ചാലക്കുടി: മുരിങ്ങൂര് ഡിവൈന് ധ്യാനകേന്ദ്രത്തിലെ മലിന ജലം പുറത്തേക്കൊഴുക്കുന്നതായി പരാതി. പുറത്തേക്കൊഴുക്കുന്ന മലിന ജലം റെയില്വെ പുറമ്പോക്കിലൂടെ ഉണ്ടാക്കിയിരിക്കുന്ന തോട്ടിലൂടെ റെയില്വൈ അടിപ്പാതിയിലൂടെ പാടത്തേക്കും അവിടെ നിന്ന് ഒലിച്ച് തോട്ടിലൂടെ ചാലക്കുടി പുഴയിലും എത്തിച്ചേരുമെന്ന് പ്രദേശവാസികള് പറയുന്നു.
ധ്യാനകേന്ദ്രത്തിലെ നൂറു കണക്കിന് പേര് ഉപയോഗിക്കുന്ന മലിന ജലമാണ് നേരിട്ട് പുറത്തേക്കൊഴുക്കുന്നത്. റെയില്വെ പുറമ്പോക്ക് കൈയേറി അതിന് സമീപത്തായി തോട് ഉണ്ടാക്കി അതിലൂടെയാണ് മലിന ജലം പുറത്തേക്ക് ഒഴുക്കുന്നത്. ഡിവൈന് ധ്യാനകേന്ദ്രത്തിന്റെ പുറകിലായി വലിയ തോതിലാണ് റെയില്വെയുടെ പുറമ്പോക്ക് ഭൂമി കൈയേറി എല്പി സ്കൂളും മറ്റും പണിതിരിക്കുന്നത്.
മഴ പെയ്യുമ്പോള് വെള്ളം ഒലിച്ച് പോകുവാന് തോടു കീറുന്നതിന്റെ മറവില് ഭൂമി കൈയേറി അവിടെ തെങ്ങുകളും മറ്റും വെച്ച് പിടിപ്പിക്കുകയാണ്. മലിന ജലം പുറത്തേക്ക് ഒഴുക്കിയിരുന്ന രണ്ട് പൈപ്പുകള് പരാതിയെ തുടര്ന്ന് അടച്ചെങ്കിലും ഒരു പൈപ്പിലൂടെ ഇപ്പോഴും വെള്ളം പുറത്തേക്ക് ഒഴുക്കി വിടുകയാണ്. രൂക്ഷമായ കുടിവെളള ക്ഷാമം നേരിടുമ്പോള് പുഴ മലിനമാക്കുന്ന ഈ നടപടിക്കെതിരെ കര്ശന നടപടി സ്വീകരിക്കണമെന്ന് നാട്ടുകാര് ആവശ്യപ്പെട്ടു
