മേടമാസം ഒരു പൂക്കാലമാണ്! തീവെയിലത്ത് മഞ്ഞപ്പൂക്കളുടെ വസന്തം. ഉച്ചസൂര്യനൊപ്പം കണിക്കൊന്നകളുടെ ഉന്മാദ നൃത്തം!
ഏതു പ്രതിസന്ധിയിലും കരുത്തോടെ നില്ക്കാമെന്നും, പൊന്നുപോലെ പൂവിട്ട് അതിശയിപ്പിക്കാമെന്നും അവ പറയാതെ പറയുന്നുണ്ട്. സൂര്യനു മുന്നില് ശിരസ്സുയര്ത്തി നില്ക്കുന്ന കൊന്നപ്പൂക്കളെ കാണാന് വേണ്ടി മാത്രം ഞാന് എത്രയോ തവണ യാത്ര ചെയ്തിരിക്കുന്നു. വെയിലുരുക്കിയ സ്വര്ണ വസന്തത്തിന്റെ ഇലകാണാ മഞ്ഞ കണ്ണെത്താ ദൂരത്തോളം വ്യാപിച്ചിരുന്നു.
പിന്നെ ഐതിഹ്യങ്ങളുടെ ചിറകേറി ‘പ്രാഗ്ജ്യോതിഷ’ത്തിലെത്തി. അവിടെ തിന്മയുടെയും അഹതയുടെയും തലപ്പാവണിഞ്ഞ് നരകാസുരന്. ലോകം അവന്റെ ക്രൂരതയാല് പിടഞ്ഞു. ദേവമാതാവിനെയും അവന് വെറുതെ വിട്ടില്ല. അമ്മയ്ക്കു വേദനിച്ചാല് ഈശ്വരനുണരും. പ്രപഞ്ചത്തിന്റെ ക്ഷമ അവിടെ അവസാനിക്കും. പത്നീസമേതനായി ഗരുഡന്റെ മേലേറി വന്ന ശ്രീകൃഷ്ണന് നരകാസുരനെ വധിച്ചു. തിന്മയുടെ ഇരുട്ടിനെ തുടച്ചു നീക്കി. ദേവരാജാവിന്റെ വെണ്കൊറ്റക്കുട മീനരാശിയില് നിന്നും സംക്രമം കഴിച്ച് ഉച്ചരാശിയിലേക്കു പ്രവേശിക്കുന്ന സൂര്യനെപ്പോല് തിളങ്ങി ദേവമാതാവിന്റെ രത്നകുണ്ഡലങ്ങള് ഐശ്വര്യത്തിന്റെ ഓര്മകള് ഉണര്ത്തിക്കൊണ്ട് കണിക്കൊന്നകളായി പൂത്തുലഞ്ഞു. പിന്നെ വിഷു നാളില് വീടകങ്ങളിലേക്കെത്തി ഒരാണ്ടിന്റെ ഐശ്വര്യത്തിന്റെയും സൗഭാഗ്യത്തിന്റെയും പ്രാര്ത്ഥനകളായി സൂര്യനുമായി ബന്ധപ്പെട്ട വിശ്വാസം കൂടി വിഷുവിനുണ്ട്. അന്നേ ദിവസം സൂര്യന് നേരിട്ട് ഭൂമിയിലേക്ക് അനുഗ്രഹം പകരുന്ന ദിനമായി കരുതപ്പെടുന്നു. അതുകൊണ്ടു തന്നെ സൂര്യാരാധനയ്ക്കും പ്രാധാന്യമുണ്ടെന്ന് കണക്കാക്കുന്നു.
കാര്ഷിക വൃത്തിയുമായി ബന്ധപ്പെട്ടും വിഷുവിനെ കണക്കാക്കുന്നു. സംഘകാലത്തെ പതിറ്റുപ്പത്ത് എന്ന കൃതിയില് വിഷുവിനെ പരാമര്ശിക്കുന്നത് അതിന്റെ പൗരാണികമായ പ്രാധാന്യം വിളിച്ചോതുന്നു. പണ്ടുകാലത്ത് വിഷുപ്പക്ഷിയുടെ പാട്ടുകേട്ട്, കൈക്കോട്ടു പൂജിച്ച് പൂട്ടുകാളയെ കുളിപ്പിച്ച് ചന്ദനം തൊട്ട് കൊമ്പുകളില് കൊന്നപ്പൂവുകൊണ്ട് അലങ്കരിച്ച് വയലേലകള് ഉഴുവുന്നതിന് തുടക്കം കുറിക്കും. ഉഴവുചാലില് അടയും പൂക്കളും നേദിക്കും. ഭൂമി മാതൃദേവതയാണെന്ന് നമ്മുടെ പൂര്വ്വികര് തിരിച്ചറിത്തിരുന്നു. മാത്രമല്ല, കണിയൊരുക്കലില് കാര്ഷിക വിഭവങ്ങള്ക്കും പ്രമുഖ സ്ഥാനമുണ്ട്.
കണികാണലിന്റെ ചാരുതയില്ലാത്ത ഒരു വിഷുവിനെക്കുറിച്ച് മലയാളിക്ക് ഓര്ക്കാന് പോലും കഴിയില്ല. ഈ ദിനം പുതിയ വര്ഷത്തിന്റെ തുടക്കമായി കണക്കാക്കപ്പെടുന്നു. സമൃദ്ധിയും ഐശ്വര്യവും സന്തോഷവും വര്ഷം മുഴുവന് ഉണ്ടാകേണമെന്ന പ്രാര്ത്ഥനയാണ് വിഷുദിനം. അതുകൊണ്ടുതന്നെ പുലര്ച്ചെ കണികണ്ട് ഒരാണ്ടിനെ നിറഞ്ഞ മനസ്സോടെ വരവേല്ക്കുന്നു. അതിനായി തലേ ദിവസം രാത്രി തന്നെ കണിയൊരുക്കുന്നു. കണിയൊരുക്കലും കണികാണലും വിഷുക്കൈനീട്ടവും വിഷു സദ്യയുമൊക്കെ വിഷുവിന്റെ അവിഭാജ്യ ഘടകങ്ങളാണ്.
അങ്ങനെ വിഷു ഒരു ഉത്സവമല്ല, കേരളത്തിന്റെ സംസ്കാരവും പാരമ്പര്യവും കുടുംബ ബന്ധങ്ങളും പ്രതിഫലിപ്പിക്കുന്ന ഒന്നാണ്.
ഒറ്റവാക്കില് പറ ഞ്ഞാല് വിഷു എന്നത് പുതിയ തുടക്കത്തിന്റെയും സമൃദ്ധിയുടെയും ദൈവാനുഗ്രഹത്തിന്റെയും സമന്വയമാണ്. ബാഹ്യമായ ഇത്തരം ആചാര-ആഘോഷങ്ങള് ആന്തരിക വെളിച്ചത്തിന്റെയും സമൃദ്ധിയുടെയും രഹസ്യാടയാളങ്ങള് കൂടിയാണ്. എത്ര കൊടും വെയിലേറ്റാലും വാടാതെ പൂവിട്ടു നില്ക്കുന്നൊരു കൊന്നമരം എല്ലാ ഹൃദയങ്ങളിലുമുണ്ടാട്ടെ. എങ്കിലേ ഉള്ളിലെന്നും കണിയൊരുക്കാനാകൂ. സ്നേഹത്തിന്റെ കൈനീട്ടം സമൂഹത്തിന് നല്കാനുമാകൂ. അപ്പോള് അകവും പുറവും സമൃദ്ധിയാലും സന്തോഷത്താലും നിറയും. നോക്കൂ… നിലവിളക്കിനരികില് അലങ്കരിച്ച ഓട്ടുരുളിയിലെ വാല്ക്കണ്ണാടിയില് നമ്മള് നമ്മളെത്തന്നെ കാണുന്നുണ്ട്!
ജന്മഭൂമി ഓണ്ലൈന്