ന്യൂഡൽഹി: വർഷങ്ങളായി ഔദ്യോഗിക പദ്ധതികൾക്കും നയങ്ങൾക്കും ചെയ്യാൻ കഴിയാതിരുന്ന കാര്യമാണ് വെറും 48 മണിക്കൂർ നീണ്ടുനിന്ന മഴയിലൂടെ സാധ്യമായത്. ജൂലൈ 9-ന് ഡൽഹി നിവാസികൾ ശ്വസിച്ചത് സർക്കാർ ഔദ്യോഗികമായി Good എന്ന് സാക്ഷ്യപ്പെടുത്തിയ വായുവാണ്. എന്നാൽ ഇതിലെ ഏറ്റവും പ്രധാനപ്പെട്ട കാര്യം ഇത്തരമൊരു ദിവസം ഡൽഹിയിൽ ഉണ്ടാകുക എന്നത് തികച്ചും അപൂർവ്വമാണ് എന്നതാണ്.
എയർ ക്വാളിറ്റി മാനേജ്മെന്റ് കമ്മീഷന്റെ (CAQM) കണക്കുകൾ പ്രകാരം, ജൂലൈ 9 ഉച്ചയ്ക്ക് ഡൽഹിയിലെ ശരാശരി വായു ഗുണനിലവാര സൂചിക (AQI) 48 ആയി രേഖപ്പെടുത്തി. ഇത് 2026-ലെ ഏറ്റവും കുറഞ്ഞ പ്രതിദിന ശരാശരിയാണ്, ഒപ്പം ഈ വർഷത്തെ ആദ്യത്തെ ‘ഗുഡ് എയർ ഡേ’ (Good air day) കൂടിയാണിത്. ഇതിന് മുൻപ് 2023 സെപ്റ്റംബർ 10-നാണ് ഡൽഹിയിൽ ഇത്രയും മികച്ച വായുനിലവാരം രേഖപ്പെടുത്തിയത്.പൂജ്യം മുതൽ 50 വരെയുള്ള അളവ് ഇന്ത്യയുടെ മാനദണ്ഡപ്രകാരം ഏറ്റവും വൃത്തിയുള്ള വായുവിനെയാണ് സൂചിപ്പിക്കുന്നത്.
ഡൽഹിയിൽ ഇത് വളരെ അപൂർവ്വമായി മാത്രമേ കാണാറുള്ളൂ. ഇത് എത്രത്തോളം അപൂർവ്വമാണെന്ന് മനസ്സിലാക്കാൻ ഒരു കണക്ക് ശ്രദ്ധിച്ചാൽ മതിയാകും: 2026-ൽ ഇതുവരെ കടന്നുപോയ ഒരു ദിവസം പോലും ലോകാരോഗ്യ സംഘടന (WHO) നിർദ്ദേശിച്ചിട്ടുള്ള സുരക്ഷിതമായ വായുനിലവാര പരിധിക്കുള്ളിൽ വന്നിട്ടില്ല.ലോക വായു ഗുണനിലവാര റിപ്പോർട്ട് അനുസരിച്ച്, 2024-ൽ ലോകത്തിലെ ഏറ്റവും മലിനീകരിക്കപ്പെട്ട തലസ്ഥാന നഗരമായിരുന്നു ഡൽഹി.
അവിടെ ഒരു ക്യൂബിക് മീറ്ററിൽ ശരാശരി 108 മൈക്രോഗ്രാം സൂക്ഷ്മ മലിനീകരണ കണികകൾ ഉണ്ടായിരുന്നു, ഇത് ലോകാരോഗ്യ സംഘടന അനുവദിച്ചിട്ടുള്ള പരമാവധി പരിധിയായ 5 മൈക്രോഗ്രാമിനേക്കാൾ 20 മടങ്ങ് കൂടുതലാണ്.നഗരത്തിന് ഇത്രയും വൃത്തിയുള്ള ഒരു ദിവസം സമ്മാനിച്ചത് ഏതെങ്കിലും തരത്തിലുള്ള ഔദ്യോഗിക നയങ്ങളല്ല, മറിച്ച് ശക്തമായി പെയ്ത മഴയാണ്.ശാസ്ത്രജ്ഞർ ഇതിനെ ‘വെറ്റ് ഡിപ്പോസിഷൻ’ എന്ന് വിളിക്കുന്നു. അതേസമയം, ഇതിലൊരു വിരോധാഭാസമുണ്ട്. ചെറിയൊരു ചാറ്റൽമഴ ഡൽഹിയിലെ വായു ശുദ്ധീകരിക്കില്ലെന്ന് മാത്രമല്ല, അത് വായുനിലവാരം കൂടുതൽ വഷളാക്കുകയും ചെയ്യും
