കോഴിക്കോട്/കല്പ്പറ്റ: കെഎസ്ആര്ടിസിയിലെ സ്ത്രീകളുടെ സൗജന്യ യാത്ര മൂലം കടുത്ത സാമ്പത്തിക പ്രതിസന്ധി നേരിടുന്ന സാഹചര്യത്തില് കോഴിക്കോട്, വയനാട് ജില്ലകളിലെ സ്വകാര്യ ബസുടമകള് ജൂലൈ മുതല് സര്വീസുകള് നിര്ത്തിവെക്കാന് തീരുമാനിച്ചു. സര്വീസുകള് തുടരുന്നത് വലിയ സാമ്പത്തിക നഷ്ടത്തിന് കാരണമാകുന്നുവെന്നാണ് ഉടമകളുടെ സംഘടന വ്യക്തമാക്കുന്നത്. കോഴിക്കോട് ജില്ലയില് നിലവില് ഒരു ബസിന് പ്രതിദിനം 4000ത്തോളം രൂപയുടെയും വയനാട് ജില്ലയില് 2000 രൂപ മുതല് 5000 രൂപ വരെയും നഷ്ടം സംഭവിക്കുന്നുണ്ടെന്നാണ് ബസ് ഓപറേറ്റര്മാരുടെ സംഘടന പറയുന്നത്. ഓരോ ദിവസവും കടം വാങ്ങിയാണ് ജീവനക്കാര്ക്ക് കൂലി നല്കുന്നതെന്നും സംഘടനയുടെ യോഗം ചൂണ്ടിക്കാട്ടി.
കോഴിക്കോട് ജില്ലയിലെ പ്രധാന റൂട്ടുകളായ കുറ്റ്യാടി, കുന്നമംഗലം, താമരശ്ശേരി, മുക്കം, വടകര, കൊയിലാണ്ടി സര്വീസുകളെല്ലാം നിലവില് കടുത്ത നഷ്ടത്തിലാണ് മുന്നോട്ട് പോകുന്നത്. ഈ വിഷയം മുഖ്യമന്ത്രിയുടെയും ഗതാഗത മന്ത്രിയുടെയും ശ്രദ്ധയില്പ്പെടുത്തിയിട്ടും ഇതുവരെ അനുകൂലമായ നടപടികളോ പരിഹാരമോ ഉണ്ടായിട്ടില്ലെന്ന് ഭാരവാഹികള് കുറ്റപ്പെടുത്തി.
സര്വീസ് അവസാനിപ്പിക്കുന്നു എന്ന് കാണിച്ച് വയനാട് ജില്ലയിലെ ബസുടമകള് മോട്ടോര് വാഹന വകുപ്പിന് കൂട്ടത്തോടെ ജി ഫോം നല്കിത്തുടങ്ങി. ഇതേത്തുടര്ന്ന് ജൂലൈ ഒന്ന് മുതല് ജില്ലയിലെ വിവിധ റൂട്ടുകളിലോടുന്ന ഇരുനൂറോളം സ്വകാര്യ ബസുകള് സര്വീസ് പൂര്ണമായും നിര്ത്തിവെക്കുമെന്നാണ് ബസുടമകള് വ്യക്തമാക്കുന്നത്.
