ചണ്ഡീഗഢ്: ചണ്ഡീഗഢില്‍ ഭീകരാക്രമണം നടത്താനുള്ള ഖലിസ്ഥാന്‍ ഭീകരരുടെ നീക്കം സൈന്യം തകര്‍ത്തു. നിരോധിത ഭീകര സംഘടനയായ ബബ്ബര്‍ ഖല്‍സ ഇന്റര്‍നാഷണലുമായി ബന്ധമുള്ള മൂന്ന് ഭീകരരെ അറസ്റ്റ് ചെയ്തു. ഇവരില്‍ നിന്ന് അഞ്ച് കിലോ സ്ഫോടക വസ്തുക്കളും (ജെലാറ്റിന്‍ സ്റ്റിക്കുകള്‍), ഡിറ്റണേറ്ററും, റിമോട്ട് വഴി നിയന്ത്രിക്കാവുന്ന ട്രിഗറിങ് സംവിധാനവും, തോക്കും, തിരകളും പോലീസ് പിടിച്ചെടുത്തു.
പഞ്ചാബ് സ്വദേശികളായ ലവ്പ്രീത് സിങ് (19), ജഷന്‍പ്രീത് സിങ് (21), പ്രഭ്പ്രീത് സിങ് (19) എന്നിവരാണ് പിടിയിലായത്. ചണ്ഡീഗഢില്‍ സ്ഫോടനം നടത്തി ഭീതി പടര്‍ത്താനായിരുന്നു ഇവരുടെ ലക്ഷ്യമെന്ന് പ്രാഥമിക അന്വേഷണത്തില്‍ വ്യക്തമായി.
വിദേശത്ത് ഒളിവില്‍ കഴിയുന്ന ബബ്ബര്‍ ഖല്‍സ ഭീകരനായ സത്നാം സിങ് എന്ന സത്ത നൗഷേരയുടെ നിര്‍ദേശപ്രകാരമാണ് ഇവര്‍ ആക്രമണത്തിന് പദ്ധതിയിട്ടത്.
രഹസ്യാന്വേഷണ വിഭാഗത്തിന് ലഭിച്ച വിവരത്തിന്റെ അടിസ്ഥാനത്തില്‍ നടത്തിയ ഓപ്പറേഷനിലാണ് പ്രതികള്‍ പിടിയിലായത്. ഭീകരര്‍ക്ക് സ്ഫോടകവസ്തുക്കളും ആയുധങ്ങളും ലഭിച്ച ഉറവിടത്തെക്കുറിച്ചും, ഇതിന് പിന്നിലെ ഗൂഢാലോചനയെക്കുറിച്ചും പോലീസ് വിശദമായ അന്വേഷണം ആരംഭിച്ചിട്ടുണ്ട്.
എക്‌സ്‌പ്ലോസീവ് സബ്സ്റ്റന്‍സസ് ആക്ട് (സ്ഫോടക വസ്തു നിയമം) പ്രകാരമാണ് ഇവര്‍ക്കെതിരെ കേസെടുത്തിരിക്കുന്നത്.
