കൊച്ചി: കരുതിക്കൂട്ടി കൊലപാതകം നടത്താന് ശ്രമിച്ചാല് മാത്രമേ പ്രതിക്കെതിരെ വധശ്രമക്കേസ് ചുമത്താനാവൂവെന്ന് ഹൈക്കോടതി. കൊലപ്പെടുത്തുകയെന്ന ഉദ്ദേശ്യത്തോടെ ബോധപൂര്വമായോ മരണം സംഭവിച്ചേക്കാമെന്ന ബോധ്യത്തോടെയോ ആണ് ആക്രമണം നടത്തിയതെന്ന് തെളിയിക്കാനായില്ലെങ്കില് വധശ്രമക്കേസിലെ ശിക്ഷ നിലനില്ക്കില്ലെന്നും ആക്രമണമേറ്റയാളുടെ മുറിവും ഇക്കാര്യത്തില് പ്രധാനപ്പെട്ടതാണെന്നും ജസ്റ്റിസ് എ.ബദറുദ്ദീന് വ്യക്തമാക്കി. തിരൂരില് ഒരാളെ കുത്തിപ്പരിക്കേല്പ്പിച്ച കേസിലെ പ്രതിയെ വധശ്രമക്കുറ്റത്തിന് ഏഴ് വര്ഷം ശിക്ഷിച്ച സെഷന്സ് കോടതി ഉത്തരവ് റദ്ദാക്കിയാണ് കോടതിയുടെ നിരീക്ഷണം. 2005 മെയ് 17ന് നാല് പേര്ക്കൊപ്പം ചേര്ന്ന് ഒരാളെ വധിക്കാന് ശ്രമിച്ചെന്ന കേസിലെ പ്രതിയായ കൂട്ടായി കോതപ്പറമ്പ് മൂസാന്റെ പുരക്കല് മനാഫിനെയാണ് മഞ്ചേരി സെഷന്സ് കോടതി ശിക്ഷിച്ചത്.
ഏഴ് വര്ഷം തടവ് ശിക്ഷ റദ്ദാക്കിയ കോടതി 41,500 രൂപ പിഴയൊടുക്കാനും അല്ലെങ്കില് 23 ആഴ്ചത്തെ തടവനുഭവിക്കാനുമായി ശിക്ഷ ഭേദഗതി ചെയ്തു. പിഴ സംഖ്യയില് 30000 രൂപ പരാതിക്കാരന് നഷ്ടപരിഹാരമായി നല്കുകയും ബാക്കി തുക ഖജനാവിലേക്ക് അടക്കുകയും വേണമെന്നും കോടതി നിര്ദേശിച്ചു.
