ലോകത്തിലെ ഏറ്റവും വലിയ ഗുസ്തി വേദിയിലേക്ക് ഇന്ത്യയില്‍ നിന്നും നാടന്‍ വേഷത്തില്‍ ഒരു വനിത. ഇന്ത്യക്കാരിയായ കവിതാ ദേവി (Kavita Devi). ഇന്ന് ലോകപ്രശസ്തമായ WWE (World Wrestling Entertainment) ൽ മത്സരിക്കുന്ന ആദ്യത്തെ ഇന്ത്യന്‍വനിതയാണ്. ഒരേയൊരു ഇന്ത്യന്‍ വനിതയാണ്. ഇതാണ് കവിതാദേവിയെ വ്യത്യസ്തയാക്കുന്നത്.
2017-ൽ അമേരിക്കയിൽ വെച്ച് നടന്ന ‘മേ യങ് ക്ലാസിക്’ (Mae Young Classic) എന്ന സുപ്രധാന ടൂർണമെന്‍റില്‍ കവിത മത്സരിക്കാനെത്തിയത് ഡക്കോട്ട കൈ (Dakota Kai) എന്ന അന്താരാഷ്‌ട്ര ഗുസ്തിക്കാരിക്കെതിരെയാണ്. ഹരിയാന സ്വദേശിയായ കവിത. പാശ്ചാത്യ വസ്ത്രങ്ങൾ ഒഴിവാക്കി, തികച്ചും ഇന്ത്യൻ ശൈലിയിലുള്ള ഓറഞ്ച് നിറത്തിലുള്ള ഒരു സൽവാർ-കമ്മീസ് ധരിച്ചാണ് കവിത മത്സരിക്കാൻ റിംഗിലേക്ക് എത്തിയത് . ചുരിദാറിന്റെ ഷാൾ അരയിൽ മുറുക്കിക്കെട്ടി, എതിരാളിയെ നിഷ്പ്രയാസം എടുത്തുയർത്തി നിലത്തടിച്ച കവിതയുടെ ആ മത്സരം നിമിഷങ്ങൾക്കകം ലോകമെമ്പാടും വൈറലായി.
ഈ ഒരൊറ്റ മികച്ച പ്രകടനത്തിലൂടെ അവർക്ക് WWE-യുമായി ഔദ്യോഗിക കരാർ ഒപ്പിടാൻ സാധിച്ചു. പ്രശസ്തനായ ‘ദ ഗ്രേറ്റ് ഖലി’ യുടെ കീഴിലാണ് ഗുസ്തിയുടെ ബാലപാഠങ്ങൾ പരിശീലിച്ചത്.
ധരിക്കുന്ന വസ്ത്രത്തിലല്ല ആത്മവിശ്വാസം എന്ന് തെളിയിക്കുകയായിരുന്നു കവിതാദേവി. മനസ്സിലെ അചഞ്ചലമായ ആത്മവിശ്വാസമാണ് വിജയത്തിലേക്കുള്ള യഥാർത്ഥ വഴി എന്നും കവിതാ ദേവി ലോകത്തെ പഠിപ്പിച്ചു.
