ബാങ്കോക്ക്: തായ്ലന്ഡിലെ ബാങ്കോക്കില് നടന്ന വേള്ഡ് ആര്ച്ചറി പാരാ സീരീസില് അവിസ്മരണീയ പ്രകടനവുമായി ഭാരതത്തിന്റെ പാരാ അമ്പെയ്ത്ത് താരങ്ങള്. ഏഴ് സ്വര്ണവും അഞ്ച് വെള്ളിയും നാല് വെങ്കലവുമടക്കം ആകെ 16 മെഡലുകള് വാരിക്കൂട്ടിയാണ് ഭാരതം ടൂര്ണമെന്റില് ചരിത്രവിജയം കുറിച്ചത്. ലോക ഒന്നാം നമ്പര് താരത്തെ അട്ടിമറിച്ച് പതിനെട്ടുകാരിയായ പായല് നാഗ് നേടിയ സ്വര്ണനേട്ടവും പുരുഷവനിതാ വിഭാഗങ്ങളിലെ മികച്ച പോരാട്ടങ്ങളും ഭാരതത്തിന്റെ മുന്നേറ്റത്തിന് മാറ്റ് കൂട്ടി.
പായല് നാഗിന് സ്വര്ണം
വനിതകളുടെ കോമ്പൗണ്ട് വിഭാഗം ഫൈനലില് ലോക ഒന്നാം നമ്പര് താരവും ഭാരതത്തിന്റെ തന്നെ അഭിമാനവുമായ ശീതള് ദേവിയെ അട്ടിമറിച്ചാണ് കൗമാരതാരം പായല് നാഗ് സ്വര്ണം സ്വന്തമാക്കിയത്. നാല് അവയവങ്ങളും നഷ്ടപ്പെട്ട 18 വയസ്സുകാരിയായ പായല്, അതിശക്തമായ പോരാട്ടത്തിനൊടുവില് 139136 എന്ന സ്കോറിനാണ് ശീതളിനെ പരാജയപ്പെടുത്തിയത്. ഇതോടെ ഈ ഇനത്തില് ശീതള് ദേവി വെള്ളി മെഡല് നേടി.
തോമന് കുമാറിനും ഭാവനയ്ക്കും സ്വര്ണത്തിളക്കം
പുരുഷന്മാരുടെ കോമ്പൗണ്ട് വ്യക്തിഗത വിഭാഗത്തില് ഭാരതത്തിന്റെ തോമന് കുമാര് സ്വര്ണത്തിലേക്ക് അമ്പെയ്തു കയറി. ഫൈനല് പോരാട്ടത്തില് ഓസ്ട്രേലിയന് താരം ജോനാഥന് മില്നെയെ 146-142 എന്ന സ്കോറിന് തോല്പ്പിച്ചാണ് തോമന് സുവര്ണനേട്ടം കൈവരിച്ചത്.
വനിതകളുടെ റിക്കര്വ് വിഭാഗത്തില് ഭാരതത്തിന്റെ ഭാവന സമ്പൂര്ണ ആധിപത്യത്തോടെ കിരീടം ചൂടി. ഫൈനല് പോരാട്ടത്തില് തായ്ലന്ഡ് താരം ഫത്താറാഫോണ് പട്ടവായോയെ ഒന്നിനെതിരെ ആറ് പോയിന്റുകള്ക്ക് (60) നിഷ്പ്രഭമാക്കിയാണ് ഭാവന സ്വര്ണം നേടിയത്.
ഹര്വീന്ദര് സിങ്ങിനും സ്വാതി ചൗധരിക്കും വെള്ളി
ഇരട്ട പാരാലിമ്പിക്സ് മെഡല് ജേതാവായ ഭാരതത്തിന്റെ ഹര്വീന്ദര് സിങ്ങിന് ഫൈനലില് വെള്ളി മെഡല് കൊണ്ട് തൃപ്തിപ്പെടേണ്ടി വന്നു. പുരുഷ റിക്കര്വ് ഫൈനലില് ഇന്തോനേഷ്യന് താരം ഖോലിദിനോട് 37 എന്ന സ്കോറിനാണ് ഹര്വീന്ദര് പരാജയപ്പെട്ടത്.
വനിതകളുടെ ഡബ്ല്യു1 വിഭാഗം സ്വര്ണ മെഡല് മത്സരത്തില് ഭാരതത്തിന്റെ സ്വാതി ചൗധരിയും വെള്ളി മെഡല് നേടി. ഫൈനലില് ദക്ഷിണ കൊറിയയുടെ ഒക് ഗ്യം കിമ്മിനോട് 37 എന്ന നിലയിലാണ് സ്വാതി പരാജയം വഴങ്ങിയത്.
വെങ്കലപ്പോരാട്ടത്തില് ശ്യാം സുന്ദര് സ്വാമിക്ക് വിജയം
പുരുഷന്മാരുടെ കോമ്പൗണ്ട് വ്യക്തിഗത ഇനത്തിലെ വെങ്കല മെഡലിനായുള്ള പ്ലേഓഫ് മത്സരം രണ്ട് ഭാരത താരങ്ങള് തമ്മിലുള്ള കടുത്ത പോരാട്ടത്തിനാണ് വേദിയായത്. പാരീസ് പാരാലിമ്പിക്സ് വെങ്കല മെഡല് ജേതാവായ രാകേഷ് കുമാറിനെ ഇഞ്ചോടിഞ്ച് പോരാട്ടത്തില് മറികടന്ന് ഭാരതത്തിന്റെ ശ്യാം സുന്ദര് സ്വാമി വെങ്കലം സ്വന്തമാക്കി. ഇതോടെ രാകേഷ് കുമാറിന് നാലാം സ്ഥാനം കൊണ്ട് തൃപ്തിപ്പെടേണ്ടി വന്നു.
രാജ്യാന്തര പാരാ അമ്പെയ്ത്ത് വേദിയില് ഭാരതത്തിന്റെ കായിക കരുത്തും ആത്മവിശ്വാസവും തെളിയിക്കുന്ന ഒന്നായി ബാങ്കോക്കിലെ ഈ 16 മെഡല് നേട്ടം മാറി.
