ജോലി ചെയ്ത് ക്ഷീണിച്ച് ഇരിക്കുമ്പോൾ ചിലരെങ്കിലും കൈയിലെയും കാലിലെയുമൊക്കെ ഞൊട്ട ഒടിച്ച് വിടാറുണ്ട്. വെറുതെ ഒരു തമാശയ്‌ക്ക് ചെയ്യുന്നതാണെങ്കിലും തുടർച്ചയായി കൈകളിലെ ഞൊട്ട വിടുന്നത് സന്ധിവാതത്തിന് കാരണമാകും എന്ന് പറയാറുണ്ട്. ഇതിൽ എന്തെങ്കിലും സത്യമുണ്ടോ എന്നറിയാം
വിരലുകളിലെ ഞൊട്ട ഒടിക്കുമ്പോൾ ശബ്ദം കേൾക്കുന്നതിന് പിന്നിൽ ഒരു കാരണമുണ്ട്. രണ്ട് എല്ലുകൾ ചേർന്നാണ് ഒരു ജോയിൻ്റ് ഉണ്ടാകുന്നത്. ഈ എല്ലുകൾക്കിടയിൽ സൈനോവിൽ ഫ്ലൂയിഡ് അടങ്ങിയിട്ടുണ്ട്. ജോയിൻ്റിൽ ഉണ്ടാകുന്ന നീർക്കെട്ട് മാറ്റാൻ, അതുപോലെ ഊർജ്ജം നൽകാനും ബാക്ടീരിയകളെ തുരത്താനുമാണ് ഈ ഫ്ലൂയിഡ് ഉപയോഗിക്കുന്നത്. സന്ധികൾക്കിടയിൽ തങ്ങി നിൽക്കുന്ന വായു കുമിളകളാണ് പൊട്ടുമ്പോഴാണ് ഇത്തരത്തിൽ ശബ്ദം കേൾക്കുന്നത്. ഇത് സന്ധികൾക്കുള്ളിലെ പ്രഷറിന് മാറ്റം വരുത്തുകയും സിനോവിയൽ ഫ്ലൂയിഡിലടങ്ങിയ വാതകങ്ങളെ ബാധിക്കുകയും ചെയ്യും.
ഈ ശബ്ദം എല്ലുകൾ തമ്മിൽ ഉരസുന്നതോ പൊട്ടുന്നതോ അല്ല.ന്ധികൾക്കിടയിൽ നിന്നുണ്ടാകുന്ന ഞൊട്ടയുടെ ശബ്ദം ഉച്ചത്തിലുള്ളതാണ്. സന്ധികൾക്കിടയിലുണ്ടാകുന്ന മാറ്റം വളരെ പെട്ടെന്നാണ് എന്നതാകാം ഇതിന് കാരണം. അൾട്രാസൗണ്ട് ഉപയോഗിച്ച് ശാസ്ത്രജ്ഞർ ഇത് മനസ്സിലാക്കാൻ ശ്രമിച്ചപ്പോൾ വളരെ പെട്ടെന്ന് സന്ധികൾക്കിടയിൽ മാറ്റം ഉണ്ടാവുകയും അപ്പോൾത്തന്നെ ശബ്ദം ഉണ്ടാകുന്നതായും കണ്ടു.
മിക്കവരും വല്ലപ്പോഴും സാവധാനത്തിൽ ഞൊട്ടവിടുന്നത് ദോഷകരമല്ല. പ്രത്യേകിച്ചും വേദനയോ വീക്കമോ മറ്റ് ലക്ഷണങ്ങളോ ഒന്നും ഇല്ലെങ്കിൽ ഇത് അപകടകരമല്ല. വല്ലപ്പോഴും ഞൊട്ട വിടുന്നത് ഓസ്റ്റിയോ ആർത്രൈറ്റിസിനു കാരണമാകും എന്ന് തെളിയിക്കുന്ന പഠനങ്ങളൊന്നും ഇതുവരെ വന്നിട്ടില്ല. ഓസ്റ്റിയോ ആർത്രൈറ്റിസ്, സന്ധികളുമായി ബന്ധപ്പെട്ടരോഗമായതുകൊണ്ടു തന്നെ ഇത് പ്രധാനമാണ്.
സന്ധികൾക്കുള്ളിൽ തരുണാസ്ഥികൾക്കും മറ്റ് കലകൾക്കും പെട്ടെന്ന് മാറ്റം വരുമ്പോൾ വേദനയുണ്ടാകാം. ഞൊട്ടവിടാത്ത ആളുകളുമായി താരതമ്യപ്പെടുത്തുമ്പോൾ ഞൊട്ട വിടുന്നത് ശീലമാക്കിയവരിൽ ഓസ്റ്റിയോ ആർത്രൈറ്റിസ് വരാനുള്ള സാധ്യത കൂടുതലാണെന്നത് തെളിയിക്കാനും പഠനങ്ങൾക്കായിട്ടില്ല.
