കാസര്കോട്: കേരളത്തിലെ പുതിയ മുഖ്യമന്ത്രിയെക്കുറിച്ചുള്ള കോണ്ഗ്രസ് ഹൈക്കമാന്ഡിന്റെ ചര്ച്ചകള് പുരോഗമിക്കുമ്പോള്, തൃക്കരിപ്പൂര് എംഎല്എയായി തെരഞ്ഞെടുക്കപ്പെട്ട സന്ദീപ് വാര്യര് കെ.സി. വേണുഗോപാലിനെ പിന്തുണച്ചെന്ന റിപ്പോര്ട്ടുകള്ക്ക് പിന്നാലെ മണ്ഡലത്തില് പ്രതിഷേധവും അതൃപ്തിയും ശക്തമാകുന്നു. പ്രതിപക്ഷ നേതാവ് വി.ഡി. സതീശനും എഐസിസി ജനറല് സെക്രട്ടറിയും ആലപ്പുഴ എംപിയുമായ കെ.സി. വേണുഗോപാലുമാണ് മുഖ്യമന്ത്രിപദത്തിനായുള്ള പ്രധാന പേരുകളായി ഉയരുന്നത്. രമേശ് ചെന്നിത്തല മത്സരത്തില് നിന്ന് പിന്മാറിയെന്ന സൂചനകള്ക്കിടെയാണ് കോണ്ഗ്രസിനകത്തെ ചര്ച്ചകള് സജീവമായത്.
ഇതിനിടെയാണ് തൃക്കരിപ്പൂരില് സന്ദീപ് വാര്യര്ക്ക് വേണ്ടി സംഘടിപ്പിക്കാനിരുന്ന വിജയാഘോഷ റോഡ് ഷോകള് യുഡിഎഫ് നേതൃത്വം താത്കാലികമായി നിര്ത്തിവെച്ചത്. ഹൈക്കമാന്ഡ് നിരീക്ഷകര്ക്ക് മുന്നില് കെ.സി. വേണുഗോപാലിന് പിന്തുണ നല്കിയതാണ് ഇതിന് കാരണമെന്ന സൂചനയാണ് പ്രാദേശിക നേതാക്കള് നല്കുന്നത്. തെരഞ്ഞെടുപ്പ് ഫലം പ്രഖ്യാപിച്ച ശേഷം തൃക്കരിപ്പൂര്, പടന്ന, വലിയപറമ്പ പഞ്ചായത്തുകളില് സന്ദീപ് വാര്യര് പങ്കെടുത്ത വിജയാഘോഷ റാലികള് വലിയ ജനപങ്കാളിത്തത്തോടെയാണ് സംഘടിപ്പിച്ചത്.
തുടര്ന്ന് തിരുവനന്തപുരത്തേക്ക് പോയ സന്ദീപ് വാര്യര് എഐസിസി നിരീക്ഷകര്ക്ക് മുന്നില് കെ.സി. വേണുഗോപാലിനെ പിന്തുണച്ചുവെന്ന വാര്ത്ത പുറത്തുവന്നതോടെയാണ് പ്രാദേശിക യുഡിഎഫ് നേതൃത്വത്തില് അതൃപ്തി പടര്ന്നത്. നീലേശ്വരം നഗരസഭ, ചെറുവത്തൂര്, കയ്യൂര്-ചീമേനി, ഈസ്റ്റ് എളേരി, വെസ്റ്റ് എളേരി, പിലിക്കോട് പഞ്ചായത്തുകളിലെ റോഡ് ഷോകള് ഇപ്പോള് നടത്തേണ്ടെന്ന നിലപാടിലാണെന്ന് ഒരു യുഡിഎഫ് നേതാവ് പ്രതികരിച്ചു.
തിരുവനന്തപുരത്ത് നിന്ന് ദല്ഹിയിലേക്ക് പോയ സന്ദീപ് വാര്യര് ഇന്നലെ രാവിലെയാണ് കേരളത്തിലേക്ക് മടങ്ങിയെത്തിയത്. ഇന്ന് മണ്ഡലത്തിലെത്തുമെന്നാണ് വിവരം. പ്രാദേശിക ഘടകങ്ങള് സ്വതന്ത്രമായി സ്വീകരണ പരിപാടികള് സംഘടിപ്പിച്ചേക്കാമെങ്കിലും സംയുക്ത റോഡ് ഷോകള് ഉണ്ടാകില്ലെന്ന് നേതാക്കള് വ്യക്തമാക്കി. വിജയത്തിന് പിന്നാലെ യുഡിഎഫ് പ്രവര്ത്തകര് ആവേശത്തിലായിരുന്നെങ്കിലും കാസര്കോട്, കണ്ണൂര്, വയനാട് ജില്ലകളിലെ കോണ്ഗ്രസ് എംഎല്എമാര് മുഖ്യമന്ത്രി പദത്തിലേക്ക് മുന്ഗണന പട്ടികയെന്ന പേരില് രേഖയുടെ ഒരു ഭാഗം പുറത്തുവന്നതോടെയാണ് വിവാദം ആരംഭിച്ചത്. ഉദുമ എംഎല്എ കെ. നീലകണ്ഠന്റെ നിലപാട് രേഖപ്പെടുത്തിയിരുന്നില്ലെന്നും അദ്ദേഹം കെ.സി. വേണുഗോപാലിനെ പിന്തുണച്ചില്ലെന്നുമാണ് സൂചന.
സന്ദീപ് വാര്യര്ക്കൊപ്പം കണ്ണൂരിലെ സജീവ് ജോസഫ്, ടി.ഒ. മോഹനന്, കെപിസിസി പ്രസിഡന്റ് സണ്ണി ജോസഫ്, വയനാട്ടിലെ ഉഷ വിജയന്, ഐ.സി. ബാലകൃഷ്ണന്, ടി. സിദ്ദിഖ് എന്നിവരും കെസിയെ പിന്തുണച്ചതായി രേഖയില് ഉണ്ടായിരുന്നു. ഇതിന് പിന്നാലെ യുഡിഎഫ് തൃക്കരിപ്പൂര് എന്ന വാട്സ്ആപ്പ് ഗ്രൂപ്പില് വാദപ്രതിവാദങ്ങളും അരങ്ങേറി. യുഡിഎഫ് നേതാക്കളും താഴെത്തട്ടിലെ പ്രവര്ത്തകരും ബൂത്ത് തല പ്രവര്ത്തകരും ഉള്പ്പെട്ട ഗ്രൂപ്പിലായിരുന്നു വിവാദം രൂക്ഷമായത്. ഒടുവില് അഡ്മിന് തന്നെ ഗ്രൂപ്പ് പിരിച്ചുവിടുകയായിരുന്നു.
ജന്മഭൂമി ഓണ്ലൈന്