കൊച്ചി: ലഹരി എന്ന മാരക വിപത്തില്‍ നിന്ന് ഭാവി തലമുറയെ സംരക്ഷിക്കാന്‍ കേരള സര്‍ക്കാരിന്റെ ‘തൂഫാന്‍’ പദ്ധതി സമൂഹം ഒറ്റക്കെട്ടായി ഏറ്റെടുക്കണമെന്ന് സൗരക്ഷിക സംസ്ഥാന അധ്യക്ഷന്‍ അഡ്വ. ശശിശങ്കര്‍ ആഹ്വാനം ചെയ്തു. ‘സൗരക്ഷിക’ സംസ്ഥാന സമിതിയുടെ ആഭിമുഖ്യത്തില്‍ എറണാകുളത്ത് സംഘടിപ്പിച്ച ലഹരിവിരുദ്ധ സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. ചില ക്ഷുദ്രശക്തികള്‍ മനഃപൂര്‍വം നമ്മുടെ നാടിന്റെ നാളെകളെ ഇല്ലാതാക്കാന്‍ വേണ്ടി ലഹരി വ്യാപനം നടത്തുകയാണെന്നും, ഇതിനെ പ്രതിരോധിക്കാന്‍ സര്‍ക്കാര്‍ സംവിധാനങ്ങള്‍ക്കൊപ്പം പൊതുസമൂഹത്തിന്റെ സജീവ പങ്കാളിത്തം അനിവാര്യമാണെന്നും അദ്ദേഹം ഓര്‍മിപ്പിച്ചു. സംസ്ഥാന ജനറല്‍ സെക്രട്ടറി ജി. സന്തോഷ്‌കുമാര്‍ അധ്യക്ഷത വഹിച്ച ചടങ്ങില്‍, ലഹരിയുടെ വിപത്തിനെതിരെ ഗ്രാമ- നഗര വ്യത്യാസമില്ലാതെ വിപുലമായ ബോധവത്കരണ പരിപാടികള്‍ വരും ദിവസങ്ങളില്‍ സംഘടിപ്പിക്കുമെന്നും അദ്ദേഹം വ്യക്തമാക്കി.
സൗരക്ഷിക സംസ്ഥാന വ്യാപകമായി നടപ്പിലാക്കുന്ന ലഹരിവിരുദ്ധ ബോധവത്കരണ പ്രവര്‍ത്തനങ്ങളുടെ ഭാഗമായുള്ള പ്രത്യേക പരിശീലന മൊഡ്യൂള്‍ ചടങ്ങില്‍ അവതരിപ്പിച്ചു. ഡോ. ശങ്കര്‍ റാം, മനീഷ് ശ്രീകാര്യം എന്നിവര്‍ ചേര്‍ന്നാണ് അദ്ധ്യാപകര്‍ക്കും രക്ഷിതാക്കള്‍ക്കും വിദ്യാര്‍ത്ഥികള്‍ക്കും ഒരുപോലെ പ്രയോജനപ്പെടുന്ന ഈ മൊഡ്യൂള്‍ അവതരിപ്പിച്ചത്. സമൂഹത്തിന്റെ താഴെത്തട്ടിലേക്ക് ലഹരിവിരുദ്ധ സന്ദേശം എത്തിക്കുക എന്ന ലക്ഷ്യത്തോടെ നടന്ന ഈ സെമിനാറില്‍ സംസ്ഥാന സെക്രട്ടറി അഡ്വ. പ്രേംകുമാര്‍ എസ്., ജില്ലാ പ്രസിഡന്റ് വിദ്യാധരമേനോന്‍, സെക്രട്ടറി വി.എന്‍. സന്തോഷ്‌കുമാര്‍ എന്നിവര്‍ ആശംസകള്‍ അര്‍പ്പിച്ചു.
