രാജ്യത്തെ യുവതീയുവാക്കള്ക്കായി നരേന്ദ്ര മോദി സര്ക്കാര് കൊണ്ടുവന്ന തൊഴില് മേളയായ റോസ്ഗാര് യോജനയുടെ ഭാഗമായി വിവിധ സംസ്ഥാനങ്ങളില് സംഘടിപ്പിച്ച ചടങ്ങുകളില് അരലക്ഷത്തിലേറെ പേര്ക്കുകൂടി റെയില്വേ, ബാങ്കിങ്, പ്രതിരോധം, ആരോഗ്യം, വിദ്യാഭ്യാസം, ഹരിതോര്ജം, സാങ്കേതിക വിദ്യ തുടങ്ങിയ മേഖലകളില് നിയമന ഉത്തരവുകള് ലഭിച്ചിരിക്കുകയാണ്.
ഇതുവരെയുള്ള 19 തൊഴില് മേഖലകളിലായി 12 ലക്ഷം യുവതീയുവാക്കള്ക്കാണ് കേന്ദ്രസര്വീസുകളില് ജോലി ലഭിച്ചിരിക്കുന്നത്. റോസ്ഗാര് യോജന വഴി 10 ലക്ഷം പേര്ക്ക് തൊഴില് എന്നതായിരുന്നു മോദി സര്ക്കാരിന്റെ ലക്ഷ്യം. അതാണിപ്പോള് 12 ലക്ഷമായിരിക്കുന്നത്. ഇനിയുള്ള തൊഴില് മേളകള് കൂടി കഴിയുന്നതോടെ അഭ്യസ്തവിദ്യരായ ലക്ഷക്കണക്കിന് യുവതീയുവാക്കള്ക്കും പുതുതായി സര്ക്കാര് ജോലി ലഭിക്കും.
2022 ഒക്ടോബറിലാണ് പ്രധാനമന്ത്രി നരേന്ദ്ര മോദി ഈ പദ്ധതി ഉദ്ഘാടനം ചെയ്തത്. 75,000 പേര്ക്കാണ് ആദ്യഘട്ടത്തില് നിയമനം നല്കിയത്. റോസ്ഗാര് മേളയുടെ ഭാഗമായി 50 മന്ത്രിമാര് രാജ്യത്തുടനീളമുള്ള വിവിധ സ്ഥലങ്ങളില് 20,000 പേര്ക്ക് നിയമന കത്തുകള് കൈമാറിയിരുന്നു. റെയില്വെ മന്ത്രി അശ്വിനി വൈഷ്ണവ് ജയ്പൂരിലും വ്യോമയാന മന്ത്രി ജ്യോതിരാദിത്യ സിന്ധ്യ ഭോപ്പാലിലും, ഇന്ഫര്മേഷന് ആന്ഡ് ബ്രോഡ്കാസ്റ്റിംഗ് മന്ത്രി അനുരാഗ് താക്കൂര് ചണ്ഡീഗഡിലും ചടങ്ങിന്റെ ഭാഗമായി. ഉജ്വലമായ ഈ തുടക്കം തുടര്ന്നുള്ള ഓരോ വര്ഷവും ആവര്ത്തിക്കപ്പെട്ടു. അങ്ങനെയാണ് 12 ലക്ഷം പേര്ക്ക് സര്ക്കാര് ജോലി ലഭിച്ചത്.
യുവതീ യുവാക്കളെ കപട വാഗ്ദാനങ്ങള് നല്കി വഞ്ചിക്കുന്ന രീതിയാണ് രാഷ്ട്രീയ-ഭരണ നേതൃത്വം മുന്കാലത്ത് സ്വീകരിച്ചിരുന്നത്. യുവാക്കളെ സംഘടിപ്പിച്ച് തൊഴിലില്ലായ്മക്കെതിരെ നിരന്തര സമരം നടത്തിയവര് തൊഴിലവസരങ്ങള് സൃഷ്ടിക്കുന്നതിന് കാര്യമായി യാതൊന്നും ചെയ്തില്ല. നരേന്ദ്ര മോദി സര്ക്കാര് അധികാരത്തില് വന്നതിനുശേഷമാണ് ഇതിനൊരു കാതലായ മാറ്റം സംഭവിക്കാന് തുടങ്ങിയത്. യുവതീ യുവാക്കള് ഭാരതത്തിന്റെ കരുത്താണെന്ന് പറയുക മാത്രമല്ല, അതിന് അവരെ പ്രാപ്തരാക്കുകയുമാണ് മോദി സര്ക്കാര് ചെയ്തത്. മോദി സര്ക്കാരിനു കീഴില് ആയിരക്കണക്കിന് സ്റ്റാര്ട്ടപ്പ് പദ്ധതികളാണ് ആരംഭിച്ചത്. ഇതിലേറെയും യുവാക്കളുടേതായിരുന്നു. ഇന്ന് ലോകത്തുതന്നെ ഏറ്റവും കൂടുതല് സ്റ്റാര്ട്ടപ്പുകളുള്ള മൂന്നാമത്തെ രാജ്യമാണ് ഭാരതം. ഭാരതത്തിന്റെ സമ്പദ് വ്യവസ്ഥയെ ശക്തിപ്പെടുത്തുന്നതില് ഇത് വലിയ പങ്കുവഹിക്കുന്നു.
ഏറ്റവും പുതിയ റോസ്ഗാര് മേളയിലൂടെ ജോലി ലഭിച്ചവരെ വീഡിയോ കോണ്ഫറന്സിലൂടെ അഭിസംബോധന ചെയ്തുകൊണ്ട് പ്രധാനമന്ത്രി നരേന്ദ്ര മോദി പറഞ്ഞ കാര്യങ്ങള് യുവാക്കള്ക്കും രാജ്യത്തിനും ആവേശം നല്കുന്നതാണ്. പുതിയ ഉദ്യോഗസ്ഥര് രാജ്യത്തിന്റെ വികസനയാത്രയുടെ ആക്കം വര്ദ്ധിപ്പിക്കുമെന്നും, നിയമനം ലഭിച്ചവരുടെ പ്രവര്ത്തനങ്ങളിലൂടെയും തീരുമാനങ്ങളിലൂടെയും വികസിത ഭാരതമെന്ന ലക്ഷ്യം പൂര്ത്തീകരിക്കാനാകുമെന്നാണ് തന്റെ പൂര്ണ്ണ വിശ്വാസമെന്നും പ്രധാനമന്ത്രി മോദി പറയുകയുണ്ടായി. രാജ്യത്തെ യുവജനതയെ അഭിസംബോധന ചെയ്ത് ഇങ്ങനെയൊക്കെ പറയാന് കഴിയുന്ന മറ്റൊരു പ്രധാനമന്ത്രി നമുക്ക് ഉണ്ടായിട്ടില്ല. തൊഴില്രഹിതരായ യുവാക്കളുടെ അസംതൃപ്തി മുതലെടുത്ത് ചിലര് രാജ്യത്ത് അരാജകത്വം സൃഷ്ടിക്കാന് ശ്രമിക്കുമ്പോഴാണ് യുവാക്കളുടെ ഭാവി ഉജ്വലമാക്കുന്ന തീരുമാനങ്ങളും നടപടികളുമായി മോദി സര്ക്കാര് മുന്നോട്ടു പോകുന്നത്.
പ്രധാനമന്ത്രി നരേന്ദ്ര മോദി വിദേശ സന്ദര്ശനം നടത്തുന്നതും, കരാറുകളില് ഒപ്പു വയ്ക്കുന്നതും രാഷ്ട്രീയ എതിരാളികള് പലപ്പോഴും വിമര്ശന വിധേയമാക്കാറുണ്ട്. എന്നാല് ഈ യാത്രകളുടെയെല്ലാം ലക്ഷ്യം ഭാരതത്തിന്റെ സുരക്ഷയും വികസനവുമൊക്കെയാണെന്ന് രാജ്യസ്നേഹികള്ക്ക് തിരിച്ചറിയാന് കഴിയും. വിവിധ രാജ്യങ്ങള് സന്ദര്ശിക്കുമ്പോള് ഭാരതത്തിന്റെ മുന്നേറ്റത്തിന് യുവാക്കള്ക്കുള്ള പങ്കിനെക്കുറിച്ച് രാഷ്ട്രത്തലവന്മാര് വളരെ ആദരവോടെയാണ് സംസാരിക്കുന്നതെന്നും പത്തൊന്പതാം റോസ്ഗാര് മേളയെ അഭിസംബോധന ചെയ്യുമ്പോള് പ്രധാനമന്ത്രി മോദി പറയുകയുണ്ടായി. യുവാക്കള്ക്ക് തൊഴിലും ആഗോളതലത്തിലുള്ള അവസരങ്ങളും ലഭ്യമാക്കുക എന്നതായിരുന്നു ഓരോ രാജ്യങ്ങളുമായുള്ള ചര്ച്ചയുടെ ലക്ഷ്യമെന്നും പ്രധാനമന്ത്രി പറഞ്ഞു. ഇതുതന്നെയാണ് രാജ്യത്തെ ഓരോ പൗരനും ആഗ്രഹിക്കുന്നത്.
ജന്മഭൂമി ഓണ്ലൈന്