കളമശ്ശേരി: 51-ാമത് കേരള സംസ്ഥാന സബ് ജൂനിയര്‍ ബാസ്‌കറ്റ്ബോള്‍ ചാമ്പ്യന്‍ഷിപ്പില്‍ കോഴിക്കോട് ആണ്‍കുട്ടികളുടെ വിഭാഗത്തിലും, ആതിഥേയരായ എറണാകുളം പെണ്‍കുട്ടികളുടെ വിഭാഗത്തിലും കിരീടം ചൂടി. ആവേശകരമായ പെണ്‍കുട്ടികളുടെ ഫൈനലില്‍ എറണാകുളം ആലപ്പുഴയെ കീഴ്പ്പെടുത്തി, സ്‌കോര്‍ 60-46. ആണ്‍കുട്ടികളുടെ കിരീടപ്പോരാട്ടത്തില്‍ കോഴിക്കോട് കോട്ടയത്തെ പരാജയപ്പെടുത്തി സ്‌കോര്‍: 64-41.
മൂന്നാം സ്ഥാനത്തിനായുള്ള മത്സരങ്ങളില്‍, പെണ്‍കുട്ടികളുടെ വിഭാഗത്തില്‍ തിരുവനന്തപുരം കോഴിക്കോടിനെ നേരിയ വ്യത്യാസത്തില്‍ മറികടന്ന് (3532) വെങ്കലം നേടി. ആണ്‍കുട്ടികളുടെ വിഭാഗത്തില്‍ തൃശൂരിനെ പരാജയപ്പെടുത്തി (5645) എറണാകുളം വെങ്കല മെഡല്‍ സ്വന്തമാക്കി.
ചാമ്പ്യന്‍ഷിപ്പിന്റെ സമാപന ചടങ്ങില്‍ ഫിഷറീസ്-സാമൂഹിക നീതി വകുപ്പ് മന്ത്രി വി. ഇ. അബ്ദുള്‍ ഗഫൂര്‍ സമ്മാനദാനം നിര്‍വഹിച്ചു. എറണാകുളം ജില്ലാ ബാസ്‌കറ്റ്ബോള്‍ അസോസിയേഷന്‍ രക്ഷാധികാരിയും രാജഗിരി പബ്ലിക് സ്‌കൂള്‍ പ്രിന്‍സിപ്പലുമായ റവ. ഫാ. മാര്‍ട്ടിന്‍ മുണ്ടാടന്‍ സി.എം.ഐ, മീരാന്‍ ഫൗണ്ടേഷന്‍ ചെയര്‍മാനും ഈസ്റ്റേണ്‍ ഗ്രൂപ്പ് സി.ഇ.ഒയും കെ.എഫ്.എ പ്രസിഡന്റുമായ നവാസ് മീരാന്‍ എന്നിവര്‍ വിജയികള്‍ക്ക് ട്രോഫികള്‍ കൈമാറി.
