ഓര്ദോസ്(ചൈന): പ്രഥമ ഏഷ്യന് അണ്ടര്-23 അത്ലറ്റിക്സ് ചാമ്പ്യന്ഷിപ്പിന്റെ ആദ്യദിനത്തില് ഇന്ത്യക്ക് സ്വര്ണത്തിളക്കം. 4-400 മീറ്റര് മിക്സഡ് റിലേയില് ആധികാരിക പ്രകടനം കാഴ്ചവെച്ച ഇന്ത്യന് ടീം സ്വര്ണമെഡല് സ്വന്തമാക്കി. ഇതോടൊപ്പം പുരുഷന്മാരുടെ 5,000 മീറ്റര്, പുരുഷന്മാരുടെ ഡിസ്കസ് ത്രോ, വനിതകളുടെ 3,000 മീറ്റര് സ്റ്റീപ്പിള്ചേസിലും ഇന്ത്യ മെഡലുകള് നേടി.
ആദ്യദിനത്തിലെ പ്രധാന ആകര്ഷണമായ മിക്സഡ് റിലേയില് ഇന്ത്യ 3 മിനിറ്റ് 18.64 സെക്കന്ഡില് ഫിനിഷ് ചെയ്ത് സ്വര്ണം നേടി. 3:18.74 സമയം കുറിച്ച ചൈന വെള്ളിയും 3:25.28 സമയം നേടിയ ഫിലിപ്പീന്സ് വെങ്കലവും സ്വന്തമാക്കി. സ്വര്ണമെഡല് നേടിയ ഇന്ത്യന് റിലേ ടീമില് അസ്തിക് പ്രധാന്, സാന്ദ്രമോള് സാബു, സേതു മിശ്ര, ശ്രാവണി സച്ചിന് സാംഗ്ലെ എന്നിവര് അംഗങ്ങളായിരുന്നു.
പുരുഷന്മാരുടെ 5,000 മീറ്ററില് ശിവാജി പരശുറാം വെള്ളിയും വിനോദ് സിങ് വെങ്കലവും നേടി മികച്ച പ്രകടനം കാഴ്ചവെച്ചു. ശിവാജി 14 മിനിറ്റ് 08.19 സെക്കന്ഡിലാണ് ഫിനിഷ് ചെയ്തത്. വിനോദ് സിങ്ങിന്റെ സമയം 14 മിനിറ്റ് 23.57 സെക്കന്ഡായിരുന്നു.
വനിതകളുടെ 3,000 മീറ്റര് സ്റ്റീപ്പിള്ചേസില് ഇന്ത്യയുടെ പ്രാചി അങ്കുഷ് ദേവ്കര് 10 മിനിറ്റ് 32.69 സെക്കന്ഡ് സമയം കുറിച്ച് വെങ്കലമെഡല് നേടി.
