രാജ്കോട്ട്‌: മടങ്ങിവരവില്‍ യുവരാജ്‌ സിംഗ്‌ ഇന്ത്യയുടെ വിജയശില്‍പി. ഓസ്ട്രേലിയക്കെതിരെ നടന്ന ഏക ട്വന്റി 20 മത്സരത്തിലാണ്‌ യുവരാജ്‌ ഇന്ത്യയെ വിജയത്തിലേക്ക്‌ നയിച്ചത്‌. എട്ട്‌ മാസത്തെ ഇടവേളക്കുശേഷം ദേശീയ ടീമില്‍ തിരിച്ചെത്തിയ യുവരാജിന്റെ ബാറ്റില്‍ നിന്ന്‌ ബൗണ്ടറികളും സിക്സറുകളും അനര്‍ഗളം പ്രവഹിച്ചു. എട്ട്‌ ബൗണ്ടറികളും അഞ്ച് കൂറ്റന്‍ സിക്സറുകളും പറത്തിയ യുവരാജ്‌ 35 പന്തില്‍ നിന്ന്‌ പുറത്താകാതെ 77 റണ്‍സാണെടുത്തത്‌. ആദ്യം ബാറ്റ്‌ ചെയ്ത ഓസ്ട്രേലിയ 20 ഓവറില്‍ ഏഴുവിക്കറ്റിന്‌ 201 റണ്‍സ്‌ അടിച്ചുകൂട്ടി. മറുപടി ബാറ്റിംഗിനിറങ്ങിയ ഇറങ്ങിയ ഇന്ത്യ 19.4 ഓവറില്‍ നാല്‌ വിക്കറ്റ്‌ നഷ്ടത്തില്‍ ലക്ഷ്യം കണ്ടു.
കാന്‍സറില്‍നിന്ന്‌ മോചിതനായശേഷം അന്താരാഷ്‌ട്ര ക്രിക്കറ്റിലെത്തിയ യുവിക്ക്‌ ആദ്യവട്ടം വിജയിക്കാനായില്ല. എന്നാല്‍, രണ്ടാംവരവ്‌ തികച്ചും വ്യത്യസ്തമായിരുന്നു. യുവി ഏതാണ്ട്‌ ഒറ്റക്കുതന്നെയാണ്‌ മത്സരം ജയിപ്പിച്ചതെന്ന്‌ പറയാം.
യുവിയാണ്‌ മാന്‍ ഓഫ്‌ ദ മാച്ചും. 21 പന്തില്‍ 24 റണ്‍സ്‌ നേടി പുറത്താകാതെനിന്ന ധോണിയും യുവിക്കു മികച്ച പിന്തുണ നല്‍കി. ഇരുവരും ചേര്‍ന്നുള്ള അഞ്ചാം വിക്കറ്റ്‌ കൂട്ടുകെട്ടില്‍ 102 റണ്‍സാണ്‌ പിറന്നത്‌. 8.3 ഓവറില്‍ ഇന്ത്യ മൂന്നിന്‌ 80 റണ്‍സ്‌എന്ന നിലയില്‍ തകര്‍ച്ചയെ നേരിട്ടപ്പോഴായിരുന്നു രക്ഷകന്റെ വേഷത്തില്‍ യുവി അവതരിച്ചത്‌. 32 റണ്‍സെടുത്ത ശിഖര്‍ ധവാന്‍ മൂന്നാമനായി പുറത്തായശേഷം യുവി ക്രീസിലെത്തുമ്പോള്‍ ഇന്ത്യക്ക്‌ ഒരോവറില്‍ 12 റണ്‍സ്‌ എന്നനിലയില്‍ വേണമായിരുന്നു ഇന്ത്യക്കു ജയിക്കാന്‍. സ്കോര്‍ 100-ല്‍ എത്തിയപ്പോള്‍ വിരാട്‌ കോഹ്ലിയും മടങ്ങി. പിന്നീട്‌ ക്യാപ്റ്റന്‍ ധോണിയെ കൂട്ടുപിടിച്ച്‌ യുവി കത്തിക്കയറിയതോടെ മത്സരം ഇന്ത്യക്ക്‌ അനുകൂലമായി. അഞ്ചാം വിക്കറ്റില്‍ 102 റണ്‍സാണ്‌ ഇരുവരും കൂട്ടിച്ചേര്‍ത്തത്‌. ഇതില്‍ 24 റണ്‍സ്‌ മാത്രമാണ്‌ ധോണിയുടെ സംഭാവന.
നേരത്തെ ടോസ്‌ നേടിയ ഇന്ത്യ ഓസീസിനെ ബാറ്റിംഗിയച്ചു. ആദ്യം ബാറ്റിംഗിനിറങ്ങിയ ഓസീസ്‌ 52 പന്തില്‍ 89 റണ്‍സ്‌ നേടിയ ഓപ്പണര്‍ ആരോണ്‍ ഫിഞ്ചിന്റെ മികവിലാണ്‌ 201 റണ്‍സെടുത്തത്‌. മാഡിന്‍സണ്‍ 34 റണ്‍സും മാക്സ്‌വെല്‍ 27 ഉം റണ്‍സ്‌ നേടി.
ഇന്ത്യക്കുവേണ്ടി ഭുവനേശ്വര്‍ കുമാറും വിനയ്കുമാറും മൂന്നു വിക്കറ്റ്‌ വീതം നേടി. ഇന്ത്യ ഓസീസ്‌ ഏകദിന പരമ്പരയിലെ ആദ്യ ഏകദിനം 13ന്‌ പൂനയില്‍ നടക്കും. പരമ്പരയില്‍ ഏഴ് മത്സരങ്ങളാണുള്ളത്‌.
പ്രതികരിക്കാൻ ഇവിടെ എഴുതുക: