്തെ വന്‍കിട വ്യാവസായിക അലക്കുശാല എറണാകുളം ജില്ലയിലെ മൂവാറ്റുപുഴയ്‌ക്കടുത്ത് നെല്ലാടിലെ കിന്‍ഫ്രാ സ്മാള്‍ ഇന്‍ഡസ്ട്രീസ് പാര്‍ക്കില്‍ തുറന്നു.
20,000 ച. അടി വിസ്തൃതിയില്‍ സ്ഥാപിച്ചിരിക്കുന്ന ഈ ലോണ്‍ഡ്രി സമുച്ചയം പ്രധാനമായും കൊച്ചി, മൂന്നാര്‍, കുമരകം എന്നിവിടങ്ങളിലെ ആതിഥേയ വ്യവസായ സംരംഭങ്ങളെയാണ് ലക്ഷ്യമിടുന്നതെന്ന് കിന്‍ഫ്രാ പാര്‍ക്കിലെ ലോണ്‍ഡ്രി ആസ്ഥാനത്ത് നടന്ന വാര്‍ത്താസമ്മേളനത്തില്‍ കമ്പനിയുടെ പ്രൊമോട്ടര്‍മാര്‍ അറിയിച്ചു. പാശ്ചാത്യരാജ്യങ്ങളില്‍ സുപരിചിതമായ ലോണ്‍ഡ്രി റെന്റല്‍ സേവനങ്ങള്‍ക്കും രാജ്യത്താദ്യമായി മാഗ്നാമൈന്‍ഡ് തുടക്കമിടും. ആദ്യഘട്ടത്തില്‍ത്തന്നെ കൊച്ചി, തൃശൂര്‍ നഗരങ്ങളില്‍ കളക്ഷന്‍ കേന്ദ്രങ്ങള്‍ തുറന്നുകൊണ്ട് റീടെയ്ല്‍ ഡിവിഷനും കമ്പനി ആരംഭിച്ചിട്ടുണ്ട്.
ലിനന്‍ ലൗഞ്ച്, സെന്‍ട്രലിം, അല്യൂര്‍ എന്നിവയാണ് മാഗ്നാമൈന്‍ഡിന്റെ മൂന്ന് ഡിവിഷനുകള്‍. ഹോട്ടലുകളിലെ ബെഡ്, ബാത്ത്, എഫ്&ബി, യൂണിഫോം; കോര്‍പ്പറേറ്റ് കമ്പനികളുടെ യൂണിഫോം; കണ്‍വെന്‍ഷന്‍ സെന്ററുകളില്‍ നിന്നുള്ള ബാങ്ക്വെറ്റ് ലിനന്‍; റെയില്‍വേയില്‍ നിന്നുള്ള ബെഡ്, ബാത്ത് ലിനന്‍; എയര്‍ലൈനുകളുടെ പുതപ്പുകള്‍, സീറ്റ് കവറുകള്‍ തുടങ്ങിയവ അലക്കിത്തേയ്‌ക്കുന്ന മുഖ്യലോണ്‍ഡ്രി സേവനങ്ങളാണ് ലിനന്‍ ലൗഞ്ച് നല്‍കുക. സെന്‍ട്രലിമാണ് ഹോട്ടലുകള്‍ക്കാവശ്യമായ തുണിത്തരങ്ങള്‍ വാടകയ്‌ക്കു നല്‍കുന്ന സേവനത്തിന് രാജ്യത്ത് തുടക്കം കുറിക്കുക.
നഗരങ്ങളിലും പട്ടണങ്ങളിലും വിന്യസിക്കുന്ന കളക്ഷന്‍ സെന്ററുകളിലൂടെ നടത്തുന്ന റീടെയ്ല്‍ പ്രവര്‍ത്തനങ്ങളാണ് അല്യൂര്‍ എന്ന ഡിവിഷനുണ്ടാവുക.
പ്രതികരിക്കാൻ ഇവിടെ എഴുതുക: