കോട്ടയം: കോട്ടയം, ആലപ്പുഴ, പത്തനംതിട്ട ജില്ലകള് ഉള്പ്പെടുന്ന ലയണ്സ് ഡിസ്ട്രിക്ട് 318 ബിയുടെ പ്രഥമ കണ്വന്ഷന് മാമന്മാപ്പിള ഹാളില് 21ന്ന് നടക്കുമെന്ന് സംഘാടകര് പത്രസമ്മേളനത്തില് അറിയിച്ചു. രാവിലെ 11ന് ഡിസ്ട്രിക്ട് ഗവര്ണര് എന്.ധര്മ്മരാജന്റെ അദ്ധ്യക്ഷതയില് ചേരുന്ന സമ്മേളനത്തില് മുന് ഇന്റര്നാഷണല് ഡയറക്ടര് കെ.ജി.രാമകൃഷ്ണമൂര്ത്തി ഉദ്ഘാടനം നിര്വ്വഹിക്കും. ആഭ്യന്തര മന്ത്രി തിരുവഞ്ചൂര് രാധാകൃഷ്ണന്, ദേവസ്വം ബോര്ഡ് പ്രസിഡന്റ് അഡ്വ.എം.പി.ഗോവിന്ദന്നായര്, വ്യവസായി ബോബി ചെമ്മണ്ണൂര്, ജില്ലാ കളക്ടര് മിനി ആന്റണി, ഹൃദ്രോഗ വിദഗ്ദ്ധന് ഡോ.അബ്ദുള് ഖാദര്, പാലാ മരിയസദന് മാനേജിംഗ് ട്രസ്റ്റി സന്തോഷ് ജോസഫ് എന്നിവരെ ചടങ്ങില് ആദരിക്കും. അന്പത് അന്ധരായ ലോട്ടറി ഏജന്റുമാര്ക്ക് മിനി യുഎസ്ബി പ്ലെയര് ലൗഡ്സ്പീക്കര് സിസ്റ്റം ചടങ്ങില് കൈമാറും. പുതിയ സെക്കന്റ് വൈസ് ഡിസ്ട്രിക്ട് ഗവര്ണറുടെ തെരഞ്ഞെടുപ്പ് ഉച്ചകഴിഞ്ഞ് നടക്കും.
മൂന്നു ജില്ലകളിലായി 102 ക്ലബ്ബുകളും 3584 അംഗങ്ങളും അടങ്ങുന്നതാണ് ലയണ്സ് ഡിസ്ട്രിക്ട്. ഹൃദയങ്ങളെ സ്പര്ശിക്കുക എന്ന പ്രവര്ത്തന വര്ഷ പ്രോജക്ടിലൂടെ നിരാലംബരായ 113 വിധവകള്ക്ക് തയ്യല് മെഷീനുകള്, ഓട്ടോറിക്ഷ ഡ്രൈവര്മാര്, കഠിനജോലികളില് ഏര്പ്പെട്ടിരിക്കുന്നവര് എന്നിവര്ക്ക് എണ്ണായിരത്തിലധികം ഇന്ഷ്വറന്സ് പോളിസികള്, ഭവനരഹിതര്ക്ക് ഭവനങ്ങള്, വെയിറ്റിംഗ് ഷെഡുകള്, സൗജന്യ മെഡിക്കല് ക്യാമ്പുകള്, ശുചീകരണ പ്രവര്ത്തനങ്ങള്, മാലിന്യ നിര്മാര്ജ്ജന പദ്ധതികള്, ചെലവുകുറഞ്ഞ ബയോഗ്യാസ് പ്ലാന്റുകള്, വിദ്യാര്ത്ഥികള്ക്കായി വിവിധ ബോധവത്കരണ പരിപാടികള്, രോഗികള്ക്കായി വീല്ചെയര് വിതരണം തുടങ്ങിയ പ്രോജക്ടുകള് നടപ്പാക്കുന്നതിനായി ഡിസ്ട്രിക്ടിലെ 102 ക്ലബ്ബുകള് വഴി ഒന്നരക്കോടിയോളം രൂപ ചെലവഴിച്ചതായി ഡിസ്ട്രിക്ട് ഗവര്ണര് എന്.ധര്മരാജന് അറിയിച്ചു.
പത്രസമ്മേളനത്തില് ട്രഷറര് വി.എം.മാത്യു, കണ്വന്ഷന് ജനറല് കണ്വീനര് എം.പി.രമേശ്കുമാര്, ഡിസ്ട്രിക്ട് പിആര്ഒ മാത്യു കൊല്ലമലക്കരോട്ട്, മുന് ഗവര്ണര് രാജന് ദാനിയേല് എന്നിവരും പങ്കെടുത്തു.
പ്രതികരിക്കാൻ ഇവിടെ എഴുതുക: