തിരുവനന്തപുരം: ഡിജിറ്റല് സര്വകലാശാല വൈസ് ചാന്സലര് ഡോ. സജി ഗോപിനാഥ് ചാന്സിലറായ ഗവര്ണറുടെ അനുമതിയില്ലാതെ സംസ്ഥാന ശാസ്ത്ര സാങ്കേതിക പരിസ്ഥിതി കൗണ്സില് എക്സിക്യൂട്ടീവ് വൈസ് പ്രസിഡന്റ് സ്ഥാനം ഏറ്റെടുത്തത് ചട്ടവിരുദ്ധമെന്ന് പരാതി. സജി ഗോപിനാഥിനെതിരെ അച്ചടക്ക നടപടി വേണമെന്നാവശ്യപ്പെട്ട് സേവ് യൂണിവേഴ്സിറ്റി ക്യാമ്പയിന് കമ്മിറ്റി ഗവര്ണര്ക്ക് നിവേദനം നല്കി.
നിലവിലെ എക്സിക്യൂട്ടീവ് വൈസ് പ്രസിഡന്റ് വിരമിച്ച ഒഴിവിലാണ് ഡോ. സജി ഗോപിനാഥിന് എക്സിക്യൂട്ടീവ് വൈസ് പ്രസിഡന്റിന്റെ ചുമതല മുഖ്യമന്ത്രി നല്കിയിരിക്കുന്നത്. സയന്സിലോ ടെക്നോളജിയിലോ വൈദഗ്ധ്യമുള്ളവരെ മാത്രമേ എക്സിക്യൂട്ടീവ് വൈസ് പ്രസിഡന്റായി നിയമിക്കാന് വ്യവസ്ഥയുള്ളൂ. കാലിക്കറ്റ് ഐഐഎമ്മിലെ മാനേജ്മെന്റ് പ്രൊഫസറായ സജി ഗോപിനാഥ് ശാസ്ത്രജ്ഞനല്ല. അതുകൊണ്ട് ശാസ്ത്രസാങ്കേതിക കൗണ്സിലിന്റെ എക്സിക്യൂട്ടീവ് വൈസ് പ്രസിഡന്റ് പദവിക്കുള്ള യോഗ്യതയില്ല. അതിനാല് അദ്ദേഹത്തിന്റെ നിയമനം ചട്ടവിരുദ്ധമാണെന്ന് നിവേദനത്തില് പറയുന്നു.
സംസ്ഥാന സാങ്കേതിക വിദ്യാഭ്യാസ ജോയിന്റ് ഡയറക്ടറായിരുന്നപ്പോള് നിയമന അധികാരിയായ സര്ക്കാരിന്റെ അനുമതി കൂടാതെ സാങ്കേതിക സര്വകലാശാലയുടെ താല്ക്കാലിക വിസി യുടെ അധിക ചുമതല ഏറ്റെടുത്തതിന്റെ പേരില് ഡോ. സിസാ തോമസിനെതിരെ പിണറായി സര്ക്കാര് ശിക്ഷാ നടപടി സ്വീകരിച്ചിരുന്നു.
സമാനമായി ഡിജിറ്റല് വിസിയുടെ നിയമന അധികാരിയായ ഗവര്ണറുടെ അനുമതി കൂടാതെ സാങ്കേതിക പരിസ്ഥിതി കൗണ്സിലിന്റെ എക്സിക്യൂട്ടീവ് വൈസ് പ്രസിഡന്റിന്റെ ചുമതല നല്കിയതും സജിഗോപിനാഥ് പദവി ഏറ്റെടുത്തതും നിയമവിരുദ്ധമാണ്. ഇക്കാരണത്താല് സജി ഗോപിനാഥിനെതിരെ അച്ചടക്ക നടപടിയെടുക്കണമെന്നും നിവേദനത്തില് ആവശ്യപ്പെട്ടിട്ടുണ്ട്.
