തിരുവനന്തപുരം: കേരളത്തിന്റെ കാര്‍ഷികോത്സവമായ ഓണക്കാലത്ത് നമ്മുടെ നെല്‍നിലങ്ങളുടെ ചരിത്രവും ഐതിഹ്യവും പാരമ്പര്യകഥകളും ആഗോള തലത്തിലേക്ക്.
പാറശ്ശാല മുതല്‍ മഞ്ചേശ്വരംവരെയുള്ള വയലേലകളുടെ അറിയാക്കഥകള്‍ അനാവരണം ചെയ്യുന്ന എസ്. മഹാദേവന്‍ തമ്പിയുടെ നോവലായ നിലം, പാഡിവിസ്‌പെറര്‍ എന്നപേരില്‍ ഇംഗ്ലീഷിലേക്ക് മൊഴിമാറ്റി ലണ്ടനിലെ ലജന്‍ഡ് ടൈംസ് പുറത്തിറക്കി.
ബൃഹദ് നോവല്‍ഗണത്തില്‍ ആഗോളവിഭാഗത്തിലിറക്കിയ പുസ്തകം ഇംഗ്ലീഷിലേക്കു മൊഴി മാറ്റിയത് പ്രശസ്ത വിവര്‍ത്തകയായ രാധിക പി. മേനോനാണ്. കഴിഞ്ഞവര്‍ഷം ടൈംസ് പ്രസിദ്ധീകരിച്ച തമ്പിയുടെ മ്യത്യുസൂത്ര, വിപ്പിംഗ് നീഡില്‍ എന്നീ കൃതികള്‍ ഇംഗ്ലീഷ് വായനക്കാര്‍ക്കിടയില്‍ ശ്രദ്ധിക്കപ്പെട്ടതിനെ തുടര്‍ന്നാണ് പുതിയ നോവലിന്റെ പ്രസിദ്ധീകരണം. ഇതിന്റെ ഏഷ്യന്‍ പതിപ്പ് ന്യൂദല്‍ഹിയിലെ കൊണാറക് പബ്ലിഷേഴ്‌സാണ് പുറത്തിറക്കുന്നത്.
ഓരോ വയലിനും പറയാന്‍ ഓരോ കഥകളുണ്ട്. അങ്ങനെ അനേകം വയലുകള്‍ പറയുന്ന ഒട്ടേറെ കഥകളുടെ മഹാസഞ്ചയമാണ് പാഡിവിസ്പറര്‍. നിലത്തില്‍ നിറയുന്ന ഈ കഥകളും അതിലെ കരുത്തുറ്റ കഥാപാത്രങ്ങളും സൃഷ്ടിക്കുന്ന വിസ്മയ ലോകമാണ് നോവലിലുള്ളത്.
കേരളത്തിന്റെ ഒരു കാലഘട്ടത്തിലെ രാഷ്‌ട്രീയവും അരാഷ്‌ട്രീയവും അടിമത്തവും സ്വാതന്ത്ര്യവും നോവലില്‍ ദര്‍ശിക്കാം. ബ്രിട്ടീഷുകാരുടെ അധിനിവേശവും രാജവാഴ്ചയിലെ വിധേയത്വവും പലതലങ്ങളിലാണ് നോവലില്‍ ആവിഷ്‌ക്കരിക്കുന്നത്. അതുപോലെ അധികാരവും അത്യാര്‍ത്തിയും, പ്രണയവും രതിയും നോവലില്‍ പുതിയ രൂപഭാവങ്ങള്‍ കൈവരിക്കുന്നു. ഗതകാല സംസ്‌കൃതിയും ആധുനിക യാഥാര്‍ത്ഥ്യവും അസാധാരണ ഭാവുകത്വത്തോടെ ഈ രചനയില്‍ ഇഴചേരുന്നുണ്ട്. പ്രമേയത്തിന്റെ പ്രത്യേകത, ആവിഷ്‌കരണത്തിലെ പുതുമ, ഭാഷയുടെ കാവ്യവശ്യത എന്നിവയാണ് പാഡിവിസ്പററുടെ സവിശേഷത. അന്യൂനമായ മൊഴിമാറ്റത്തിലൂടെ ആഗോള അനുവാചകര്‍ക്ക് അത് പകര്‍ന്നുനല്‍കാന്‍ വിവര്‍ത്തകയായ രാധികയ്‌ക്ക് കഴിഞ്ഞിരിക്കുന്നു എന്നാണ് വിലയിരുത്തല്‍.
