കൊച്ചി: ഭാരതം കരുത്തുള്ള രാജ്യമാണെന്നും ലോകത്തിന്റെ ഏതുഭാഗത്ത് പോയാലും ഇന്ന് ഭാരതീയര്ക്ക് മാന്യത ലഭിക്കുന്നതായും സര്സംഘചാലക് ഡോ. മോഹന് ഭാഗവത്. നമ്മളെ ആക്രമിച്ചവരെ അവരുടെ നാട്ടില് പോയി പാഠം പഠിപ്പിക്കാനുള്ള കഴിവ് നാം ആര്ജിച്ചു. നെഹ്റുവിന്റെ കാലത്ത് ചൈന നമ്മളെ ആക്രമിച്ചപ്പോള് വേണ്ട രീതിയില് പ്രവര്ത്തിക്കാതെ കീഴടങ്ങേണ്ടി വന്നു. അക്കാലത്ത് അമേരിക്ക സന്ദര്ശിച്ച മഹാരാഷ്ട്രയിലെ ഒരു എഴുത്തുകാരന് കണ്ട നാടകത്തില് നെഹ്റുവിന്റെ വേഷം കെട്ടിയ ആള് കെന്നഡിയോട് യാചിക്കുന്നതും ജനങ്ങള് ചിരിക്കുന്നതും കണ്ടുവെന്ന് വേദനയോടെ എഴുതി. ആ ദുഃസ്ഥിതി ഇന്നില്ല. ലോകത്തിനുമുന്പില് കരുത്തോടെ നില്ക്കണം. കാശ്മീരി ജനത സമ്പത്തിലും ബുദ്ധിശക്തിയിലും വളരെ മുന്നിലായിരുന്നു. എന്നാല് നാടിനെക്കുറിച്ച് ചിന്തിച്ചില്ല. അവസാനം പിറന്ന മണ്ണില് നിന്നും എല്ലാം ഉപേക്ഷിച്ച് ഓടിപ്പോകേണ്ടി വന്നു. നല്ലവരായതുകൊണ്ടുമാത്രം കാര്യമില്ല, സമൂഹത്തിനുവേണ്ടി നിലനില്ക്കണമെന്നാണ് ഇത് പഠിപ്പിക്കുന്നത്. എളമക്കര ഭാസ്കരീയത്തില് ബാലനേതൃശിബിരം ഉദ്ഘാടനം ചെയ്തുകൊണ്ട് അദ്ദേഹം പറഞ്ഞു.
ഒരു ഘട്ടത്തിലും നമ്മുടെ സംസ്കാരത്തെ കൈവിടരുത്. മോശം പ്രവര്ത്തനങ്ങളില് ലജ്ജ തോന്നുന്ന മനോഭാവമുണ്ടാകണം. ഏത് കഠിനതയിലും ജീവിതത്തിലെ നന്മകളെ നാം ചേര്ത്തുപിടിക്കണം. ധര്മരക്ഷയ്ക്കായി സ്വജീവിതം ത്യജിച്ച നിരവധി മാതൃകകള് നമുക്ക് മുന്പിലുണ്ട്. ഭാരതമാതാവിന്റെ സുരക്ഷ സൂക്ഷിക്കണം. വിപത്ത് വരുമ്പോള് നാടിനെ രക്ഷിക്കണമെന്നും അദ്ദേഹം പറഞ്ഞു. നാടിനെ പുരോഗതിയിലേക്ക് നയിക്കാനുള്ള ചുമതലയും നമുക്കുണ്ട്, മോഹന് ഭാഗവത് പറഞ്ഞു.
ഈ നാടിനെ നയിക്കാനുള്ള കര്ത്തവ്യം നിങ്ങള്ക്കാണെന്ന് ബാലനേതൃസമ്മേളനത്തിനെത്തിയ വിദ്യാര്ത്ഥി സമൂഹത്തെ അദ്ദേഹം ഓര്മ്മിപ്പിച്ചു. പത്തോ പതിനഞ്ചോ വര്ഷങ്ങള്ക്കുശേഷം നാടിനെ നയിക്കേണ്ടവരാണ് നമ്മള്. നന്മ ജീവിതത്തോട് ചേര്ത്തുവെക്കണം. വിളക്ക് കൈയിലുണ്ടായാല് പോരാ വെളിച്ചത്തിലേക്ക് നടക്കണം. സ്വയം പരിശ്രമിക്കണം. ചപലത പാടില്ല. ദൃഢമായ മനസോടെ നല്ല വ്യക്തിയായി നിലനില്ക്കണം. ഘോരമായ തപസ്യയാണിത്. അഹങ്കാരമില്ലാതെ മറ്റുള്ളവരോട് ദ്വേഷമില്ലാതെ മുന്നോട്ടുപോകണമെന്നും മോഹന് ഭാഗവത് പറഞ്ഞു.
ചടങ്ങില് ബാലഗോകുലം സംസ്ഥാന അധ്യക്ഷന് ആര്. പ്രസന്നകുമാര് അധ്യക്ഷത വഹിച്ചു. സീമാജാഗരണ് മഞ്ച് അഖിലഭാരതീയ സംരക്ഷക് എ. ഗോപാലകൃഷ്ണന് സര്സം ഘചാലകിന്റെ പ്രസംഗം പരിഭാഷപ്പെടുത്തി. കരിയര് ഗുരു ഡോ. പി.ആര്. വെങ്കിട്ടരാമന്, സ്വാഗതസംഘം ചെയര്മാന് ടി.എസ്. പട്ടാഭിരാമന്, സംസ്ഥാന ഭഗിനി പ്രമുഖ സ്മിത വത്സലന്, ബാലസമിതി സംസ്ഥാന അധ്യക്ഷ ശിവന്യ എസ്. പ്രദീപ്, കോഴിക്കോട് ജില്ലാ കാര്യദര്ശി ആദികേശവന് എന്നിവര് പങ്കെടുത്തു. ബാലഗോകുലം പൊതുകാര്യദര്ശി കെ.എന്. സജികുമാര് സ്വാഗതവും കാര്യദര്ശി വി.ജെ. രാജ്മോഹന് നന്ദിയും പറഞ്ഞു.
