തിരുവനന്തപുരം: പിഎസ്സിയിലെ പരീക്ഷാ ക്രമക്കേടില് ആഭ്യന്തര അന്വേഷണം അട്ടിമറിച്ചു. ആഭ്യന്തര വിജിലന്സ് എസ്പി അന്വേഷിക്കുമെന്ന പ്രഖ്യാപനം അട്ടിമറിച്ച് പിഎസ്സി ചെയര്മാന് എം.ആര്. ബൈജു.
പരീക്ഷാ ക്രമക്കേടിലെ അന്വേഷണം ആരോപണവിധേയയായ പരീക്ഷാ കണ്ട്രോളര്ക്ക് തന്നെ കൈമാറി. ആസൂത്രണ ബോര്ഡിലെ മൂന്ന് ഉന്നത തസ്തികകളിലേക്ക് പിഎസ്സി നടത്തിയ പരീക്ഷയില് 10 ചോദ്യങ്ങള് മൂല്യനിര്ണയം നടത്താതെ ഇടത് സംഘടനാ നേതാവിന് ഒന്നാം റാങ്ക് നല്കി നിയമിക്കുകയായിരുന്നു. ഈ തട്ടിപ്പ് പുറത്തായതോടെയാണ് കഴിഞ്ഞ തിങ്കളാഴ്ച ചേര്ന്ന പിഎസ്സി യോഗത്തില് റാങ്ക് പട്ടിക റദ്ദാക്കി പുനര്മൂല്യനിര്ണയവും ആഭ്യന്തര അന്വേഷണവും പ്രഖ്യാപിച്ചത്. ആഭ്യന്തര വിജിലന്സ് എസ്പി അന്വേഷിക്കുമെന്ന് പിഎസ്സി വാര്ത്താക്കുറിപ്പും ഇറക്കി.
10 ചോദ്യങ്ങള് മൂല്യനിര്ണയം നടത്താതെ റാങ്ക് പട്ടിക പ്രസിദ്ധീകരിച്ചതില് പരീക്ഷാ കണ്ട്രോളര്ക്ക് ഗുരുതര വീഴ്ച സംഭവിച്ചെന്ന് പൊതുവെ വിലയിരുത്തലുണ്ട്. എന്നാല് കഴിഞ്ഞ ദിവസം ആഭ്യന്തര അന്വേഷണത്തിന്റെ ചുമതല കുറ്റാരോപിതയായ പരീക്ഷാ കണ്ട്രോളറെ തന്നെ ചെയര്മാന് ഏല്പിക്കുകയായിരുന്നു. പിഎസ്സിയുടെ ഇന്റേണല് വിജിലന്സ് ആന്ഡ് സെക്യൂരിറ്റി ഓഫീസര്കൂടിയായ ബിനി കെ. എബ്രഹാമിന് അന്വേഷണ ചുമതല കൈമാറി പിഎസ്സി ചെയര്മാന് ഉത്തരവിറക്കി. വിജിലന്സ് എസ്പി സിനി എഫ്. ഡെന്നീസിന്റെ നേതൃത്വത്തിലുള്ള അന്വേഷണം അവസാനിപ്പിച്ചാണ് തുടരന്വേഷണം പരീക്ഷാ കണ്ട്രോളര്ക്ക് കൈമാറിയത്. ഇതോടെ പിഎസ്സി അംഗങ്ങള്ക്കിടയില് വലിയ അമര്ഷം ഉയര്ന്നിട്ടുണ്ട്. അതേസമയം പിഎസ്സിയിലെ ക്രമക്കേട് അന്വേഷണം സംബന്ധിച്ച് സര്ക്കാര് നിയമോപദേശം തേടിയിട്ടുണ്ട്.
