കൊച്ചി: കോടതികളില് അടിസ്ഥാന സൗകര്യങ്ങള് ഒരുക്കാന് അനുമതി നല്കുന്നതിനുള്ള നടപടിക്രമങ്ങള് വേഗത്തിലാക്കാന് ഹൈക്കോടതി നിര്ദ്ദേശിച്ചു.
കോടതികളില് ആവശ്യമായ സിവില്, ഇലക്ട്രിക്കല്, ഇലക്ട്രോണിക് ജോലികള് ചെയ്യാന് പൊതുമരാമത്ത് വകുപ്പിന് (പിഡബ്ല്യുഡി) അനുമതി നല്കുന്നതിനായി ഇളവുകള് അനുവദിക്കണമെന്ന് ആവശ്യപ്പെട്ട് രജിസ്ട്രാര് മാര്ച്ച് 21ന് അയച്ച കത്ത് സ്ക്രീനിംഗ് കമ്മിറ്റിക്ക് ഉടന് കൈമാറാന് ചീഫ് ജസ്റ്റീസ് സൗമെന് സെന്, ജസ്റ്റീസ് വി.എം. ശ്യാം കുമാര് എന്നിവരടങ്ങിയ ഡിവിഷന് ബെഞ്ച് സിഇഒയോട് നിര്ദേശിച്ചു.ഈ നിര്ദേശത്തിന് ഇന്ത്യന് തെരഞ്ഞെടുപ്പ് കമ്മീഷന്റെ മുന്കൂര് അനുമതി വേണമെന്നും സംസ്ഥാന സര്ക്കാര് രൂപീകരിച്ച സ്ക്രീനിംഗ് കമ്മിറ്റി വഴി ഇത് കൈമാറണമെന്നും നിര്ദേശിച്ച് ഏപ്രില് രണ്ടിന് സിഇഒ കത്തിന് മറുപടി നല്കി.
കോടതി പരിസരത്തെ അടിസ്ഥാന സൗകര്യ വികസന, ആഭ്യന്തര ജോലികളുമായി ബന്ധപ്പെട്ടതാണ് അപേക്ഷ. തെരഞ്ഞെടുപ്പ് ഇതിനെ ബാധിക്കരുതെന്ന് കോടതി പറഞ്ഞു.
