ലോസ് ആഞ്ചലസ്: അന്താരാഷ്ട്ര ഒളിമ്പിക് കമ്മിറ്റിയും ഐസിസിയും സംയുക്തമായി അടുത്ത ഒളിംപിക്സിലേക്ക് ക്രിക്കറ്റിന്റെ യോഗ്യതാ മനാദണ്ഡങ്ങള് പ്രഖ്യാപിച്ചു. 128 വര്ഷങ്ങള്ക്ക് ശേഷം ക്രിക്കറ്റ് ഒളിംപിക്സിലേക്ക് മടങ്ങിയെത്തുമ്പോള് അതിന്റെ യോഗ്യതാ നിര്ണയം വരുന്ന ഡിസംബറോടെ ഏറെക്കുറെ പൂര്ത്തിയാകും. ട്വന്റി20 ഫോര്മാറ്റായി നടക്കുന്ന ഒളിംപിക്സ് ക്രിക്കറ്റ് മത്സരങ്ങളില് പുരുഷ-വനിതാ വിഭാഗങ്ങളിലായി ആറ് ടീമുകള്ക്ക് വീതം യോഗ്യത നേടാനാകും. പുരുഷ ടീമില് ഐസിസി റാങ്കിനെ അടിസ്ഥാനമാക്കിയും വനിതാ ടീമില് നിലവില് നടന്നുകൊണ്ടിരിക്കുന്ന ടി20 ലോകകപ്പ് പോരാട്ടത്തിലെ പ്രകടനമനുസരിച്ചുമായിരിക്കും യോഗ്യത നിര്ണയിക്കപ്പെടുക.
2026 ഡിസംബര് 31ലെ റാങ്കിംഗ് അനുസരിച്ച് ഏഷ്യയില് ഒന്നാം സ്ഥാനത്ത് എത്തുന്ന ടീമിനാണ് നേരിട്ട് യോഗ്യത ലഭിക്കും. ഏഷ്യ, ആഫ്രിക്ക, യൂറോപ്പ്, ഓഷ്യാനിയ എന്നീ 4 ഭൂഖണ്ഡങ്ങളില് നിന്നും റാങ്കിംഗിലോ ലോകകപ്പിലോ ഏറ്റവും മുന്നിലെത്തുന്ന ഓരോ ടീമുകള്ക്ക് നേരിട്ട് യോഗ്യത ലഭിക്കും. ഒളിമ്പിക്സില് ഏറ്റവും വലിയ തിരിച്ചടി നേരിടുന്നത് വെസ്റ്റ് ഇന്ഡീസിനാണ്. ഒളിംപിക്സ് കമ്മിറ്റി വെസ്റ്റ് ഇന്ഡീസിനെ ഒരൊറ്റ രാജ്യമായി അംഗീകരിക്കുന്നില്ല (ജമൈക്ക, ബാര്ബഡോസ്, ട്രിനിഡാഡ് തുടങ്ങിയ വിവിധ കരീബിയന് ദ്വീപ് രാജ്യങ്ങളുള്പ്പെട്ട ടീം ആണ് വെസ്റ്റിന്ഡീസ്).
ഏഷ്യയില് നിന്ന് ഒരു ടീമിന് മാത്രമേ നേരിട്ടുള്ള യോഗ്യതയുള്ളൂ. ഇന്ത്യ ആ സ്ഥാനം നേടിയാല് പാകിസ്ഥാന്, ശ്രീലങ്ക, ബംഗ്ലാദേശ് തുടങ്ങിയ രാജ്യങ്ങള്ക്ക് നേരിട്ട് യോഗ്യത ലഭിക്കില്ല. ഇവര്ക്ക് ഒളിംപിക്സ് കളിക്കണമെങ്കില് 2027ലെ ഗ്ലോബല് ക്വാളിഫയര് ടൂര്ണമെന്റില് ജയിക്കണം. ഓസ്ട്രേലിയ നേരിട്ട് യോഗ്യത നേടുന്നതിനാല് ശക്തരായ ന്യൂസിലന്ഡ് ടീമിനും ക്വാളിഫയര് റൗണ്ട് കളിച്ച് മാത്രമേ ഒളിംപിക്സിലേക്ക് എത്താന് സാധിക്കൂ. ആതിഥേയരായ അമേരിക്കയ്ക്ക് നേരിട്ട് യോഗ്യതയുണ്ട്. എന്നാല് അവര് 2026 ഡിസംബറിലെ ഐസിസി റാങ്കിംഗില് ആദ്യ 15 സ്ഥാനങ്ങളില് ഉണ്ടായിരിക്കണം.
