കോയമ്പത്തൂര്: തിരക്കേറിയ ജീവിതത്തിനിടയിൽ ഒന്നു സ്ലോ ഡൗൺ ചെയ്യാൻ ആഗ്രഹിക്കാത്തവർ ഉണ്ടാവില്ല. ഇപ്പോഴിതാ, തമിഴ്നാട്ടിലെ കോയമ്പത്തൂരിനടുത്തുള്ള വെള്ളിയാംഗിരി മലനിരകളുടെ ശാന്തമായ താഴ്വരയിലുള്ള ഇഷ യോഗ സെന്ററിൽ ശാന്തസുന്ദരമായ കുറച്ചുദിവസങ്ങൾ ചെലവഴിച്ചതിലുള്ള സന്തോഷം പങ്കിടുകയാണ് നടി അപർണ ദാസ്.
“ഇഷയിലെ കഴിഞ്ഞ രണ്ടു ദിവസങ്ങൾ തികച്ചും മാന്ത്രികമായിരുന്നു. അവരുടെ ജീവിതരീതി പിന്തുടർന്നും, ഭക്ഷണം പങ്കുവെച്ചും, പ്രാർത്ഥനകളിലും ധ്യാനത്തിലും മുഴുകിയും കഴിഞ്ഞപ്പോൾ ഞാനും അവരിൽ ഒരാളാണെന്ന് തോന്നിപ്പോയി. ലളിതമായ കാര്യങ്ങളിൽ പോലും എത്ര വലിയ സന്തോഷമായിരുന്നു… ആ ചിരിയും നൃത്തവും ഒത്തൊരുമയുമെല്ലാം ഹൃദ്യമായിരുന്നു.
വെറും രണ്ടു ദിവസത്തിനുള്ളിൽ അതീവ സുന്ദരമായ ഒന്ന് ഞാൻ അനുഭവിച്ചറിഞ്ഞു. മനുഷ്യരെ അവരുടെ ഏറ്റവും സ്വാഭാവികവും നിഷ്കളങ്കവുമായ രൂപത്തിൽ ഞാൻ കണ്ടുമുട്ടി. ആ യാത്രയിൽ എവിടെയോ വെച്ച് ഞാൻ എന്നെത്തന്നെയും കണ്ടുമുട്ടിത്തുടങ്ങി.
നമ്മെത്തന്നെ കണ്ടെത്തുക എന്നത് ഏറ്റവും പ്രയാസമേറിയ യാത്രകളിൽ ഒന്നാണ്… ഇത് എന്റെ ആ യാത്രയുടെ ഒരു തുടക്കമായി എനിക്ക് അനുഭവപ്പെടുന്നു,” അപർണ ദാസ് കുറിച്ചു.
അപർണ ദാസ് മാത്രമല്ല, നിരവധി സെലിബ്രിറ്റികളും അപർണയ്ക്ക് ഒപ്പമുണ്ടായിരുന്നു. അവതാരകരും നടിമാരുമായ രഞ്ജിനി ഹരിദാസ്, ആര്യ, നടിമാരായ ദിവ്യപിള്ള, നിത്യ ദാസ്, ശിൽപ്പ ബാല, നടനും യൂട്യൂബറുമായ കാർത്തിക് ശങ്കർ തുടങ്ങിയവരും ഈ യാത്രയിൽ ഉണ്ടായിരുന്നു.
