ഭോപ്പാല്‍: ഈ മാസം 19ന് മധ്യപ്രദേശിലെ ധാറില്‍ ഭോജ്ശാല ക്ഷേത്രത്തെ സംബന്ധിച്ച വിധിക്ക് ശേഷം ഇന്നലെ ഭോജ്ശാല വാഗ് ദേവി ക്ഷേത്രത്തില്‍ മഹാ ആരതി നടന്നു. ആരതി ദര്‍ശനത്തിനായി ജനപ്രവാഹമായിരുന്നു വെന്ന് പോലീസ് അറിയിച്ചു. 721 വര്‍ഷങ്ങള്‍ക്ക് ശേഷമാണ് ഈ ചടങ്ങ് നടക്കുന്നത്. 1800 സുരക്ഷാ ഉദ്യോഗസ്ഥരെ വിന്യസിച്ചാണ് ചടങ്ങുകള്‍ നടത്തിയത്.
ഇത് ഹിന്ദുക്കളുടെ വിശ്വാസത്തിന്റെയും അഭിമാനത്തിന്റെയും വിജയമാണെന്ന് കേസിന്റെ പ്രാഥമിക ഹര്‍ജിക്കാരന്‍ കുല്‍ദീപ് തിവാരി പറഞ്ഞു. 2003 മുതല്‍ ഹിന്ദുക്കള്‍ക്ക് ചൊവ്വാഴ്‌ച്ചകളിലും ബസന്ത് പഞ്ചമിയിലും പ്രാര്‍ത്ഥന നടത്താനും മുസ്ലീം സമുദായക്കാര്‍ക്ക് വെള്ളിയാഴ്‌ച്ചകളിലും ആരാധന നടത്താമെന്നുമായിരുന്നു തീരുമാനം, എന്നാല്‍ ചിലപ്പോള്‍ ബസന്ത് പഞ്ചമി വെള്ളിയാഴ്‌ച്ചകളില്‍ വരുന്നത് സംഘര്‍ഷത്തിന് ഇടയാക്കിയിരുന്നു. ക്ഷേത്രമായി പ്രഖ്യാപിച്ചതിനാല്‍ ഇനി ഭോജ്ശാലയിലേക്ക് പ്രവേശിക്കാന്‍ ഫീസ് ഈടാക്കരുത്. ക്ഷേത്രപരിസരത്തുള്ള മുസ്ലീം ചിഹ്നങ്ങള്‍ ഒഴിവാക്കണമെന്നും കോടതി നിര്‍ദേശിച്ചിട്ടുണ്ട്.
