കോട്ടയം: തിരുവിതാംകൂര് ദേവസ്വം ബോര്ഡിന് കീഴിലുള്ള പ്രമുഖ ക്ഷേത്രങ്ങളിലെ തിരുവാഭരണങ്ങള് നഷ്ടപ്പെട്ടതായി തിരുവാഭരണം കമ്മിഷണര് തന്നെ വെളിപ്പെടുത്തിയ സാഹചര്യത്തില് തിരുവാഭരണ കൊള്ള സംബന്ധിച്ച് ഉന്നതതല അന്വേഷണം വേണമെന്ന് ഹിന്ദു ഐക്യവേദി സംസ്ഥാന വൈസ് പ്രസിഡണ്ട് ഇ.എസ്. ബിജു അവശ്യപ്പെട്ടു.
സ്വര്ണക്കട്ടികളും, തിരുമുഖങ്ങളും, മുദ്ര ചെയ്ത് സൂക്ഷിച്ചിരുന്ന തിരുവാഭരണ പൊതികളും, അമൂല്യ വസ്തുക്കളും നഷ്ടപ്പെട്ടതിന് പിന്നില് അധികാരികളുടെയും ഉദ്യോഗസ്ഥ പ്രമുഖന്മാരുടെയും ഒത്താശയുണ്ടെന്ന് വ്യക്തമാണ്. അതുകൊണ്ടുതന്നെ സാധാരണതലത്തിലുള്ള അന്വേഷണം പ്രഹസനമായി തീരുമെന്നതില് സംശയമില്ല. ക്ഷേത്രവും, ക്ഷേത്രസ്വത്തുക്കളും, തിരുവാഭരണങ്ങളും സംരക്ഷിക്കേണ്ട ദേവസ്വം അധികാരികള് തന്നെ ദേവന്റെ സ്വത്തുക്കള് കട്ടുമുടിക്കുന്നതും, കൊള്ളചെയ്യുന്നതും നീതീകരിക്കാന് കഴിയില്ല.
ക്ഷേത്രസങ്കേതങ്ങളില് തിരുവാഭരണങ്ങളും മറ്റ് അമൂല്യ വസ്തുക്കളും കൊള്ളയടിക്കാന് നേതൃത്വം നല്കുന്ന ദേവസ്വം ബോര്ഡുകള് പിരിച്ചുവിട്ട് ക്ഷേത്രഭരണം ഭക്തജനങ്ങളെ ഏല്പ്പിക്കണമെന്ന് ഹിന്ദു ഐക്യവേദി ആവശ്യപ്പെട്ടു.
