മഡ്ഗാവ്: പ്രൈം വോളിബോള്‍ ലീഗിലെ അഞ്ചാം സീസണ്‍ താരലേത്തില്‍ വിലയേറിയ കളിക്കാരനായി ഷമീമുദീന്‍. 20 ലക്ഷം രൂപയ്‌ക്ക് കൊച്ചി ബ്ലൂ സ്പൈക്കേഴ്സാണ് ബ്ലോക്കറെ സ്വന്തമാക്കിയത്. സി കെ മുഹമ്മദ് നിഹാലാണ് ലേലത്തിലെ വിലയേറിയ രണ്ടാമത്ത താരം. 19 ലക്ഷം രൂപയ്‌ക്ക് അഹമ്മദാബാദ് ഡിഫന്‍ഡേഴ്സില്‍ ചേര്‍ന്നു. ഷോണ്‍ ടി ജോണ്‍, ജസ്ജോദ് സിങ് എന്നിവര്‍ 15.5 ലക്ഷം രൂപയ്‌ക്കും വിറ്റുപോയി. പത്ത് ഫ്രാഞ്ചൈസികളും അടുത്ത സീസണിലേക്കുള്ള തയ്യാറെടുപ്പ് ഗംഭീരമാക്കി. യുവതാരങ്ങളുടെ കടന്നുവരവായിരുന്നു താരലേലത്തിന്റെ ഏറ്റവും ശ്രദ്ധേയമായ കാര്യം. ഇൗയിടെ സമാപിച്ച ഗാര്‍ഡിയന്‍സ് ട്രോഫിയില്‍ മികച്ച പ്രകടനം പുറത്തെടുത്ത 11 കളിക്കാര്‍ക്ക് ഇടംപിടിക്കാനായി. ഇതില്‍ 9.5 ലക്ഷം രൂപയ്‌ക്ക് കാലിക്കറ്റ് ഹീറോസില്‍ എത്തിയ യുവ ബ്ലോക്കര്‍ സൂരജ് ചൗധരിയാണ് നേട്ടമുണ്ടാക്കിയത്. കഴിഞ്ഞ നാല് വര്‍ഷമായി പിവിഎല്‍ നടത്തുന്ന ഗ്രാസ്റൂട്ട് വികസന പദ്ധതികളുടെ ആകെത്തുകയാണ് യുവകളിക്കാരുടെ പ്രകടനത്തിലും അതുവഴി ലേലത്തിലെ തെരഞ്ഞെടുപ്പിലും കണ്ടത്.
പുതിയ സീസണില്‍ പത്ത് ടീമുകളള്‍ രണ്ട് പൂളുകളായി വിഭജിക്കും. പൂള്‍ എയില്‍ ബംഗളൂരു ടോര്‍പിഡോസ്, കാലിക്കറ്റ് ഹീറോസ്, അഹമ്മദാബാദ് ഡിഫന്‍ഡേഴ്സ്, ചെന്നൈ ബ്ലിറ്റ്സ്, മുംബൈ മിറ്റേിയോഴ്സ് എന്നീ ടീമുകളാണ്. പൂള്‍ ബിയില്‍ ഗോവ ഗാര്‍ഡിയന്‍സ്, തെലുഗു ബ്ലാക്ഹോക്സ്, ഡല്‍ഹി തൂഫാന്‍സ്, കൊല്‍ക്കത്ത തണ്ടര്‍ബോള്‍ഡ്സ്, കൊച്ചി ബ്ലൂ സ്പൈക്കേഴ്സ് ടീമുകള്‍. അഹമ്മദാബാദ് ഡിഫന്‍ഡേഴ്സ് അഞ്ച് താരങ്ങളെയാണ് ലേലത്തില്‍ സ്വന്തമാക്കിയത്. സി കെ മുഹമ്മദ് നിഹാല്‍ (19 ലക്ഷം), മുഹമ്മദ് ഇക്ബാല്‍ (4), ശിവ ചന്‍ഡേല്‍, ധ്രുവ് ചൗധരി, ആയുഷ് ചൗധരി (3) എന്നിവരെയാണ് ടീമിലേക്ക് എടുത്തത്. നിലവിലെ ജേതാക്കളായ ബംഗളൂരു ടോര്‍പിഡോസ് ലേലത്തില്‍നിന്ന് ആരെയും സ്വന്തമാക്കിയില്ല കിരീടം നേടിയ ടീമിലെ നിലനിര്‍ത്തി. കാലിക്കറ്റ് ഹീറോസ് എട്ട് കളിക്കാരെ കൂടാരത്തിലെത്തിച്ചു. സമീര്‍ ചൗധരി (10 ലക്ഷം) ആണ് വിലയേറിയ രാരം. സൂരജ് ചൗധരി (9.5), ജസ്‌കരണ്‍ സിങ് (9), സാര്‍ഥക് സിങ് ജാഡന്‍ (7.75), അനു ജെയിംസ് (5.5), മഹേന്ദ്ര ധ്രുവേ, സുജിത് (3 ലക്ഷം), റൈറ്റ് ടു മാച്ചിലൂടെ വി ശിവസേനനെയും (5.75) സ്വന്തമാക്കി.
ചെന്നൈ ബ്ലിറ്റ്സ് ഏഴ് കളിക്കാരെ സ്വന്തമാക്കി. ഷോണ്‍ ടി ജോണ്‍ (15.5 ലക്ഷം), കുനാല്‍ ദാസ് (6.25), മുഹമ്മദ് സമൃദ് (4), സോഹം മോറെ, എസ് ശ്രീനാഥ്, എസ് വിഘ്നേഷ്, എസ് സുരേന്ദ്രന്‍ (3 ലക്ഷം വീതം) എന്നിവരാണ് ചെന്നൈയില്‍. ഡല്‍ഹി തൂഫാന്‍സ് അമരീന്ദര്‍പാല്‍ സിങ്ങിനെയും (10) വികാസ് മാനെയും (8) അശോക് വിക്കിയെയും എം വി ലാല്‍സുജനെയും (3) സ്വന്തമാക്കി.
ഗോവ ഗാര്‍ഡിയന്‍സ് രണ്ട് കളിക്കാരെ നേടി. അമന്‍ കുമാര്‍ (5 ലക്ഷം), രജത് കുമാര്‍ (3) എന്നിവരാണ്ടീമില്‍.
കൊച്ചി ബ്ലൂ സ്പൈക്കേഴ്സ് ഏറെ നേട്ടമുണ്ടാക്കി. ഷമീമുദീന്‍ (20 ലക്ഷം), മിന്നുംതാരം അംഗമുത്തു രാമസ്വാമി (9.5 ലക്ഷം), കെ വി ആദിത്, നവീദ് ഖാന്‍, വിശേഷ്, അര്‍ഷക് സിനാന്‍ (3 ലക്ഷം വീതം) എന്നീ ആറ് താരങ്ങളാണ് ലേലത്തില്‍ കൊച്ചിയില്‍ എത്തിയത്. കൊല്‍ക്കത്ത തണ്ടര്‍ബോള്‍ഡ്സ് ആറ് കളിക്കാരെ സ്വന്തമാക്കി. ജസ്ജോദ് സിങ് (15.5 ലക്ഷം) ആണ് വിലയേറിയ താരം. അശോ് ബിഷ്ണോയ്, ആദിത്യ റാണ (5 ലക്ഷം വീതം), യു ജന്‍ഷാദ്, സി വേണു (4 ലക്ഷം), പവന്‍ സിങ് (3 ലക്ഷം). മുംബൈ മിറ്റിയോഴ്സ് പ്രിന്‍സിനെയും (5.5), മൃഥുന്‍ജോയ് മഹന്തയെയും (5) ഒപ്പമെത്തിച്ചു. തെലുഗു ബ്ലാക്ഹോക്സും സജീവമായി ലേലത്തില്‍ പങ്കുകൊണ്ടു. താനിഷ് ചൗധരി (14 ലക്ഷം), വിനിത് കുമാര്‍ (8), പി എ മുഹ്സിന്‍ (5 ലക്ഷം), ബിഎസ് ഹരി പ്രസാദ്,ദീപക് (3) എന്നിവരെത്തി. റൈറ്റ് ടു മാച്ചിലൂടെ നിയാസ് അബ്ദുള്‍ സലാമിനെ (4) നിലനിര്‍ത്തി.
