കോട്ടയം: കേന്ദ്രഖാദി ഗ്രാമവ്യവസായ കമ്മീഷന്റെ നിയന്ത്രണത്തില് പ്രവര്ത്തിക്കുന്ന ആലപ്പുഴ സര്വ്വോദയ സംഘത്തിന്റെ ആഭിമുഖ്യത്തില് കോട്ടയത്ത് നാഷണല് ഖാദി എക്സ്പോ 2014 നടത്തുന്നു. ഇന്ന് മാമ്മന്മാപ്പിള ഹാളില് ആരംഭിക്കുന്ന ഖാദി ഗ്രാമവ്യവസായ പ്രദര്ശന വില്പനമേള എട്ട് വരെ നീണ്ടുനില്ക്കും.
തമിഴ്നാട്, കര്ണ്ണാടക, രാജസ്ഥാന് പശ്ചിമബംഗാള് തുടങ്ങിയ സംസ്ഥാനങ്ങളിലെ മികച്ചതരം ഖാദി ഉല്പ്പന്നങ്ങള് മേളയില് ഒരുക്കിയിട്ടുണ്ടെന്ന് സര്വോദയസംഘം സെക്രട്ടറി വി.ഡി സുരേന്ദ്രന് നായര് പത്രസമ്മേളനത്തില് പറഞ്ഞു.
പശ്ചിമബംഗാള് സില്ക്ക്, രാജസ്ഥാന് കര്ണ്ണാട സംസ്ഥാനങ്ങളിലെ കരകൗശല ഉല്പ്പന്നങ്ങള്, ഗ്രാമവ്യവസായ ഉല്പ്പന്നങ്ങള് എന്നിവയുടെ സ്റ്റാളുകള് എക്സ്പോയുടെ പ്രത്യേകതയാവും. ഖാദി ഗ്രാമവ്യവസായകമ്മീഷന്റെ പദ്ധതിയായ റൂറല് എംപ്ലോയിമെന്റ് ജനറേഷന് പ്രോഗ്രാമില് ആരംഭിച്ചിട്ടുള്ള ചെറുകിട വ്യവസായസ്ഥാപനങ്ങളില് നിന്നുള്ള ആയുര്വേദ ഉല്പ്പന്നങ്ങള്, ചൂരല് ഉല്പ്പന്നങ്ങള്, വൈരക്കല്ലില് നിര്മ്മിച്ചിട്ടുള്ള ആഭരണങ്ങള്, ആറന്മുള കണ്ണാടി, തുകല്, കയര് ഉല്പ്പന്നങ്ങള്, മുളയിലും നാരിലും തീര്ത്ത കരകൗശല വസ്തുക്കള്, ഇല്വിന്, പഞ്ഞിമെത്ത, തലയിണ, കുഷ്യന് തുടങ്ങിയഗ്രാമവ്യവസായ പരമ്പരാഗത ഉല്പ്പന്നങ്ങള് അടങ്ങിയ സ്റ്റാളുകളും കോട്ടന്, ഖാദി മസ്ലീന് ഖാദി സില്ക്ക് തുണിത്തരങ്ങളിലുള്ള റെഡിമെയ്ഡ് വസ്ത്രങ്ങളുടെ ശേഖരവും എക്സ്പോയിലുണ്ടാകും. ഖാദി ഗ്രാമവ്യവസായ ഉല്പ്പാദനപ്രക്രിയ വിവരിക്കുന്ന തീം പവലിയനും സജ്ജമാക്കുന്നുണ്ട്. മേളയോടനുബന്ധിച്ച് 30% വരെ ഗവണ്മെന്റ് റിബേറ്റ് ലഭ്യമാണ്.ഇന്ന് വൈകിട്ട് 3.30 ന് മാമ്മന്മാപ്പിളഹാളില് ചേരുന്ന സമ്മേളനത്തില് വച്ച് ഖാദി എക്സ്പോയുടെ ഉദ്ഘാടനം തിരുവഞ്ചൂര് രാധാകൃഷ്ണന് നിര്വ്വഹിക്കും. മുനിസിപ്പല് ചെയര്മാന് എം.പി സന്തോഷ്കുമാര് അധ്യക്ഷതവഹിക്കുന്ന യോഗത്തില് രാജം ജി. നായര് (ഡപ്യൂട്ടിചെയര്പേഴ്സണ്) ഖാദി കമ്മീഷന് സ്റ്റേറ്റ് ഡയറക്ടര് കെ.പി ലളിതാമണി, ഖാദി ബോര്ഡ് സെക്രട്ടറി പി.ടി തോമസ് തുടങ്ങിയവര് പങ്കെടുക്കും.
പ്രതികരിക്കാൻ ഇവിടെ എഴുതുക: