ന്യൂദല്ഹി: മലയാളിയായ പ്രദീപ് പണിക്കര് ഡല്ഹി അന്താരാഷ്ട്ര വിമാനത്താവളത്തിന്റെ സിഇഒ ആയി നിയമിതനായി.
ജിഎംആര് ഹൈദരാബാദ് അന്താരാഷ്ട്ര വിമാനത്താവളത്തില് ചീഫ് എക്സിക്യൂട്ടീവ് ഓഫീസര് ആയിരുന്നു. പത്തനംതിട്ടയില് ജനിച്ചെങ്കിലും കൊല്ക്കത്തയിലാണ് പ്രദീപ് പണിക്കര് വളര്ന്നതും പഠിച്ചതും. ചാര്ട്ടേഡ് അക്കൗണ്ടന്റാണ്. തന്റെ കരിയറിന്റെ ആദ്യ വര്ഷങ്ങളില് കുടുംബ ബിസിനസായ ജിഡി കെമിക്കല്സ് ആന്ഡ് കോസ്മെറ്റിക്സില് പ്രൊഡക്ഷന്-ഇന്-ചാര്ജായി സേവനമനുഷ്ഠിച്ചിട്ടുണ്ട്. 1993 ജൂലൈയില് ഐഡിബിഐ ബാങ്കില് മാനേജരായി.
1998 ആഗസ്റ്റില് എല് ആന്ഡ് ടി ഫിനാന്സില് സീനിയര് മാനേജരായി ചുമതലയേല്ക്കുന്നതിനായി അദ്ദേഹം ചെന്നൈയിലേക്ക് താമസം മാറി.
2000 ഡിസംബര് മുതല് 2003 ജൂണ് വരെ അദ്ദേഹം ഫീഡ്ബാക്ക് വെഞ്ച്വേഴ്സിന്റെ ജനറല് മാനേജരായി സേവനമനുഷ്ഠിച്ചു. 2003 ജൂലൈയില് മുംബൈ സെസ് ഡെവലപ്മെന്റ് കമ്പനി അദ്ദേഹത്തെ വൈസ് പ്രസിഡന്റായും ബിഡ് ടീമിന്റെ തലവനായും നിയമിച്ചു.
2004 ലാണ് ജിഎംആറുമായുള്ള അദ്ദേഹത്തിന്റെ ദീര്ഘകാല ബന്ധം ആരംഭിച്ചത്. ഗ്രേറ്റര് ഹൈദരാബാദ് ഏരിയയില് ജനറല് മാനേജരായാണ് അദ്ദേഹം തന്റെ കരിയര് ആരംഭിച്ചത്. ഭാര്യ ബിന്ദു, രണ്ടു മക്കളുണ്ട്.
