നിയമസഭാ തിരഞ്ഞെടുപ്പിൽ സമ്മതിദാനാവകാശം വിനിയോഗിക്കാൻ മലയാളത്തിന്റെ പ്രിയ താരം മോഹൻലാൽ എത്തി. തിരുവനന്തപുരം നേമം മണ്ഡലത്തിലെ മുടവൻമുഗൾ എൽപി സ്കൂളിലെ പോളിംഗ് ബൂത്തിലാണ് താരം വോട്ട് രേഖപ്പെടുത്തിയത്. രാവിലെ തന്നെ വോട്ടിംഗ് കേന്ദ്രത്തിലെത്തിയ മോഹൻലാൽ സാധാരണക്കാരനായി വരി നിന്നാണ് വോട്ട് ചെയ്തത്.
മഷി പുരട്ടിയ ചൂണ്ട് വിരൽ ഉയർത്തി കാട്ടിയുള്ള ചിത്രവും നടൻ സമൂഹ മാധ്യമത്തിലൂടെ പങ്കുവച്ചിട്ടുണ്ട്. നേമം മണ്ഡലത്തിലെ മുടവൻമുകൾ സ്കൂൾ ബൂത്ത് 36ൽ എത്തിയാണ് മോഹൻലാൽ വോട്ട് രേഖപ്പെടുത്തിയത്. ‘ദിസ് ഈസ് മൈ മെസേജ്’ എന്നായിരുന്നു മഷി പുരട്ടിയ ചൂണ്ട് വിരൽ ഉയർത്തി നടൻ പറഞ്ഞത്.
അതേസമയം, കേന്ദ്രമന്ത്രി സുരേഷ് ഗോപി ഗുരുവായൂർ മണ്ഡലത്തിലെ ഗുരുവായൂർ ദേവസ്വം ഇംഗ്ലീഷ് മീഡിയം സ്കൂളിൽ 137 നമ്പർ ബൂത്തിൽ വോട്ട് ചെയ്തു. നടൻ പ്രിത്വിരാജ് സുകുമാരൻ ഭാര്യയും നിർമാതാവുമായ സുപ്രിയയ്ക്ക് ഒപ്പമെത്തി എറണാകുളം മണ്ഡലത്തിലെ ഗവൺമെൻറ് റീജിയണൽ ഫിഷറീസ് ടെക്നിക്കൽ എച്ച്എസ്എസ് സ്കൂളിലെ 198 നമ്പർ ബൂത്തിൽ വോട്ട് രേഖപ്പെടുത്തി.
