ന്യൂദൽഹി: അമേരിക്കയും ഇറാനും തമ്മിലുള്ള സമീപകാല വെടിനിർത്തൽ കരാറിനെ ഇന്ത്യയുടെ വിദേശകാര്യ മന്ത്രാലയം സ്വാഗതം ചെയ്തു. മിഡിൽ ഈസ്റ്റിലെ സംഘർഷം ലഘൂകരിക്കുന്നതിനുള്ള ഒരു നല്ല ചുവടുവയ്പ്പാണിതെന്ന് വിശേഷിപ്പിച്ചു. ഈ ധാരണ മേഖലയിൽ ശാശ്വത സമാധാനത്തിനും സ്ഥിരതയ്ക്കും വഴിയൊരുക്കുമെന്ന് വിദേശകാര്യ മന്ത്രാലയം പ്രത്യാശ പ്രകടിപ്പിച്ചു.
സുപ്രധാനമായ ആഗോള ഊർജ്ജ ഇടനാഴിയായ ഹോർമുസ് കടലിടുക്കിലൂടെ തടസ്സമില്ലാത്തതും സുരക്ഷിതവുമായ സമുദ്ര ഗതാഗതം ഉറപ്പാക്കേണ്ടതിന്റെ പ്രാധാന്യം വിദേശകാര്യ മന്ത്രാലയം അടിവരയിട്ടു. കൂടാതെ ഷിപ്പിംഗ് റൂട്ടുകളിൽ സാധാരണ നില നിലനിൽക്കുമെന്ന് ശുഭാപ്തിവിശ്വാസം പ്രകടിപ്പിച്ചു.
“വെടിനിർത്തൽ കരാറിനെ ഞങ്ങൾ സ്വാഗതം ചെയ്യുന്നു, പശ്ചിമേഷ്യയിൽ ശാശ്വത സമാധാനം ഉണ്ടാകുമെന്ന് ഞങ്ങൾ പ്രതീക്ഷിക്കുന്നു. നേരത്തെ ഞങ്ങൾ നിരന്തരം വാദിച്ചതുപോലെ, നിലവിലുള്ള സംഘർഷത്തിന് എത്രയും വേഗം അറുതി വരുത്തുന്നതിന് സംഘർഷം ലഘൂകരിക്കൽ, സംഭാഷണം, നയതന്ത്രം എന്നിവ അത്യാവശ്യമാണ്,”- പ്രസ്താവനയിൽ പറയുന്നു.
കൂടാതെ സംഘർഷം ഇതിനകം തന്നെ ജനങ്ങൾക്ക് വലിയ ദുരിതം വരുത്തിവച്ചിട്ടുണ്ട്. ആഗോള ഊർജ്ജ വിതരണ, വ്യാപാര ശൃംഖലകളെ തടസ്സപ്പെടുത്തിയിട്ടുണ്ട്. ഹോർമുസ് കടലിടുക്കിലൂടെ തടസ്സമില്ലാത്ത ഗതാഗതം സ്വാതന്ത്ര്യവും ആഗോള വാണിജ്യ നീക്കവും നിലനിൽക്കുമെന്ന് ഞങ്ങൾ പ്രതീക്ഷിക്കുന്നുവെന്നും പ്രസ്താവനയിൽ കൂട്ടിച്ചേർത്തു.
