ചെന്നൈ: രാഹുല് ഗാന്ധിയെ ആദ്യമായി പ്രധാനമന്ത്രി സ്ഥാനാര്ത്ഥിയായി നിര്ദേശിച്ച തെക്കെയിന്ത്യയിലെ നേതാവായ സ്റ്റാലിനെ വഞ്ചിച്ച് നടന് വിജയിന്റെ ടിവികെയുമായി കൂട്ടുകൂടിയതോടെ രാഹുല്ഗാന്ധിയോടും കോണ്ഗ്രസിനോടും തമിഴ്നാട്ടില് പരക്കെ എതിര്പ്പ്. തമിഴ്നാട്ടില് സ്റ്റാലിനെ പിന്നില് നിന്നും കുത്തിയ കട്ടപ്പയായാണ് രാഹുല് ഗാന്ധി സമൂഹമാധ്യമങ്ങളില് ചിത്രീകരിക്കപ്പെടുന്നത്. വിശ്വാസ്യത എന്ന മിനിമം ഗ്യാരന്റിയാണ് രാഹുല് ഗാന്ധിയും സോണിയയും ഇതിലൂടെ തുലച്ചതെന്നാണ് വിമര്ശനം.
ബിജെപിയ്ക്കെതിരെ ഇന്ത്യാമുന്നണി ഉയര്ത്തുന്നതിനും നട്ടെല്ലായി നിന്ന നേതാവാണ് സ്റ്റാലിന്. രാഹുല് ഗാന്ധിയുടെ രാഷ്ട്രീയമുന്നേറ്റത്തിന് എല്ലാവിധ പിന്തുണയും നല്കിയിരുന്ന നേതാവായിട്ട് കൂടി സ്റ്റാലിനെ വിടാന് പ്രേരിപ്പിച്ചതിന് പിന്നില് രാഹുല് ഗാന്ധിയുടെ ഈഗോ തന്നെയാണെന്ന് പറയുന്നു. തമിഴ്നാട്ടില് നിന്നും രണ്ട് രാജ്യസഭാ സീറ്റിന് പകരം ഒരു സീറ്റ് മാത്രം നല്കിയതോടെയാണ് രാഹുല് ഗാന്ധി സ്റ്റാലിനുമായി പിണങ്ങിയത്. നിയമസഭാ സീറ്റ് വിഭജനത്തിലും ഇത് നിഴലിച്ചു. 50ല്പരം സീറ്റുകള് ചോദിച്ച കോണ്ഗ്രസിന് സ്റ്റാലിന് നല്കിയത് വെറും 28 സീറ്റുകള്. ജയിച്ചാല് തന്നെ കോണ്ഗ്രസിന് ഒരു മന്ത്രിസ്ഥാനവും നല്കില്ലെന്ന് സ്റ്റാലിന് തീര്ത്തുപറഞ്ഞിരുന്നു. ഇതെല്ലാം രാഹുല്ഗാന്ധിയുടെ വെറുപ്പിന് കാരണമായി. അതാണ് ഒടുവില് സ്റ്റാലിന്റെ വോട്ടുകളുടെ ഫലത്തില് ജയിച്ചെങ്കിലും സ്റ്റാലിനോട് പോലും ചോദിക്കാതെ നടന് വിജയിന്റെ ടിവികെയ്ക്ക് ഭരണത്തിലേറാന് രാഹുല് ഗാന്ധി പിന്തുണ പ്രഖ്യാപിക്കുകയായിരുന്നു.
ഇപ്പോള് വിജയിന്റെ തമ്പി എന്നാണ് രാഹുല് ഗാന്ധി വിശേഷിപ്പിക്കുന്നത്. പക്ഷെ സ്റ്റാലിനെ അണ്ണാ എന്ന് വിളിച്ച് പിറകെക്കൂടിയ രാഹുല് ഗാന്ധി വിജയിനെ തമ്പീ എന്ന് വിളിച്ചാലും എപ്പോഴാണ് കട്ടപ്പയാകുക എന്ന് അറിയില്ലെന്ന് സമൂഹമാധ്യമങ്ങളില് വിമര്ശനവും പരിഹാസവും ഉയരുന്നുണ്ട്. സ്റ്റാലിനെ വഞ്ചിച്ചതോടെ വാളുകൊണ്ട് സ്റ്റാലിനെ പിന്നില് നിന്നും കുത്തുന്ന കട്ടപ്പയായി രാഹുല് നില്ക്കുന്ന ചിത്രം സമൂഹമാധ്യമങ്ങളില് വൈറലാണ്.
