തിരുവനന്തപുരം: വട്ടിയൂര്ക്കാവ് നെട്ടയം മലമുകളില് ബിജെപി പ്രവര്ത്തകരെ ആക്രമിച്ച വട്ടിയൂര്ക്കാവ് എസ്എച്ച്ഒ വിപിനും എസ്ഐ ദീപുവിനുമെതിരെ നടപടി ആവശ്യപ്പെട്ടും കുമാരാരാമം ഇടപ്പഴനി ബാലസുബ്രഹ്മണ്യ സ്വാമി ക്ഷേത്ര മതപാഠശാലയില് കയറി പോലീസ് നടത്തിയ അതിക്രമത്തില് പ്രതിഷേധിച്ചും ഹൈന്ദവ സംഘടനകളുടെ നേതൃത്വത്തില് നടത്തിയ പോലീസ് കമ്മിഷണര് ഓഫീസ് ബഹുജന മാര്ച്ച് അകാരണമായി അക്രമം നടത്തുന്ന പോലീസുകാര്ക്ക് താക്കീതായി.
തിരുവനന്തപുരം ബിജെപി ജില്ല കമ്മിറ്റി ഓഫീസിനു സമീപത്തുനിന്ന് ആരംഭിച്ച ബഹുജന മാര്ച്ച് തൈക്കാട് പോലീസ് ഗ്രൗണ്ടിന് സമീപം ബാരിക്കേഡുകള് വച്ച് തടുത്തു. പ്രതിഷേധക്കാരെ നേരിടാന് പോലീസ് ശക്തമായ സന്നാഹങ്ങളാണ് ഒരുക്കിയിരുന്നത്. ബാരിക്കേഡുകളെപ്പോലും മറികടക്കാന് കരുത്തുള്ള വന്ജനാവലിയാണ് ബഹുജന മാര്ച്ചില് അണിനിരന്നത്. തൈക്കാട് പോലീസ് ഗ്രൗണ്ടിനു മുന്നിലെത്തിയ മാര്ച്ചില് പ്രവര്ത്തകര് ബാരിക്കേഡുകള് മറിച്ചിടാന് ശ്രമിച്ചെങ്കിലും നേതാക്കള് ഇടപെട്ട് ശാന്തരാക്കുകയായിരുന്നു. പോലീസിന്റെ നീതി നിഷേധത്തിനെതിരെ അതിശക്തമായ പ്രതികരണമാണ് ബഹുജന മാര്ച്ചില് ഉണ്ടായത്. എസ്എച്ച്ഒ വിപിനും എസ്ഐ ദീപു പിള്ളയ്ക്കുമെതിരെ വലിയ രീതിയിലുള്ള പ്രതിഷേധം ഉണ്ടായി. വനിതകള് ഉള്പ്പെടെയുള്ള നൂറുകണക്കിനാളുകള് കമ്മിഷണര് ഓഫീസ് മാര്ച്ചില് പങ്കെടുത്തു.
തൈക്കാട് ഹൗസിന് സമീപം പോലീസ് ഗ്രൗണ്ടിന് മുന്വശത്ത് ഇരുഭാഗത്തേക്കുമുള്ള ഗതാഗതം തടസപ്പെടുത്തി മൂന്നു മണി മുതല് പോലീസ് ബാരിക്കേഡുകള് വച്ച് യാത്രക്കാരെ തടഞ്ഞു. രണ്ട് ജലപീരങ്കികളും നിരവധി പോലീസുകാരെയും പ്രതിഷേധക്കാരെ നേരിടാന് തയാറാക്കിയിരുന്നു. മേട്ടുക്കട, തൈക്കാട് ഗസ്റ്റ് ഹൗസ്, ഉച്ചുമാളി അമ്മന് ക്ഷേത്രം എന്നിവിടങ്ങളില് പോലീസ് യാത്രക്കാരെ തടഞ്ഞു.
ബിജെപി ജില്ലാ പ്രസിഡന്റ് കരമന ജയന് ബഹുജന മാര്ച്ച് ഉദ്ഘാടനം ചെയ്തു. കോര്പറേഷന് സ്റ്റാന്ഡിങ് കമ്മിറ്റി ചെയര്പേഴ്സണ് കരമന അജിത് അധ്യക്ഷത വഹിച്ചു. ഹിന്ദുഐക്യവേദി ജില്ല ജനറല് സെക്രട്ടറി വഴയില ഉണ്ണി, ഡെ. മേയര് ആശാനാഥ്, സ്റ്റാന്ഡിങ് കമ്മിറ്റി ചെയര്പേഴ്സണ്മാരായ എം.ആര്. ഗോപന്, ചെമ്പഴന്തി ഉദയന്, അഡ്വ. ഗിരികുമാര്, കൗണ്സിലര്മാരായ നീറമണ്കര ഹരി, പാച്ചല്ലൂര് ഗോപകുമാര്, സരിത പി., ശ്രുതി എസ്.എസ്., മഞ്ജു ജി.എസ്., ബിജെപി ജില്ല വൈസ് പ്രസിഡന്റ് ആര്.എസ്. രാജീവ്, സംസ്ഥാന സമിതി അംഗം തമ്പാനൂര് സതീഷ്, വട്ടിയൂര്ക്കാവ് മണ്ഡലം പ്രസിഡന്റ് മണികണ്ഠന് നായര് തുടങ്ങിയവര് ബഹുജന മാര്ച്ചിന് നേതൃത്വം നല്കി.
