തിരുവനന്തപുരം:ആകാശവാണിയുടെ ‘അഖില കേരള റേഡിയോ നാടകോത്സവ’ത്തില് ശബ്ദസാന്നിധ്യമായി സൂപ്പര്താരം മോഹന്ലാലും. രണ്ട് ഓഡിയോ നാടകങ്ങള്ക്കാണ് മോഹന്ലാല് ശബ്ദം നല്കിയത്. ‘ദൈവത്തിന്റെ മനമാരു കണ്ടു’, ‘കടങ്കഥയിലെ വിരുന്നുകാരന്’ എന്നീ നാടകങ്ങള്ക്കാണ് മോഹന്ലാല് ശബ്ദം നല്കിയത്.
തിരുവനന്തപുരം നിലയം നിര്മിക്കുന്ന ദൈവത്തിന്റെ മനമാരു കണ്ടു നാടകം മേയ് 11-ന് രാത്രി 9.30 ന് പ്രക്ഷേപണം ചെയ്യും. ജയരാജ് മിത്ര രചന നിര്വഹിച്ച ഈ നാടകം സംവിധാനം ചെയ്തത് റൂബി ബാബു ആണ്. എംആര് ഗോപകുമാര്, ഭാഗ്യലക്ഷ്മി, സന്ധ്യ രാജേന്ദ്രന്, നന്ദു, സാജന് സൂര്യ തുടങ്ങി നിരവധി താരങ്ങള് മോഹന്ലാലിനൊപ്പം ഇതില് അണിനിരക്കുന്നു.
കൊച്ചി നിലയം നിര്മിക്കുന്ന കടങ്കഥയിലെ വിരുന്നുകാരന് മേയ് 17 ന് രാത്രി 9:30-ന് പ്രക്ഷേപണം ചെയ്യും. ഇതിന്റെ പുനഃപ്രക്ഷേപണം മേയ് 18 ഉച്ചയ്ക്ക് ഒരു മണിക്ക്. എം വി ശശികുമാറും എന് എസ് ജയമോഹനും സംയുക്തമായി സംവിധാനം ചെയ്ത നാടകത്തിന്റെ രചന നിര്വഹിച്ചത് മുഹമ്മദ് റോഷന് ആണ്.കൈലാസ് മേനോന് ആണ് പശ്ചാത്തല ശബ്ദവിന്യാസം. മോഹന്ലാല് ഏക പുരുഷ കഥാപാത്രമായി ശബ്ദം നല്കുന്നുവെന്ന പ്രത്യേകതയും ഇതിനുണ്ട്. മാലാ പാര്വതി, ശിവദ, മുത്തുമണി, അദിതി രവി എന്നിവരും ഈ നാടകത്തില് ശബ്ദം സാന്നിധ്യമായി ഉണ്ട്.
മുമ്പ് ആകാശവാണിക്കായി ‘ജീവനുള്ള പ്രതിമകള്’, ‘കത്തുകള് കഥ പറയുന്നു’ എന്നീ റേഡിയോ നാടകങ്ങള്ക്ക് മോഹന്ലാല് ശബ്ദം നല്കിയിട്ടുണ്ട്.
