പത്തനംതിട്ട: കേന്ദ്ര സര്ക്കാര് ജിഎസ്ടി നിരക്ക് കുറച്ചതിനാല് ഭാരത വാഹന വിപണിയില് വന് കുതിപ്പ്. 2026-27 സാമ്പത്തിക വര്ഷത്തിന്റെ ഒന്നാം പാദത്തില് (ഏപ്രില്-ജൂണ്) പാസഞ്ചര് വാഹനങ്ങള് ഉള്പ്പെടെ എല്ലാ വിഭാഗത്തില്പ്പെട്ട വാഹനങ്ങളുടെ വില്പനയിലും വന് വര്ദ്ധനവ് ഉണ്ടായതായി സൊസൈറ്റി ഓഫ് ഇന്ത്യന് ഓട്ടോമൊബൈല് മാനുഫാക്ചറേഴ്സ് പുറത്തുവിട്ട കണക്കില് സൂചിപ്പിക്കുന്നു.
ഈ സാമ്പത്തിക വര്ഷത്തിന്റെ ഒന്നാം പാദത്തില് കമ്പനികളില് നിന്ന് ഡീലര്മാരിലേക്ക് പാസഞ്ചര് വാഹനങ്ങളുടെ വിതരണം മുന് വര്ഷത്തെ അപേക്ഷിച്ച് 25.9 ശതമാനം വര്ദ്ധിച്ചു. ടൂ-വീലര് വിതരണത്തില് 20.3 ശതമാനവും, ത്രീ-വീലര് 29.7 ശതമാനവും വര്ദ്ധനവ് രേഖപ്പെടുത്തിയിട്ടുണ്ട്. കൊമേഴ്സ്യല് വാഹനങ്ങളുടെ വില്പനയില് എക്കാലത്തെയും മികച്ച പ്രകടനമാണ് കാഴ്ചവച്ചത്. ജിഎസ്ടി നിരക്ക് കുറച്ചതാണ് വിപണിയിലെ മുന്നേറ്റത്തിന് പ്രധാന കാരണമായി പറയുന്നതെങ്കിലും കുറഞ്ഞ പലിശ നിരക്കുകളും പുതിയ മോഡലിന്റെ അവതരണവും ശക്തമായ ആഭ്യന്തര ഡിമാന്ഡും വിപണിയുടെ മുന്നേറ്റത്തെ സഹായിച്ചിട്ടുണ്ട്.
ലോകത്തിലെ ഏറ്റവും വലിയ മൂന്നാമത്തെ വാഹന വിപണിയാണ് ഭാരതം. സുസുക്കി, ടാറ്റ മോട്ടോഴ്സ് മഹേന്ദ്ര, ഹുണ്ടായി എന്നീ കമ്പനികളാണ് ജനപ്രിയ മോഡലുകളുമായി മുന്പന്തിയില്. കേന്ദ്ര സര്ക്കാരിന്റെ സബ്സിഡി ലഭിക്കുന്നതിനാല് ഇലക്ട്രിക് വാഹനങ്ങള്ക്കും വന് ഡിമാന്ഡും വളര്ച്ചയും രേഖപ്പെടുത്തിയിട്ടുണ്ട്.
പശ്ചിമേഷ്യയിലെ സംഘര്ഷങ്ങള്ക്കിടയിലും ഭാരതത്തിന്റെ ആഭ്യന്തര വിപണി കരുത്തുകാട്ടുന്നതായും റിപ്പോര്ട്ടുകള് വ്യക്തമാക്കുന്നു. വിപണിയില് മാത്രമല്ല, മുന് വര്ഷത്തെ അപേക്ഷിച്ച് 17 ശതമാനം ഭാരതത്തിന്റെ കയറ്റുമതി വര്ദ്ധിച്ചതായാണ് റിപ്പോര്ട്ടുകള്. പശ്ചിമേഷ്യയിലെ ഭൗമ രാഷ്ട്രീയ സംഭവവികാസങ്ങള് വിതരണ ശൃംഖലക്ക് ഭീഷണി സൃഷ്ടിക്കുന്നുണ്ടെങ്കിലും ഭാരതം സാമ്പത്തിക രംഗത്തും, വാഹന വിതരണ രംഗത്തും സ്ഥിരത നിലനിര്ത്തണമെന്നാണ് സാമ്പത്തിക വിദഗ്ധര് ചൂണ്ടിക്കാണിക്കുന്നത്.
ജന്മഭൂമി ഓണ്ലൈന്