പുതുവര്‍ഷത്തെ വരവേറ്റ് നാളെ വിഷു; കണിവെള്ളരിക്കും കൊന്നപ്പൂവിനും ക്ഷാമം

ആലപ്പുഴ: ഓരോ വര്‍ഷവും വിപണി കീഴടക്കാന്‍ പുതിയ പടക്കങ്ങളും പൂത്തിരികളും വിപണിയില്‍ സജീവമായിരുന്നെങ്കിലും ഇത്തവണ പുതിയവയൊന്നും വിഷുവിനെ വരവേല്‍ക്കാന്‍ എത്തിയിട്ടില്ലെന്ന്. പാരച്ചൂട്ടും, പൂവും ചക്രവും, ഫ്ളോട്ട് ആന്‍ഡ് ഫൗണ്ടനുമാണ് വില്‍പനയില്‍ സജീവം. വിലയിലും കഴിഞ്ഞ വര്‍ഷങ്ങളെക്കാള്‍ വലിയ വര്‍ദ്ധനവുണ്ടായിട്ടില്ല. എന്നാല്‍ പടക്കവിപണിയില്‍ പഴയതുപോലെ വലിയ തിരക്കില്ലെന്നാണ് വ്യാപാരികള്‍ പറയുന്നത്.

കണികാണാനായി കണിവെള്ളരിയും കണിമത്തയും ചെറിയ ചക്കയും മാങ്ങയും മറ്റ് പഴവര്‍ഗങ്ങളും വിപണിയില്‍ ഉണ്ടെങ്കിലും പഴയതുപോലെ സജീവമായിട്ടില്ല. കണിവെള്ളരി വിപണിയില്‍ കണികാണാനില്ല. കഴിഞ്ഞ വര്‍ഷങ്ങളില്‍ കഞ്ഞിക്കുഴിയില്‍ നിന്ന് കണിവെള്ളരി വിപണിയില്‍ സുലഭമായെത്തിയെങ്കിലും ഇത്തവണ കറിവെള്ളരിയായിരുന്നു അധികവും. മത്ത, പേരക്ക, മാങ്ങ തുടങ്ങിയ പഴവര്‍ഗങ്ങള്‍ അയല്‍സംസ്ഥാനങ്ങളില്‍ നിന്നാണ് അധികവുമെത്തിയത്. വലിപ്പമനുസരിച്ചാണ് കണിവെള്ളരിക്കും മത്തനും ചക്കക്കും വില. 30 രൂപ മുതലാണ് വെള്ളരിക്കും മത്തനും വില വാങ്ങുന്നത്. ചക്കക്ക് വില 50ന് മുകളിലാണ്. കണിയൊരുക്കുന്ന മാമ്പഴത്തിനുമുണ്ട് പ്രത്യേകത. മഞ്ഞ നിറത്തിലുള്ള സപ്പോര്‍ട്ട മാങ്ങയാണ് ഇതിനായി വിപണിയില്‍ എത്തിയത്. കിലോക്ക് 60 രൂപയായിരുന്നു വില. കൂടാതെ പേരക്കയ്‌ക്ക് 50 ഉം വെള്ളമുന്തിരിക്ക് 60 രൂപയുമായിരുന്നു. ചൈനീസ് പടക്കങ്ങള്‍ വിപണിയിലെത്തിയപോലെ കണിക്കൊന്ന പൂക്കളും മാര്‍ക്കറ്റില്‍ ശ്രദ്ധേയമായി. വിഷുവിനെ വരവേല്‍ക്കുന്നതിനായി വീടിനും സ്ഥാപനങ്ങള്‍ക്ക് മുമ്പിലും കണിക്കൊന്നപ്പൂക്കള്‍ കെട്ടിത്തൂക്കിയിരുന്നു. കണിക്കൊന്ന ഇല്ലാതായതോടെ പൂക്കളും കിട്ടാതായി. എന്നാല്‍ ഒറിജിനിലിനെ പോലും വെല്ലുന്ന തരത്തിലുള്ള പ്ലാസ്റ്റിക്കില്‍ നിര്‍മ്മിച്ച കണിക്കൊന്നപ്പൂക്കള്‍ നഗരങ്ങളില്‍ സുലഭമാണ്. ഒരു തണ്ടിന് 25 രൂപയാണ് വില. ഇതും തമിഴ്നാട്ടില്‍ നിന്നുതന്നെയാണ് ചേക്കേറിയത്.

കണിത്താലം ഒരുക്കുന്നതിനായി പ്രത്യേകം ശ്രീകൃഷ്ണ പ്രതിമകളും വിപണിയില്‍ സജീവമായിരുന്നു. ഫൈബര്‍ പ്രതിമകള്‍ക്കാണ് പ്രിയമേറെയും. ശ്രീകൃഷ്ണവിഗ്രഹത്തിന് മുന്നില്‍ അഞ്ച് തിരിയിട്ട് തെളിയിച്ച നിലവിളക്കിനടുത്ത് പിത്തള ഉരുളിയിലാണ് കണിയൊരുക്കുന്നത്. വിവിധതരത്തിലെ പഴങ്ങളും ഉണക്കലരി, നാണയം, പുതിയ വസ്ത്രം, സ്വര്‍ണം എന്നിവക്കൊപ്പം വാല്‍ക്കണ്ണാടി, മയില്‍പ്പീലി, ഞൊറി, ഓടക്കുഴല്‍, കണിക്കൊന്ന, കുങ്കുമച്ചെപ്പ് എന്നിവ വെച്ചാണ് അലങ്കരിക്കുന്നത്. മയില്‍പ്പീലിയുടെ വില 15 രൂപ മുതലും ഞൊറിക്ക് 120 മുതല്‍ 200 രൂപ വരെയുമായിരുന്നു. ഓടക്കുഴലിന് 30 രൂപയും 25 മുതല്‍ 50 രൂപവരെ വിലയുള്ള വാല്‍ക്കണ്ണാടിയും വിപണിയിലുണ്ട്. ശ്രീകൃഷ്ണ വിഗ്രഹങ്ങള്‍ക്ക് 180 രൂപ മുതല്‍ 1000 രൂപ വരെയായിരുന്നു. കുങ്കുമച്ചെപ്പിന് 50 രൂപവരെ വാങ്ങുന്നു.

ഉച്ചക്ക് ഭക്ഷണം കഴിച്ചശേഷം കുടുംബത്തോടൊപ്പം പുത്തന്‍വസ്ത്രങ്ങളും പടക്കങ്ങള്‍ വാങ്ങിയും ബന്ധുവീടുകളില്‍ പോകുന്ന പതിവും വിഷു ആഘോഷത്തിന്റെ പ്രത്യേകതയാണ്.