ന്യൂദല്ഹി: കോണ്ഗ്രസ് പാര്ട്ടിയുടെ സ്വന്തം ചരിത്രത്തെയും മാനസികാവസ്ഥയെയും പ്രതിഫലിപ്പിക്കുന്നതാണ് രാഹുല് ഗാന്ധിയുടെ പരാമര്ശങ്ങളെന്ന് ബിജെപി ദേശീയ വക്താവ് ഷെഹ്സാദ് പൂനവല്ല വീഡിയോ പ്രസ്താവനയില് പറഞ്ഞു. ഇന്ത്യയെ അപകീര്ത്തിപ്പെടുത്തുന്ന ഈ അജണ്ടയും, രാഷ്ട്രീയ ലാഭത്തിനായി പരിഭ്രാന്തി സൃഷ്ടിക്കുന്നതും നിര്ത്തുക’. ബിജെപി ദേശീയ വക്താവ് ആവശ്യപ്പെട്ടു.
‘അടിയന്തരാവസ്ഥയുടെ ചരിത്രമുള്ള ഒരു കുടുംബത്തില് നിന്നാണ് രാഹുല് ഗാന്ധി വരുന്നത്. അതുകൊണ്ടാണ് എല്ലാവരും അടിയന്തരാവസ്ഥ ഏര്പ്പെടുത്തുമെന്ന് അദ്ദേഹം വിശ്വസിക്കുന്നത്. ഇന്ത്യയില് ഭരണഘടന ഒരിക്കല് മാത്രമേ തകര്ക്കപ്പെട്ടിട്ടുള്ളൂ, അത് ഇന്ദിരാഗാന്ധിയാണ് ചെയ്തത്. ഭരണഘടനാ സ്ഥാപനങ്ങളെ അവര് എങ്ങനെ ദുര്ബലപ്പെടുത്തുകയും അവയില് എങ്ങനെ ഇടപെടുകയും ചെയ്തുവെന്ന് എല്ലാവര്ക്കും അറിയാം,” പൂനവല്ല പറഞ്ഞു.
നരേന്ദ്ര മോദി ഒരു വര്ഷത്തിനുശേഷം അധികാരത്തില് തുടരില്ലെന്ന പ്രതിപക്ഷ നേതാവ് രാഹുല് ഗാന്ധിയുടെ പ്രസ്താവനയെ പരാമശിക്കുകയായിരുന്നു പൂനവല്ല. പൊതുജന സമ്മര്ദ്ദം അടിച്ചമര്ത്താനും അടിയന്തരാവസ്ഥ പോലുള്ള എന്തെങ്കിലും അടിച്ചേല്പ്പിക്കാനും മോദി സര്ക്കാര് ശ്രമിച്ചേക്കാമെന്നും രാഹുല് ആരോപിച്ചിരുന്നു.
യഥാര്ത്ഥ ‘അടിയന്തരാവസ്ഥ’ കോണ്ഗ്രസ് പാര്ട്ടിക്കുള്ളിലാണെന്ന് പൂനവല്ല ചൂണ്ടിക്കാട്ടി. കോണ്ഗ്രസ് നേതാക്കള് ഒന്നിനുപുറകെ ഒന്നായി പാര്ട്ടി വിടുകയാണ്. കോണ്ഗ്രസ് പാര്ട്ടി കുടുംബവാഴ്ച രാഷ്ട്രീയത്തിനെതിരായ ‘ഒരു കലാപം നേരിടുന്നു’ എന്നും പൂനവല്ല പറഞ്ഞു.
